काठमाडौं। भोटेकोशी र त्रिशूली क्षेत्रमा १० भदौमा आएको विनाशकारी बाढीले जलविद्युत् क्षेत्रमा ठूलो क्षति पुर्‍याएको छ। 

हालसम्म ८ सञ्चालनमा रहेका र ४ निर्माणाधीन गरी १२ जलविद्युत् आयोजनाका संरचनामा क्षति पुगेको छ भने करिब ४३१ मेगावाट विद्युत् राष्ट्रिय प्रसारण प्रणालीबाट विच्छेद भएको छ।

बाढीबाट माथिल्लो त्रिशूली-३, रसुवागढी र चिलिमे जलविद्युत् आयोजनाका संरचनामा ठूलो क्षति पुगेको छ। माथिल्लो मैलुङ खोलाको प्रसारण लाइन तथा इन्टरकनेक्सन संरचना र सूर्यकुण्ड हाइड्रोको १३२ केभी प्रसारण लाइनसमेत क्षतिग्रस्त भएको छ।

सान्जेन जलविद्युत् आयोजनाका उत्पादन केन्द्रमा प्रत्यक्ष क्षति नपुगे पनि प्रसारण लाइनमा क्षति हुँदा उत्पादित विद्युत् राष्ट्रिय ग्रिडमा पठाउन नसकिएको कम्पनीले बताएकाे छ। यसका कारण आयोजना बन्द गर्नुपर्ने अवस्था आएको छ।

बाढीकाे कारण आयोजना मात्रै नभई प्रसारण र विद्युत् निकासी प्रणालीमा समेत गम्भीर असर पारेको छ। अर्बौं रुपैयाँ लगानीमा निर्माण भएका संरचना क्षतिग्रस्त हुँदा ऊर्जा उत्पादनसँगै आयोजनामा कार्यरत प्राविधिक तथा कामदारसमेत प्रभावित भएका छन्।

क्षतिबाट कम्पनीको आम्दानी, नाफा, नगद प्रवाह र ऋण भुक्तानी क्षमतामा असर पर्न सक्ने भन्दै नेपाल धितोपत्र बोर्डले प्रभावित सूचीकृत कम्पनीको वास्तविक अवस्था सार्वजनिक गर्न चासो देखाएको छ।

बोर्डले प्रभावित कम्पनीको आयोजना, भौतिक क्षति, उत्पादन तथा प्रसारणमा परेको असर, बिमा र दाबीको अवस्था, प्रारम्भिक वित्तीय क्षति, पुनः सञ्चालनको सम्भावित समय तथा ऋण दायित्वमा पर्ने प्रभाव सार्वजनिक गर्न निर्देशन दिएको छ।

विपद्को अवस्थालाई आधार बनाएर प्रभावित कम्पनीको सेयरमा अस्वाभाविक उतारचढाव वा बजार चलखेल हुन सक्ने भन्दै बोर्डले नेपाल स्टक एक्सचेन्जलाई समेत विशेष निगरानी गर्न भनेको छ।