काठमाडौं। नुवाकोटको किस्पाङ गाउँपालिका अध्यक्ष वीरबल तामाङविरुद्ध बैंकिङ कसुर र ठगीसम्बन्धी १० वटा मुद्दा रहेको खुलेको छ ।

सोमबार प्रधानमन्त्री वालेन्द्र शाह(बालेन)सँग बाढी प्रभावित क्षेत्रका जनप्रतिनिधिको छलफलमा सहभागी भएर सिंहदरबारबाट बाहिरिने क्रममा पक्राउ परेका तामाङविरुद्ध विभिन्न प्रहरी कार्यालयमा मुद्दा दर्ता रहेको पाइएको हो ।

काठमाडौं जिल्ला प्रहरी परिसरले अनुसन्धान सकेर ३ करोड ४ लाख रुपैयाँ बिगोको बैंकिङ कसुर मुद्दाको मिसिल सरकारी वकिल कार्यालयमा पठाइसकेको छ । परिसरले नै १ करोड ३ लाख ३० हजार रुपैयाँ बिगोको अर्को बैंकिङ कसुर मुद्दाको अनुसन्धानसमेत पूरा गरी मिसिल बुझाइसकेको छ ।

त्यस्तै ४८ लाख र ९५ लाख रुपैयाँ बिगोका दुई छुट्टाछुट्टै बैंकिङ कसुरका मुद्दा पनि अनुसन्धान पूरा गरी सरकारी वकिल कार्यालयमा पेश भइसकेका छन् ।

के-के मुद्दा छन् तामाङविरुद्ध ?

तामाङविरुद्ध काठमाडौं जिल्ला प्रहरी परिसरमा ३ करोड ४ लाख, १ करोड ३ लाख ३० हजार, ४८ लाख र ९५ लाख रुपैयाँ बिगोका गरी चारवटा बैंकिङ कसुरसम्बन्धी मुद्दा छन् ।

त्यस्तै, २ करोड ५६ लाख रुपैयाँ बिगोको ठगी कसुरसम्बन्धी मुद्दा पनि काठमाडौं परिसरबाट सरकारी वकिल कार्यालयमा पठाइसकिएको छ ।

प्रहरीका अनुसार भक्तपुरमा २ लाख रुपैयाँ, प्रहरी वृत्त जनसेवामा ७५ लाख रुपैयाँ, दरबारमार्ग वृत्तमा ५ लाख २५ हजार रुपैयाँ र लैनचौर वृत्तमा १९ लाख ८० हजार रुपैयाँ बिगोका बैंकिङ कसुरसम्बन्धी मुद्दा दर्ता छन् ।

त्यस्तै महाराजगञ्ज प्रहरी वृत्तमा पनि बैंकिङ कसुरसम्बन्धी एउटा मुद्दा रहेको प्रहरीले जनाएको छ । महाराजगञ्जको मुद्दाको बिगो रकम भने प्रहरीले खुलाएको छैन ।

यसरी तामाङविरुद्ध विभिन्न प्रहरी कार्यालयमा बैंकिङ कसुरसम्बन्धी मुद्दा र एउटा ठगी कसुरको मुद्दा गरी १० वटा मुद्दा रहेको प्रहरीले जनाएको छ ।

तामाङ सोमबार प्रधानमन्त्री तथा मन्त्रिपरिषद्को कार्यालयमा भएको बाढी प्रभावित क्षेत्रका जनप्रतिनिधिसँगको छलफलमा सहभागी भएका थिए । बैठक सकेर सिंहदरबारबाट बाहिरिने क्रममा प्रहरीले उनलाई नियन्त्रणमा लिएको हो ।

पक्राउ पुर्जी जारी भएका तामाङ प्रधानमन्त्रीसँगको छलफलमा सहभागी भएको विषय सार्वजनिक भएपछि उनलाई सिंहदरबारबाटै पक्राउ गरिएको हो।