काठमाडौं । प्रधानमन्त्री वालेन्द्र शाह(बालेन)ले जेनजी उमेर समूहका सांसदसँग गरेको छलफलप्रति राष्ट्रिय स्वतन्त्र पार्टी (रास्वपा)की सांसद अफ्साना बानुले प्रश्न उठाएकी छन्।

प्रधानमन्त्री शाहले सिंहदरबारमा जेनजी उमेर समूहका सांसदसँग नवीनतम प्रविधि, डिजिटल सुशासन, युवा स्वरोजगार र स्टार्टअप नीतिबारे छलफल गरेका थिए।

त्यसक्रममा प्राविधिक शिक्षा, सर्वसुलभ स्वास्थ्य सेवा र वातावरणीय सन्तुलनसहितको दिगो विकासका विषयमा पनि छलफल भएको थियो।

तर, जेनजी आन्दोलनबाट उदाएकी सांसद बानुले उमेरका आधारमा मात्रै छलफल सीमित गर्न नहुने बताएकी छन्।

उनले सुरुदेखि नै जेनजीका माग र मुद्दा उठाउँदै आएका सांसदसँग पनि छलफल गर्न प्रधानमन्त्रीलाई आग्रह गरेकी छन्।

बानुले सामाजिक सञ्जालमार्फत प्रधानमन्त्रीलाई प्रश्न गर्दै भनेकी छन्, ‘जेनजीका माग मुद्दा सम्बोधन गर्नका लागि जेनजी उमेर समूहका सांसदहरू चाहिने हो कि पहिलेदेखि नै निरन्तर जेनजीका माग मुद्दा बोकेका सांसदहरूसँग बैठक बस्नुपर्ने हो प्रधानमन्त्रीज्यू ?’

उनको यो अभिव्यक्तिले प्रधानमन्त्रीको जेनजी सांसदसँगको छलफलको दायरालाई लिएर रास्वपाभित्रै प्रश्न उठेको देखिएको छ।