काठमाडौं । परराष्ट्रमन्त्री शिशिर खनालले रसुवाको भोटेकोसी नदीमा आएको भीषण बाढीमा परी हालसम्म ९ जनाको शव फेला परेको जानकारी दिएका छन् ।

प्रतिनिधिसभाको बुधबारको बैठकमा विशेष सम्बोधन गर्दै मन्त्री खनालले उद्धार टोलीले बाढी प्रभावित क्षेत्रबाट ९ वटा शव संकलन गरेको जानकारी सदनलाई दिएका हुन् ।

फेला परेका शवको भने अहिलेसम्म सनाखत हुन नसकेको उनले बताए । सनाखतका लागि आवश्यक प्रक्रिया अघि बढाइएको मन्त्री खनालको भनाइ छ ।

‘बाढी प्रभावित क्षेत्रमा हालसम्म ९ जनाको शव फेला परेको छ, तर उनीहरूको पहिचान खुल्न सकेको छैन । सनाखतका लागि आवश्यक प्रक्रिया अगाडि बढिरहेको छ,’ उनले भने ।

मन्त्री खनालका अनुसार बिहान ८ः३७ बजे गएको भूकम्प र त्यसपछि आएको पहिरोका कारण करिब ८ः४० बजे भोटेकोसी नदीमा बाढी आएको प्रारम्भिक सूचना प्राप्त भएको थियो ।

बाढीपछि प्रभावित क्षेत्रमा खोज तथा उद्धार कार्य जारी रहेकाले मानवीय क्षतिको विवरण अझै बढ्न सक्ने बताइएको छ ।