काठमाडाै‌‌‌‌‌‍ । रौतहटको गढीमाई नगरपालिका-७ धरमपुरमा ट्याक्टरको ठक्करबाट ६ वर्षीय बालकको मृत्यु भएको छ।

बुधबार बिहान करिब ९ः१५ बजे धरमपुरबाट पौराहीतर्फ जाँदै गरेको ना.६ त ८४९२ नम्बरको ट्याक्टरले आफ्नै घरअगाडि सडकमा खेलिरहेका स्थानीय छोटेलाल यादवका ६ वर्षीय छोरा रितिक यादवलाई ठक्कर दिएको थियो।

ट्याक्टरको ठक्करबाट टाउकोमा गम्भीर चोट लागेका बालकलाई उपचारका लागि बेटर नेपाल अस्पताल, गरुडा लगिएको थियो। उपचारकै क्रममा बिहान १०ः३० बजे चिकित्सकले उनलाई मृत घोषणा गरेका थिए।

घटनाबारे अस्पतालमार्फत प्रहरी चौकी धरमपुरमा जानकारी प्राप्त भएपछि प्रहरी सहायक निरीक्षक कृष्णमोहनप्रसाद गुप्ताको कमाण्डमा तीन जनाको प्रहरी टोली घटनास्थल पुगेको थियो।

प्रहरीका अनुसार दुर्घटनापछि ट्याक्टर घटनास्थलमै छाडेर चालक फरार भएका छन्। चालकको नामथर र वतन खुल्न नसकेको र उनको खोजी भइरहेको प्रहरीले जनाएको छ।

साथै, थप अनुसन्धान तथा कानुनी प्रक्रियाका लागि इलाका प्रहरी कार्यालय गरुडाबाट प्रहरी निरीक्षक प्रमोद खड्काको कमाण्डमा SOCO सहितको टोली घटनास्थलमा खटिएको छ।

प्रहरीले ट्याक्टरधनी स्थानीय सञ्जीव यादवलाई नियन्त्रणमा लिएको छ भने दुर्घटनामा संलग्न ट्याक्टरलाई प्रहरी चौकी धरमपुरमा ल्याउने प्रक्रिया भइरहेको प्रहरीले जनाएको छ।