काठमाडौं । जर्मन सरकारले बाढीबाट प्रभावित क्षेत्रमा क्षति पुगेका स्वास्थ्य संस्थाको पुनर्निर्माण तथा स्वास्थ्य सेवा पुनःस्थापनामा सहयोग गर्ने भएको छ।

बाढीका कारण पूर्ण तथा आंशिक रूपमा क्षति भएका स्वास्थ्य संस्थाको पुनर्निर्माण, प्रभावित स्वास्थ्य संस्थामा फोहोरमैला व्यवस्थापन प्रणालीको सुदृढीकरण तथा स्वास्थ्य तथा खाद्य स्वच्छता मन्त्रालयले तयार गरेको प्रतिकार्य कार्ययोजना कार्यान्वयनमा सहयोग गर्ने विषयमा बिहीबार मन्त्रालयमा छलफल भएको हो।

छलफलका क्रममा बाढी प्रभावित क्षेत्रमा स्वास्थ्य सेवा नियमित बनाउन आवश्यक पूर्वाधार निर्माण तथा सेवा पुनःस्थापनाका विषयमा समेत कुराकानी भएको थियो।

मन्त्रालयमा भएको बैठकमा जर्मन दूतावासका उपप्रमुख तथा विकास सहयोग प्रमुख बेन्जामिन सेइडल, विकास सहयोग उपप्रमुख जान डिर्क्सेन, जीआईजेड नेपालकी प्रोग्राम म्यानेजर रुथ शुमाकर तथा डेपुटी प्रोग्राम म्यानेजर तीर्थकुमार सिन्हा सहभागी थिए।

बैठकमा बाढीबाट स्वास्थ्य क्षेत्रमा परेको क्षति, तत्कालीन आवश्यकता तथा दीर्घकालीन पुनर्निर्माणका लागि गर्नुपर्ने कामबारे छलफल भएको थियो।