काठमाडौं। भोटेकोशी-त्रिशूली बाढीपछि नेपाली सेनासँग मिल्दोजुल्दो पोसाकमा उद्धार तथा राहतमा खटिएको ‘ग्रिन आर्मी नेपाल’को दर्ता खारेज भएको छ ।

कम्पनी रजिष्ट्रारको कार्यालयमा २०७७ सालमा गैरनाफामूलक कम्पनीका रूपमा दर्ता भएको संस्थाले विद्यार्थीलाई वातावरण संरक्षण, फोहोर व्यवस्थापन, प्राथमिक उपचार तथा विपद् व्यवस्थापनसम्बन्धी तालिम दिने उद्देश्य राखेको थियो ।

तर संस्थाले नेपाली सेनाको झल्को दिने हरियो कम्ब्याट पोसाक, दर्ज्यानी चिह्न तथा ‘मार्शल’, ‘क्याडेट’जस्ता दर्जा प्रयोग गरेपछि यसको गतिविधिमाथि प्रश्न उठ्दै आएको थियो । पछिल्लो पटक रसुवा र नुवाकोटका बाढी प्रभावित क्षेत्रमा त्यही पोसाकमा टोली परिचालन भएपछि विवाद थप चर्किएको हो ।

संस्थाले प्रयोग गर्ने पोसाकका लागि विगतमा रक्षा मन्त्रालय, गृह मन्त्रालय र जिल्ला प्रशासन कार्यालय काठमाडौंको स्वीकृति लिएको देखिएको छ । काठमाडौंका प्रमुख जिल्ला अधिकारी ईश्वराज पौडेलले तत्कालीन समयमा नेपाली सेनाका अधिकारीको स्वीकृतिपत्रका आधारमा पोसाक प्रयोगको अनुमति दिइएको बताएका छन् ।

उच्च सैनिक स्रोतका अनुसार दर्ता खारेज भएसँगै संस्थाका गतिविधिमा समेत रोक लागेको छ । समाज कल्याण परिषद्सँगको आबद्धता भने छुट्टै प्रक्रियाबाट खारेज गरिने बताइएको छ ।

संस्थाका प्रमुख सल्लाहकारका रूपमा नेपाल प्रहरीका पूर्वआईजीपी सर्वेन्द्र खनालसमेत जोडिएका थिए ।

सुरक्षा मामिलाका जानकारहरूले निजी संस्था वा गैरसरकारी निकायले सुरक्षा निकायसँग भ्रम पैदा हुने गरी ‘आर्मी’ नाम, पोसाक र संरचना प्रयोग गर्न नहुने बताएका छन् ।

राष्ट्रिय सेवा दलजस्तो राज्यको औपचारिक संरचनाले समेत ‘आर्मी’ शब्द प्रयोग नगरेको अवस्थामा निजी संस्थाले त्यसरी प्रस्तुत हुनु गम्भीर विषय भएको उनीहरूको भनाइ छ ।