काठमाडौं । भोटेकोशी बाढीबाट प्रभावित नागरिकको उद्धार तथा राहतका लागि सरकारले सञ्चालन गरेको प्रधानमन्त्री दैवी प्रकोप उद्धार कोषमा सहयोग ओइरिएको छ। पछिल्लो ३६ घण्टामै कोषमा १ अर्ब ९१ करोड रुपैयाँभन्दा बढी रकम जम्मा भएको छ।

अर्थ मन्त्रालयका अनुसार बुधबार मध्याह्नदेखि बिहीबार राति १२ बजेसम्म विभिन्न १० वटा वाणिज्य बैंकमा रहेका कोषका खातामा दाताहरूले १ अर्ब ९१ करोड ८६ लाख ५० हजार ९११ रुपैयाँ जम्मा गरेका हुन्।

भोटेकोशी नदीमा बुधबार बिहान आएको भीषण बाढीले रसुवा, नुवाकोट, धादिङ, गोरखालगायत जिल्लामा ठूलो जनधनको क्षति पुर्‍याएपछि सरकारले प्रभावित क्षेत्रलाई विपद् संकटग्रस्त क्षेत्र घोषणा गरेको थियो। त्यसपछि राहत तथा पुनःस्थापनाका लागि सरकारी कोषमा सहयोग जुट्ने क्रम तीव्र बनेको हो।

सरकारले कोषमा प्राप्त हुने रकम संकलन तथा समन्वयको जिम्मेवारी अर्थ मन्त्रालयलाई दिएको छ। संस्थागत रूपमा १ करोड रुपैयाँ वा त्यसभन्दा बढी सहयोग गर्ने दाताबाट अर्थमन्त्री डा. स्वर्णिम वाग्लेले स्वयं रकम ग्रहण गरिरहेका छन्।

व्यक्तिगत रूपमा सहयोग गर्न चाहनेले भने अर्थ मन्त्रालयमा पुगेर नगद रकम उपलब्ध गराउन सक्ने व्यवस्था गरिएको छ।

नयाँ सहयोग थपिएसँगै प्रधानमन्त्री दैवी प्रकोप उद्धार कोषको मौज्दात ४ अर्ब ९ करोड ११ लाख ६० हजार रुपैयाँ पुगेको छ। यसअघि कोषमा २ अर्ब १७ करोड २५ लाख ९ हजार ७५९ रुपैयाँ रहेको थियो।

यसैबीच, बिहीबार मात्रै करिब ६ घण्टाको अवधिमा निजी क्षेत्रका विभिन्न दाताबाट अर्थ मन्त्रालयमार्फत २७ करोड ३३ लाख रुपैयाँ सहयोग प्राप्त भएको थियो।

अर्थ मन्त्रालयका अनुसार उक्त रकममा मित्रराष्ट्रहरूले सहयोग गर्ने घोषणा गरेका रकम भने समावेश गरिएको छैन।

सरकारले प्राप्त सहयोगलाई प्रभावित नागरिकको तत्कालीन राहत, उद्धार तथा आगामी पुनःस्थापना र पुनर्निर्माणमा परिचालन गर्ने तयारी गरेको छ।