नुवाकोट। भदौ १० गते रसुवाको भोटेकोशी नदीमा आएको भीषण बाढीले त्रिशूली नदी आसपासका दर्जनौँ झोलुङ्गे पुलमा क्षति पुर्‍याएपछि टुटेको वारिपारिको सम्बन्ध जोड्न सरकारले मर्मत तथा पुनर्निर्माणको काम अघि बढाएको छ ।

बाढीले नुवाकोट र धादिङका विभिन्न स्थानमा त्रिशूली नदीमाथि रहेका पुलमा क्षति पुर्‍याएपछि स्थानीयको दैनिक आवतजावत प्रभावित भएको थियो । पुल नहुँदा बजार, विद्यालय, स्वास्थ्य संस्था र अन्य अत्यावश्यक सेवाका लागि समेत स्थानीयले घुमाउरो तथा लामो बाटो प्रयोग गर्नुपर्ने बाध्यता छ ।

नुवाकोटको केउरेनी बजार, तारुकाघाटलगायतका क्षेत्रमा पुल मर्मतको काम सुरु भइसकेको छ । पुल सञ्चालनमा नआउँदा दैनिक उपभोग्य सामग्री खरिददेखि कृषि उत्पादन बजारसम्म पुर्‍याउने कामसमेत प्रभावित भएको स्थानीय बताउँछन् ।

सरकारका अनुसार मुग्लिङदेखि टिमुरेसम्म रहेका ६४ झोलुङ्गे पुलमध्ये ५३ वटा बाढीबाट क्षतिग्रस्त भएका छन् । स्थलगत मूल्याङ्कनपछि तीमध्ये २० वटा मर्मत गरे पुग्ने र ३३ वटा भने पुनर्निर्माण गर्नुपर्ने निष्कर्ष निकालिएको छ ।

क्षतिग्रस्त पुल मर्मतका लागि सरकारले भदौ १७ गते कार्यादेश जारी गरेको जनाएको छ । मर्मत सुरु गरिएका महेश दोभान–मास्टार, कालिकाथान, मलिङ्गा–मझुवाटार, केउरेनी–गहते र पिमलटार–जागराम खोला झोलुङ्गे पुलको काम अघि बढिरहेको छ । यी पाँच पुल एक महिनाभित्र सञ्चालनमा ल्याउने सरकारी लक्ष्य छ ।

पुनर्निर्माण गर्नुपर्ने ३३ वटा पुलका लागि पनि भदौ १७ गते नै बोलपत्र आह्वान गरिएको सरकारले जनाएको छ । पुल पुनर्निर्माण भएपछि बाढीका कारण विच्छेद भएका ग्रामीण बस्ती र बजार क्षेत्रबीचको आवतजावत सहज हुने अपेक्षा गरिएको छ ।

भोटेकोशी र त्रिशूलीको बाढीले सडक, पुल, जलविद्युत् आयोजना तथा नदी किनारका बस्तीमा ठूलो क्षति पुर्‍याएको थियो । कतिपय ठाउँमा सडक कटान तथा भासिएपछि यातायातसमेत प्रभावित बनेको छ ।

स्थानीयका लागि झोलुङ्गे पुल नदी वारपार गर्ने संरचना मात्रै होइन, बजार, विद्यालय, स्वास्थ्यचौकी र रोजगारीसँग जोड्ने जीवनरेखा पनि हो ।

त्यसैले क्षतिग्रस्त पुलको काम तोकिएको समयमै सम्पन्न गरी आवतजावत सहज बनाउन स्थानीयले माग गरेका छन् ।