काठमाडौं । नेकपा एमालेको केन्द्रीय कमिटी बैठक रामबाग भवन ललितपुरमा जारी छ। बैठकले नौवटा एजेन्डा तय गरेको छ। तर विगत छ महिनादेखि एमालेमा उठ्दै आएको चुनावी समिक्षा तथा पार्टी पुनर्गठनको बहस भने नउठ्ने भएको छ। 

आज सुरु भएको बैठकमा एमाले अध्यक्ष केपी शर्मा ओलीले पार्टीभित्र उठिरहेको नेतृत्व परिवर्तन र पुनर्गठनको माग अस्वीकार गर्दै आफूले अध्यक्ष पद नछाड्ने स्पष्ट पारे। सोमबार ललितपुरमा सुरु भएको केन्द्रीय कमिटी बैठकमा प्रस्तुत राजनीतिक प्रतिवेदनमार्फत ओलीले निर्वाचनमा पार्टीले भोगेको पराजयको नैतिक जिम्मेवारी लिए पनि संकटका बेला नेतृत्व छाडेर नभाग्ने बताएका हुन्।

‘पार्टीको पुनर्निर्माण, लोकतन्त्रको रक्षा र राष्ट्रिय स्वाधीनताको नयाँ सङ्कल्प’ शीर्षकको प्रतिवेदनमा ओलीले चुनावी परिणामले पार्टीलाई गम्भीर धक्का पुगेको स्वीकार गरेका छन्। तर त्यसलाई आधार बनाएर नेतृत्व विस्थापन वा पार्टीलाई नेतृत्वविहीन बनाउने मागको औचित्य नरहेको उनको निष्कर्ष छ।

ओलीले बिरामी देखेर चिकित्सकले अस्पताल र बालीमा रोग लाग्दा किसानले खेत नछोडेजस्तै संकटका बेला नेतृत्वले पार्टीलाई अलपत्र पार्न नमिल्ने तर्क गरेका छन्। उनका अनुसार अहिलेको आवश्यकता एकअर्कामाथि आरोप लगाउने वा निराश हुने नभई कठोर आत्मसमीक्षा, तथ्यगत प्रतिवाद र संगठनात्मक पुनर्निर्माण हो।

प्रतिवेदनमा ओलीले ‘पुनर्गठन’को मागलाई समेत प्रश्न गरेका छन्। पार्टी इतिहासमा असाधारण र बाध्यात्मक परिस्थितिमा मात्र पुनर्गठन भएको उल्लेख गर्दै उनले अहिले अध्यक्ष विस्थापन गर्ने उद्देश्यले ‘बेमौसमी बाजा’ बजाइएको दाबी गरेका छन्। आफू पदको व्यक्तिगत प्रतिष्ठाका लागि नभई पार्टीको मनोबल, संगठनात्मक स्थिरता र सुरक्षित राजनीतिक संक्रमणका लागि उभिएको उनको भनाइ छ।

पुस्तान्तरणको बहसलाई पनि ओलीले फरक ढंगले व्याख्या गरेका छन्। आकस्मिक रूपमा पद खाली गर्नु नेतृत्व हस्तान्तरण नभएको भन्दै उनले संस्थागत तयारीबिनाको हतारोले पार्टीमा रिक्तता निम्त्याउन सक्ने बताए। एमालेको पुरानो नेतृत्वलाई ‘जरा’ र नयाँ पुस्तालाई ‘पालुवा’सँग तुलना गर्दै उनले उमेर कम हुनु मात्रै योग्यता र बढी हुनु अयोग्यता नभएको तर्क गरेका छन्।

बैठकमा सम्बोधन गर्दै ओलीले नेतृत्व परिवर्तनको माग गर्ने नेता–कार्यकर्तालाई पार्टीको विधान र महाधिवेशनका निर्णय मान्न आग्रह गरे। उनले महाधिवेशनका निष्कर्ष नमान्दै निर्वाचनमा आएको धक्कालाई बहाना बनाएर अराजकता सिर्जना गर्न नहुने बताए।

ओलीले पार्टी र नेतृत्वविरुद्ध उठ्ने स्वस्थ आलोचनालाई स्वीकार गर्ने तर स्वास्थ्य, उमेर र विगतको संघर्षलाई जोडेर हुने व्यक्तिगत आलोचनालाई अस्वीकार गरेका छन्। राष्ट्रिय स्वाधीनताप्रतिको अडानलाई अहंकार, स्पष्ट अभिव्यक्तिलाई तानाशाही र आत्मविश्वासलाई घमण्डका रूपमा प्रस्तुत गर्नु उचित नभएको उनको भनाइ छ।

बैठकका लागि केन्द्रीय कमिटीमा मनोनयन, विभाग, पोलिटब्युरो, स्थायी कमिटी, सल्लाहकार परिषद्, ज्येष्ठ कम्युनिस्ट मञ्च र अनुशासन आयोग गठनलगायत नौ एजेन्डा तय गरिएको छ। बैठकमा समसामयिक राजनीतिक विषयमा समेत छलफल हुनेछ।

प्रतिवेदनमा ओलीले गत भदौ २३ र २४ गतेको आन्दोलन, सरकारमाथि भएका कारबाही र आफूविरुद्धको कानुनी प्रक्रियाबारे पनि धारणा राखेका छन्। उनले घटनाको निष्पक्ष छानबिन हुनुपर्ने तर त्यसलाई राजनीतिक सफायाको माध्यम बनाउन नहुने बताएका छन्।

आगामी निर्वाचनको तयारी र संविधान तथा लोकतान्त्रिक प्रणालीको रक्षा एमालेका प्रमुख कार्यभार रहेको उल्लेख गर्दै ओलीले पार्टी पुनर्निर्माणका लागि विभिन्न कार्यक्रम अघि सारेका छन्। निर्वाचनमा पराजय भए पनि पार्टीको संगठनात्मक आधार समाप्त नभएको बताउँदै उनले त्यसलाई आत्मसमीक्षा र पुनर्निर्माणमार्फत नयाँ राजनीतिक आधारमा रूपान्तरण गर्ने बताएका छन्।