काठमाडौं। रसुवामा आएको विनाशकारी बाढीबाट प्रभावित समुदायको राहत तथा उद्धारका लागि युरोपियन युनियन (ईयू) ले नेपाललाई २० लाख युरो मानवीय सहायता उपलब्ध गराउने भएको छ ।

ईयूले शनिबार विज्ञप्ति जारी गर्दै आपत्कालीन अवस्थामा प्रभावित नागरिकका तत्कालीन आवश्यकता पूरा गर्न उक्त रकम उपलब्ध गराउने जनाएको हो । सहायता रकमबाट खाद्यान्न, स्वास्थ्य सेवा, स्वच्छ खानेपानी, सरसफाइ तथा आश्रयलगायतका क्षेत्रमा सहयोग गरिनेछ ।

ईयूको सहयोग प्राप्त साझेदार संस्थाहरूले प्रभावित क्षेत्रमा राहत वितरणसमेत सुरु गरिसकेका छन् । बाढीपछि ती संस्थाले पूर्वतयारी अवस्थामा राखिएका आश्रय तथा राहत सामग्री तत्काल प्रभावित समुदायसम्म पुर्‍याउन थालेका हुन् ।

ईयूका अनुसार यो सहायता यस वर्षको सुरुआतमा नेपालमा विपद् पूर्वतयारीका लागि छुट्याइएको करिब ३० लाख युरोको मानवीय सहयोगभन्दा अतिरिक्त हो ।

बाढीपछिको प्रतिकार्य समन्वय गर्न ईयूले एसियाका लागि ‘र्‍यापिड रेस्पोन्स कोअर्डिनेटर’ समेत परिचालन गर्ने जनाएको छ । प्रभावित क्षेत्रमा उद्धार तथा राहतको अवस्थाबारे जानकारी लिन र स्थानीय प्रतिकार्यलाई सहयोग पुर्‍याउन ईयूले ‘कोपरनिकस’ भू–उपग्रह सेवा पनि सक्रिय गरेको छ ।

ईयू कमिस्नर फर प्रिपेयर्डनेस एन्ड क्राइसिस म्यानेजमेन्ट हाड्जा लाहबिबले बाढीले सडक तथा बस्तीमा ठूलो क्षति पुर्‍याउनुका साथै कतिपय गाउँलाई सम्पर्कविहीन बनाएको उल्लेख गरेकी छन् । विपद्का कारण परिवारहरू आफ्ना सम्पर्कविहीन आफन्तको खोजीमा रहेको भन्दै उनले प्रभावित समुदायलाई तत्काल स्वास्थ्य सेवा, खाद्यान्न, खानेपानी र आश्रय आवश्यक रहेको बताइन् ।

ईयूले यस कठिन घडीमा नेपालका प्रभावित समुदायलाई साथ दिने प्रतिबद्धता जनाउँदै तत्कालीन मानवीय आवश्यकताका लागि २० लाख युरो सहायता उपलब्ध गराएको जनाएको छ ।