काठमाडौं। सरकारले बाढी तथा पहिरो प्रभावित क्षेत्रमा राहत सामग्री वितरणसँगै घाइतेको उद्धार र उपचारलाई तीव्र बनाएको छ।

विपद्बाट प्रभावित नागरिकलाई तत्काल आवश्यक खाद्यान्न तथा अन्य सामग्री उपलब्ध गराउने काम भइरहेको राष्ट्रिय आपत्कालीन कार्य सञ्चालन केन्द्रले जनाएको छ।

गृह मन्त्रालयअन्तर्गतको राष्ट्रिय आपत्कालीन कार्य सञ्चालन केन्द्रका प्रमुख फडेन्द्रप्रसाद पौडेलका अनुसार प्रभावित क्षेत्रमा तत्काल खान मिल्ने तयारी खाद्यान्न पठाइएको छ। चाउचाउ, बिस्कुटलगायतका सामग्री सम्बन्धित क्षेत्रमा पुर्‍याइसकिएको उनले जानकारी दिए।

राहत वितरणमा विशेषगरी सुत्केरी महिला, बालबालिका र ज्येष्ठ नागरिकलाई प्राथमिकता दिइएको छ। उनीहरूका लागि आवश्यक ओछ्यान तथा अन्य बन्दोबस्तीका सामग्रीसमेत उपलब्ध गराइएको पौडेलले बताए।

यस्तै, बाढीबाट घाइते भएकाहरूको उपचारका लागि प्रभावित क्षेत्रमै स्वास्थ्यकर्मी तथा मेडिकल टोली परिचालन गरिएको छ। टोलीले घाइतेलाई प्राथमिक उपचार गर्नुका साथै आवश्यक परे थप उपचारका लागि अन्य अस्पतालमा पठाउने व्यवस्था मिलाइरहेको छ।

गम्भीर अवस्थाका घाइतेलाई हेलिकप्टरलगायतका माध्यमबाट काठमाडौं ल्याउने व्यवस्था गरिएको छ। त्यसका लागि वीर अस्पताल, त्रिवि शिक्षण अस्पताल र निजामती (सिभिल) अस्पताललाई ‘डेडिकेटेड’ अस्पतालका रूपमा तयारी अवस्थामा राखिएको छ।

विपद्मा परी मृत्यु भएकाहरूको शव व्यवस्थापनको काम पनि अघि बढिरहेको केन्द्रले जनाएको छ। पहिचान खुलेका शवको कानुनी प्रक्रिया पूरा गरी सम्बन्धित परिवारलाई बुझाउने काम भइरहेको पौडेलले बताए।

सरकारले अहिलेको अवस्थामा खोज तथा उद्धार र तत्कालीन राहतलाई मुख्य प्राथमिकता दिएर सुरक्षा निकाय तथा अन्य सरकारी संयन्त्र परिचालन गरिरहेको जनाएको छ।

प्रभावित क्षेत्रमा आवश्यकताअनुसार थप राहत सामग्री पठाउने तथा गम्भीर घाइतेको उद्धारलाई निरन्तरता दिने तयारी गरिएको छ।