पाँचथर । मिक्लाजुङमा बुवाको हत्या गरेको आरोपमा आमा र छोरा पक्राउ परेका छन् । मिक्लाजुङ गाउँपालिका–३ का इन्द्रकुमार दमाईको हत्या आरोपमा ४३ वर्षीया महिला र उनका १७ वर्षीय छोरा प्रहरी नियन्त्रणमा परेका हुन् ।

प्रहरीका अनुसार आमा-छोराले घरमै बन्चरो र दाउ प्रहार गरी दमाईको हत्या गरेका थिए । हत्या लुकाउन उनीहरूले शवलाई सुरुमा घरनजिकैको आल्चाको रुखमा झुन्ड्याएको र पछि त्यहाँबाट करिब पाँच सय मिटर तल भीरपाखामा लगेर फालेको खुलेको छ ।

दमाई गत भदौ २० गते छिमेकी इन्द्र राईको पाखाबारीमा मृत अवस्थामा भेटिएका थिए । उनको घाँटीमा सलको पासो थियो भने निधारलगायत शरीरका विभिन्न भागमा धारिलो वस्तुले प्रहार गरेको चोट देखिएको थियो ।

घटनाको प्रकृति शंकास्पद देखिएपछि प्रहरीले आत्महत्या नभई हत्या भएको आशंकामा अनुसन्धान अघि बढाएको थियो । अनुसन्धानका क्रममा पक्राउ परेका आमा–छोराले हत्या गरेको स्वीकार गरेको जिल्ला प्रहरी कार्यालय पाँचथरका डीएसपी अनिष कर्णले बताए ।

पक्राउ परेका दुवैको नाम प्रहरीले सार्वजनिक गरेको छैन । उनीहरूलाई अनुसन्धानका लागि अदालतबाट म्याद थप गरिएको छ ।

प्रहरीले घटनामा प्रयोग भएको बन्चरोसहित अन्य केही हतियारसमेत बरामद गरेको जनाएको छ ।

घटनाको कारणलगायत विषयमा थप अनुसन्धान भइरहेको प्रहरीको भनाइ छ ।