काठमाडौं । साताको अन्तिम कारोबार दिन शुक्रबार सेयर बजारमा दोहोरो अंकको वृद्धि भएको छ।

बिहीबारबाट सम्हालिएको बजारले शुक्रबार पनि बढ्ने क्रमलाई निरन्तरता दिएको हो। नेप्से परिसूचक २२.८५ अंकले बढेर २ हजार ६४७.२२ विन्दुमा पुगेको छ।

ठूला कम्पनीको कारोबार मापन गर्ने सेन्सेटिभ इन्डेक्स ५.३२ अंकले बढेको छ। फ्लोट इन्डेक्स १.८७ अंक र सेन्सेटिभ फ्लोट इन्डेक्स १.९० अंकले उकालो लागेका छन्।

बजार बढेसँगै कारोबार रकममा पनि सुधार देखिएको छ। बिहीबार ५ अर्ब ४९ करोड रुपैयाँको कारोबार भएकोमा शुक्रबार ६ अर्ब ७४ करोड ५६ लाख रुपैयाँभन्दा बढीको कारोबार भयो।

शुक्रबार ३४५ कम्पनीका २ करोड १२ लाख ७२ हजार कित्ता सेयर किनबेच भएका छन्। कुल ६४ हजार ७२ पटक कारोबार भएको हो।

कारोबारमा आएका १३ उपसमूहमध्ये ११ वटा बढेका छन्। दुईवटा उपसमूह घटेका छन्।

बैंकिङ उपसमूह सबैभन्दा बढी उकालो लाग्ने प्रमुख उपसमूहमध्ये रह्यो। यसको परिसूचक १.५९ प्रतिशत बढेको छ।

जीवन बीमा उपसमूह पनि करिब १.५ प्रतिशतले बढेको छ। वित्त र अन्य उपसमूह भने सामान्य अंकले घटेका छन्।

शुक्रबार स्नो रिभर्स लिमिटेडको सेयर मूल्य १३.६६ प्रतिशतले बढेको छ।

इन्फिनिटी लघुवित्त वित्तीय संस्थाको सेयर मूल्य करिब १० प्रतिशत र मैलुङ खोला जलविद्युत कम्पनीको करिब ९ प्रतिशत बढेको छ।

यता हाथवे इन्भेष्टमेन्टको सेयर मूल्य १५ प्रतिशतले घटेको छ।

कारोबार रकमका आधारमा कुमारी बैंक अगाडि रह्यो। बैंकको ३२ करोड १३ लाख रुपैयाँ बराबरको सेयर कारोबार भएको छ।

लक्ष्मी सनराइज बैंकको २७ करोड रुपैयाँभन्दा बढी र ग्लोबल आइएमई बैंकको २३ करोड रुपैयाँभन्दा बढीको सेयर कारोबार भएको छ।