काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले दशैं–तिहारपछि सरकारविरुद्ध आन्दोलनको तयारी भइरहेको बताएका छन्।

अखिल नेपाल किसान महासंघको केन्द्रीय समितिको पूर्ण बैठकलाई सम्बोधन गर्दै प्रचण्डले सरकारप्रति जनआक्रोश बढ्दै गएको दाबी गरे।

उनका अनुसार प्रतिपक्षी दलहरूबीच सदनभित्र सहकार्य भइरहेको छ। सरकारविरुद्ध सडकमा पनि संयुक्त मोर्चा बनाउने तयारी भइरहेको उनले बताए।

‘हामी बिस्तारै सदनभित्र सबै प्रतिपक्षहरूलाई एक ठाउँमा पारेका छौँ। त्यहाँ संयुक्त रूपले आवाज उठाउँछौँ,’ प्रचण्डले भने।

उनले सरकारमाथि सुकुम्बासी, मजदुर, किसान, विद्यार्थी, बुद्धिजीवी र ट्रेड युनियनसँग आबद्ध समूहलाई दमन गरेको आरोप लगाए।

‘त्यसका विरुद्ध बृहत् संयुक्त मोर्चा बनाएर आन्दोलनमा जानुपर्ने आवश्यकता छ। हामी त्यसको पनि तयारीमा छौँ,’ उनले भने।

प्रचण्डले विभिन्न राजनीतिक दल, बुद्धिजीवी र नागरिक समाजसँग लगातार छलफल भइरहेको पनि बताए।

ठूला चाडपर्व नजिकिँदै गएको भन्दै प्रचण्डले चाडपर्वकै बीचमा आन्दोलनको तयारी अघि बढाउने बताए।

‘चाडपर्वको यो अवधिभित्र पनि हामीले तयारीका कामलाई अगाडि बढाउँछौँ,’ उनले भने, ‘चाडपर्वपछिको देशको परिस्थिति हेरेर प्रतिक्रान्तिकारी षड्यन्त्रका विरुद्ध प्रतिवाद र एउटा नयाँ आन्दोलन सृष्टि गर्नुछ।’

उनले आन्दोलनका लागि सबै पक्षलाई समेट्नुपर्नेमा जोड दिए। त्यसका लागि जिम्मेवारीपूर्वक र फराकिलो सोचका साथ अघि बढ्नुपर्ने उनको भनाइ थियो।