चितवन। रसुवाको भोटेकोशीमा आएको विनाशकारी बाढीपछि बेपत्ता भएकाहरूको खोजीका क्रममा तल्लो तटीय क्षेत्रमा शव भेटिने क्रम बढेको छ । चितवनसहित नवलपरासीका दुई जिल्लामा पर्ने नारायणी नदीमा मात्रै अहिलेसम्म सयौँ शव फेला परेका छन् ।

सरकारको पछिल्लो विवरणअनुसार बाढीमा परेका ९०३ जनाको शव फेला परिसकेको छ । तीमध्ये चितवन, नवलपरासी (बर्दघाट सुस्ता पूर्व) र नवलपरासी (बर्दघाट सुस्ता पश्चिम) मा मात्रै ६३० शव भेटिएका छन् । चितवनमा २७२, पूर्वी नवलपरासीमा २०७ र पश्चिम नवलपरासीमा १५१ शव फेला परेको विवरण छ ।

बाढीको मुख्य प्रभाव परेको रसुवा र नुवाकोट क्षेत्रमा उद्धार तथा खोजीलाई प्राथमिकता दिइरहँदा नदीको बहाव तल्लो क्षेत्रमा कम हुँदै गएपछि नारायणीमा शव भेटिने क्रम बढेको हो । केही शव नदीको बहावसँगै भारतसम्म पुगेको बताइएको छ ।

चितवनमा बेपत्ताको खोजीका लागि नेपाली सेनाले अभियानलाई थप तीव्र बनाएको छ । मध्य पृतनाको नेतृत्वमा गठित टास्क फोर्सअन्तर्गत विभिन्न सैन्य युनिटले नदी तथा आसपासका क्षेत्रलाई छुट्टाछुट्टै भागमा विभाजन गरेर खोजी गरिरहेका छन् ।

नयाँ गोरख गण र नयाँ सबुज गणले संयुक्त रूपमा नारायणी नदी तथा आसपासका क्षेत्रमा खोजी गरिरहेका छन् । जोखिमपूर्ण स्थानमा खोजी गर्न संहनाथ गणको कमाण्डो तालिमप्राप्त टोलीसमेत परिचालन गरिएको नेपाली सेनाले जनाएको छ ।

सोमबार बिहान ५ बजेदेखि जारी खोजीका क्रममा दिउँसो २ बजेसम्म मात्रै नगर वन टापु क्षेत्रमा १० शव फेला परेका छन् । सोही स्थानमा थप दुई शवका अवशेषसमेत भेटिएको सेनाले जनाएको छ ।

बेपत्ता नागरिकको खोजीका लागि चितवनमा ड्रोन, वाटर रबरबोटलगायत उपकरण प्रयोग गरिएको छ । खोजी तथा उद्धारमा सुरक्षाकर्मी र अन्य निकायसहित ४३६ जनाको संयुक्त टोली परिचालन गरिएको छ ।