काठमाडौं । प्रधानमन्त्री बालेन शाहले भोटेकोशीमा आएको विनाशकारी बाढीले रसुवा, नुवाकोट र धादिङलाई मात्रै नभई सिंगो मुलुकलाई गहिरो पीडा दिएको बताएका छन्।

‘यो पीडा रसुवा, नुवाकोट वा धादिङको मात्र होइन, यो सिङ्गो नेपालको छातीमा परेको साझा बज्रपात हो। तर यतिबेला हामीलाई शरीर थकित भयो भनेर विश्राम लिने छुट छैन। मन भक्कानिँदा पनि एकआपसमा बिलौना गर्ने समय छैन,’ उनले भने। 

प्रतिनिधिसभाको बैठकमा सम्बोधन गर्दै प्रधानमन्त्री शाहले विपत्तिबाट प्रभावित नागरिकको दुःखप्रति सरकार गम्भीर रहेको बताए। आफन्त अझै सम्पर्कमा नआएका र उनीहरूको खोजीको प्रतीक्षामा रहेका परिवारको पीडा आफूले महसुस गरेको उनको भनाइ छ।

बाढीमा परी घाइते भएकाहरूको शीघ्र स्वास्थ्यलाभको कामना गर्दै उनले प्रभावित परिवारप्रति समवेदना व्यक्त गरे।

प्रधानमन्त्री शाहले संकटको समयमा निराश भएर बस्ने वा एकअर्कासँग दुःख व्यक्त गरेर मात्र समय बिताउने अवस्था नरहेको बताए। यस्तो कठिन घडीमा राज्यको नेतृत्वले जनतामा आशा, साहस र भरोसा जगाउनुपर्ने उनको भनाइ छ।

उनले विपत्तिसँग जुध्न सरकार दृढताका साथ अघि बढिरहेको दाबी गरे। परिस्थितिले चुनौतीपूर्ण बनाए पनि नागरिकको जीवनरक्षा, उद्धार तथा राहतका लागि सरकारसँग पछि हट्ने विकल्प नरहेको उनले बताए। 

उनले अगाडि थपे,‘दृढ सङ्कल्प, साहसका साथ यो विपत्तिमा लड्नुको हामीसँग अर्को विकल्प छैन र थिएन। हामी लडिरहेका छौँ।’ 

सम्बोधनका क्रममा प्रधानमन्त्री शाहले बाढीपछि सरकारले तत्काल थालेका खोजी तथा उद्धार, घाइतेको उपचार, राहत वितरण र प्रभावित नागरिकको सुरक्षाका लागि भइरहेका प्रयासबारे पनि प्रतिनिधिसभालाई जानकारी गराएका छन्।