काठमाडौं। जापानकी प्रधानमन्त्री सानाए ताकाइचीले प्रधानमन्त्री वालेन्द्र शाह (बालेन)सँग टेलीफोन संवाद गर्दै नेपालमा भोटेकोशी बाढीबाट भएको ठूलो जनधनको क्षतिप्रति दुःख व्यक्त गरेकी छन् ।

ताकाइचीले सामाजिक सञ्जालमार्फत प्रधानमन्त्री शाहसँग अपराह्नमा कुराकानी भएको जानकारी दिएकी हुन् । कुराकानीका क्रममा उनले बाढीमा ज्यान गुमाएकाहरूप्रति श्रद्धाञ्जली व्यक्त गर्दै मृतकका परिवार र प्रभावित नागरिकप्रति सहानुभूति प्रकट गरिन् ।

नेपाल र जापान दुवै प्राकृतिक विपद्को जोखिममा रहेका मुलुक भएको स्मरण गर्दै ताकाइचीले नेपालले अहिले भोगिरहेको संकटप्रति आफू दुःखी भएको बताइन् । जापानमा कुमामोतो भूकम्प र भारी वर्षाका कारण भएका विपद्का घटनाको प्रसंगसमेत उनले प्रधानमन्त्री शाहसँग राखेकी छन् ।

बाढीपछि सम्पर्कविहीन रहेका पाँच जापानी नागरिकको खोजी तथा उद्धारमा सहयोग गर्न ताकाइचीले प्रधानमन्त्री शाहसँग पुनः आग्रह गरेकी छन् ।

जवाफमा प्रधानमन्त्री शाहले उनीहरूको खोजी तथा उद्धारका लागि नेपाल सरकारले उपलब्ध स्रोतसाधन प्रयोग गरेर सक्दो प्रयास गरिरहेको जानकारी गराएको ताकाइचीले उल्लेख गरेकी छन् ।

जापान सरकारले पनि आफ्ना नागरिकको अवस्था पत्ता लगाउन उपलब्ध स्रोतसाधन परिचालन गरिरहेको उनले बताएकी छन् ।

बाढीबाट प्रभावित नेपालीका लागि जापानले पाल, कम्बललगायत आपत्कालीन राहत सामग्री उपलब्ध गराउने भएको छ ।

ताकाइचीका अनुसार ती सामग्री जापानभित्रका विपद्का लागि राखिएको भण्डारबाट नभई विदेशमा आपत्कालीन सहायता उपलब्ध गराउन छुट्टै व्यवस्थापन गरिएको भण्डारबाट पठाइनेछ ।

जापानले अन्तर्राष्ट्रिय संस्थामार्फत थप सहयोग उपलब्ध गराउने तथा आवश्यक परे अन्तर्राष्ट्रिय आपत्कालीन सहायता टोली नेपाल पठाउने तयारीसमेत गरिरहेको उनले जानकारी दिएकी छन् ।

ताकाइचीले नेपाललाई एसियाली मित्रका रूपमा जापानले निरन्तर सहयोग गर्ने प्रतिबद्धता व्यक्त गरेकी छन् ।

प्रधानमन्त्री ताकाइचीले नेपाल र जापानबीच कूटनीतिक सम्बन्ध स्थापना भएको ७०औँ वर्षगाँठकै दिन प्रधानमन्त्री शाहसँग कुराकानी भएको उल्लेख गरेकी छन् ।

उनले आगामी दिनमा नेपाल र जापानबीचको मैत्रीपूर्ण सम्बन्धलाई थप मजबुत बनाउने प्रतिबद्धता पनि व्यक्त गरेकी छन् ।