काठमाडौं । रसुवाको चिलिमे जलविद्युत् केन्द्रमा भोटेकोशी नदीमा आएको बाढीपछि फसेका पाँच कर्मचारीको शव पहिचान गरी आज परिवारजनलाई बुझाइएको छ।

चिलिमे जलविद्युत् कम्पनीका प्रबन्ध निर्देशक बाबुराजा महर्जनका अनुसार केन्द्रमा कार्यरत इन्जिनियर सन्तोष पाण्डे, इलेक्ट्रिक सुपरभाइजर मीनराज मोक्तान, चौकीदार श्यामबहादुर थापामगर, चौकीदार तिलकबहादुर थापामगर र नेपाल विद्युत् प्राधिकरणका कर्मचारी लाक्पा तामाङको शव फेला परेको हो।

बुधबार दिउँसो केन्द्रको सुरुङको बाहिरी भागबाट करिब १५० मिटरभित्र रहेको ‘कन्ट्रोल रुम’ क्षेत्रमा उनीहरूको शव भेटिएको थियो। शव नेपाली सेनाको हेलिकप्टरबाट नुवाकोट लगिएपछि पहिचान गरी परिवारजनलाई हस्तान्तरण गरिएको महर्जनले बताए।

उद्धार कार्यका लागि नेपाली सेनाको बाहिनीपतिको कमाण्डमा भारतीय सेना, सशस्त्र प्रहरी बल तथा नेपाल विद्युत् प्राधिकरणका कर्मचारीसमेत परिचालन गरिएको थियो।

महर्जनका अनुसार भोटेकोशी नदीको सतहबाट करिब २० मिटर उचाइमा रहेको सुरुङभन्दा करिब ८५ मिटर माथिसम्म बाढी पुगेको थियो। बाढीका कारण सुरुङ पुरिनुका साथै ११ मेगावाट क्षमताका दुईवटा टर्बाइनसहित जलविद्युत् केन्द्रका सम्पूर्ण संरचनामा ठूलो क्षति पुगेको छ।

यसैबीच, रसुवाका प्रमुख जिल्ला अधिकारी कमलप्रसाद पाण्डेले खोज तथा उद्धारसँगै राहत वितरणको काम जारी रहेको जानकारी दिएका छन्।

उनका अनुसार बाढीबाट भएको क्षतिको विवरण संकलन गर्न एक महिनाको समय दिएर २५ सदस्यीय समिति गठन गरिएको छ। समितिलाई आवश्यक कार्यादेशसमेत दिइएको छ।

बाढी प्रभावित क्षेत्रमा आवतजावत सहज बनाउन नदीमाथि तुइन तथा फड्के निर्माण गरिएको प्रशासनले जनाएको छ।

बाढीपछि हैजा तथा अन्य विपद्जन्य महामारी फैलिन सक्ने जोखिमलाई ध्यानमा राख्दै आवश्यक औषधि र स्वास्थ्य जनशक्तिको व्यवस्था गरिएको पनि पाण्डेले बताए।