काठमाडौं । नेपाल क्रिकेट संघ (क्यान) पनि बाढी तथा प्राकृतिक विपद्बाट प्रभावित नागरिकको सहयोगमा उत्रिएको छ । क्यानले राहत, उद्धार र पुनर्स्थापनाका लागि ३० लाख रुपैयाँ सहयोग गर्ने निर्णय गरेको छ ।

शनिबार विज्ञप्ति जारी गर्दै क्यानले विपद्बाट प्रभावित परिवार तथा समुदायप्रति दुःख व्यक्त गर्दै सहयोग रकम प्रधानमन्त्री दैवी प्रकोप उद्धार कोषमा जम्मा गर्ने जनाएको हो ।

देशका विभिन्न क्षेत्रमा आएको बाढी तथा अन्य प्राकृतिक विपद्बाट प्रभावित नागरिकप्रति ऐक्यबद्धता जनाउँदै क्यानले संकटको समयमा राहत र पुनर्स्थापनाका काममा आफ्नो तर्फबाट सहयोग जारी राख्ने प्रतिबद्धता जनाएको छ ।

क्यानले विपद्का बेला उद्धार, राहत तथा पुनर्स्थापनाका लागि आवश्यक सहयोग र सहकार्यमा सदैव साथ दिने पनि जनाएको छ।