काठमाडौं। रसुवामा भोटेकोशी नदीको बहाव निरन्तर बढिरहेको भन्दै त्रिशूली नदीको तटीय क्षेत्रमा उच्च सतर्कता अपनाउन आग्रह गरिएको छ।

बाढी पूर्वानुमान महाशाखाले शुक्रबार सूचना जारी गर्दै त्रिशूली नदीको तटीय क्षेत्र हुँदै मुग्लिनसम्मका बासिन्दालाई अर्को सूचना नआएसम्म उच्च सतर्कताका साथ सुरक्षित स्थानमा रहन आग्रह गरेको हो।

महाशाखाका अनुसार रसुवामा भोटेकोशी नदीमा बाढी बढिरहेको र यसको प्रभाव त्रिशूली नदीको बहावमा पर्न सक्ने भएकाले नदी आसपासका बस्ती तथा तटीय क्षेत्रमा जोखिम बढेको छ।

नदीको बहाव बढ्न सक्ने सम्भावनालाई मध्यनजर गर्दै तटीय क्षेत्रमा रहेका सर्वसाधारणलाई नदी किनारमा नजान, सुरक्षित स्थानमा रहन तथा स्थानीय प्रशासन र सुरक्षा निकायले जारी गर्ने सूचनालाई पालना गर्न आग्रह गरिएको छ।

पछिल्लो समय नेपाल-चीन सीमावर्ती क्षेत्रमा आएको बाढी तथा पहिरोका कारण भोटेकोशी र त्रिशूली नदीको जलसतहमा उतारचढाव भइरहेको छ। यसैबीच भोटेकोशीमा बाढी बढेपछि त्यसको प्रत्यक्ष प्रभाव त्रिशूली नदीको तल्लो तटीय क्षेत्रमा पर्न सक्ने भन्दै महाशाखाले सतर्कता अपनाउन भनेको हो।

बाढी पूर्वानुमान महाशाखाले अर्को सूचना जारी नगरेसम्म त्रिशूली नदीको तटीय क्षेत्रमा उच्च सतर्कता अपनाई सुरक्षित स्थानमा रहन विशेष अनुरोध गरेको छ।