काठमाडौं । काठमाडौं महानगरपालिकाले आर्थिक वर्ष २०८२/०८३ मा कुल बजेटको ५८.५५ प्रतिशत खर्च गरेको छ।

महानगरले २५ अर्ब २६ करोड २६ लाख रुपैयाँ बजेट विनियोजन गरेकामा १४ अर्ब ७९ करोड २० लाख रुपैयाँ खर्च भएको हो। केन्द्रीय विभागको औसत खर्च ३८.३४ प्रतिशत रहँदा ३२ वटै वडाको औसत खर्च ६३.९१ प्रतिशत पुगेको छ।

कुल खर्चमध्ये चालुतर्फ ७३.७१ प्रतिशत र पुँजीगततर्फ ४९.०८ प्रतिशत खर्च भएको छ। अघिल्लो आर्थिक वर्षमा ५०.२९ प्रतिशत बजेट खर्च भएकोमा यस वर्ष करिब ८ प्रतिशतले सुधार भएको महानगरले जनाएको छ।

महानगरको आन्तरिक राजस्व संकलन पनि ६७.७८ प्रतिशत पुगेको छ। १० अर्ब १२ करोड ६४ लाख रुपैयाँ लक्ष्य रहेकामा ६ अर्ब ८६ करोड ३८ लाख रुपैयाँ संकलन भएको हो।

क्षेत्रगत रूपमा पूर्वाधार विकासमा ५९.९५ प्रतिशत, सामाजिक विकासमा ५५.८ प्रतिशत, आर्थिक विकासमा ३०.९४ प्रतिशत तथा सुशासन र अन्तरसम्बन्धित क्षेत्रमा ३१.४३ प्रतिशत वित्तीय प्रगति भएको छ। कार्यालय सञ्चालन तथा प्रशासनिकतर्फ भने ९०.८८ प्रतिशत खर्च भएको छ।

कार्यवाहक प्रमुख सुनिता डंगोलले आगामी दिनमा नागरिकले प्रत्यक्ष महसुस गर्ने कामलाई प्राथमिकता दिनुपर्ने बताइन्। प्रमुख प्रशासकीय अधिकृत मुक्तिराम अर्यालले वित्तीय प्रगति सुधार भए पनि राजधानी महानगरका लागि अझ प्रभावकारी काम आवश्यक रहेको बताए।