काठमाडौं । गायिका मेलिना राई बेलायतमा गुञ्जिने भएकी छन् । नेपाली संगीतप्रेमीलाई लक्षित गर्दै आगामी अक्टोबर ९ मा एल्डरसटस्थित एम्पायर हलमा आयोजना हुने ‘सुम्निमा साँझ’मा मेलिनाले प्रस्तुति दिने भएकी हुन् ।

कार्यक्रममा ‘द भ्वाइस अफ नेपाल सिजन ६’ का उपविजेता रोशन राईसँगै प्रताप दास, पार्वती राई, सबिना योङहाङ, जानुका राई, अप्सरा घिमिरे र अभिनेत्री रजनी गुरुङलगायतले प्रस्तुति दिनेछन् ।

सुम्निमा इभेन्ट, लुङ्टो क्रिएसन, इफ्लेक्स इन्टरटेनमेन्ट र इनास यूकेको संयुक्त आयोजनामा हुने कार्यक्रम सुशील नेपालले सञ्चालन गर्नेछन् । नेपालबाट कलाकारको समन्वय इफ्लेक्स इन्टरटेनमेन्टका प्रोप्राइटर अजेश पौडेलले गरिरहेका छन् । बेलायतमा व्यवसाय गर्दै आएका सचिन बुढाथोकी र रमेश श्रेष्ठ पनि आयोजनामा जोडिएका छन् ।

साथै, कार्यक्रमलाई मनोरञ्जनमा मात्र सीमित नराखी सामाजिक कामसँग पनि जोडिएको आयोजकले जनाएको छ । ‘सुम्निमा साँझ’बाट उठेको रकमको ५ प्रतिशत भोटेकोशी र रसुवा बाढीपीडित परिवारलाई सहयोग गरिने बताइएको छ ।