रसुवा । भोटेकोशी बाढीपछि क्षतिग्रस्त त्रिशूली हाइड्रो परियोजना–१ को टनेलमा थप ६ शव फेला परेका छन्।

नेपाली सेनाको संयुक्त उद्धार टोलीले अडिट–३ टनेलमा ती शव फेला पारेको हो।

सेनाका अनुसार ढलानका लागि बुनिएको डन्डीको जालीभित्र शवहरू अल्झिएको अवस्थामा भेटिएका थिए। ग्राइन्डर, ग्यास कटर र रोटरी रेस्क्यु उपकरण प्रयोग गरेर शव बाहिर निकालिएको सेनाले जनाएको छ।

टनेलभित्र हिलोले पुरिएको अवस्थामा थप शवजस्तो आकृति पनि देखिएको छ। त्यस क्षेत्रमा खोजी कार्य जारी रहेको जङ्गी अड्डाले जनाएको छ।

भोटेकोशी बाढीपछि त्रिशूली नदीको बहाव बढ्दा परियोजनामा ठूलो क्षति पुगेको थियो। उद्धार टोलीले जोखिम मोलेर टनेलभित्र खोजी गरिरहेको छ।