काठमाडौं । साताको कारोबारको तेस्रो दिन बुधबार सेयर बजारमा करिब ३६ अंकको गिरावट आएको छ । नेप्से परिसूचक ३५.९२ अंकले घटेर २ हजार ५५८.३५ विन्दुमा झरेको हो ।

मंगलबार नेप्से ५.३० अंकले घटेर २ हजार ५९४.२७ विन्दुमा रोकिएको थियो ।

बुधबार बजार परिसूचक घटे पनि कारोबार रकम भने अघिल्लो दिनको तुलनामा बढेको छ । मंगलबार ४ अर्ब १० करोड रुपैयाँ बराबरको कारोबार भएकोमा बुधबार ४ अर्ब ७७ करोड रुपैयाँभन्दा बढीको कारोबार भएको छ ।

यस दिन ३४८ वटा कम्पनीका १ करोड ३५ लाख ८२ हजार ३२० कित्ता सेयर ४ अर्ब ७७ करोड ३८ लाख ५७ हजार ६५७ रुपैयाँमा किनबेच भएका छन् ।

कारोबारमा आएका ३४८ मध्ये २३ वटा कम्पनीको सेयर मूल्य बढेको छ भने २५२ वटाको घटेको छ । ३ कम्पनीको मूल्य भने स्थिर रह्यो ।

बुधबार १३ वटै समूहका उपसूचक राताम्य भएका छन् । बजारमा उच्च अंकको गिरावट आउँदा सबै समूहको उपसूचक नकारात्मक देखिएको हो ।

कम्पनीगत रूपमा सर्वोत्तम पेन्ट्स इन्डस्ट्रिजको सेयर सकारात्मक सर्किट लेभलमा कारोबार हुँदा रसुवागढी हाइड्रोपावरको सेयर मूल्य करिब १५ प्रतिशतले घटेको छ ।

कारोबार रकमका आधारमा चिलिमे हाइड्रोपावर शीर्ष स्थानमा रह्यो । कम्पनीको करिब २० करोड रुपैयाँ बराबरको सेयर कारोबार भएको छ ।

त्यस्तै सानिमा मिडल तमोर हाइड्रोपावरको १९ करोड, साहस ऊर्जा लिमिटेडको १६ करोड, सोलु हाइड्रोपावरको १५ करोड र रिडी पावरको १२ करोड रुपैयाँ बराबरको कारोबार भएको छ ।