काठमाडौं । नेकपा एमालेका सांसद क्षितिज थेबेले मकवानपुरको हेटौंडा र मनहरी क्षेत्रका मध्यवर्ती क्षेत्रका बासिन्दाले भोग्दै आएका समस्याप्रति सरकारको ध्यानाकर्षण गराएका छन्।

शुक्रबार प्रतिनिधिसभाको बैठकमा विशेष समय लिएर बोल्दै उनले वन्यजन्तुको त्राससँगै विकास निर्माणमा लगाइएको प्रतिबन्धका कारण बफर जोनका स्थानीयको जनजीवन कठिन बन्दै गएको बताए।

मध्यवर्ती क्षेत्र संघर्ष समितिका प्रतिनिधिसँगको भेटपछि आफूले त्यहाँको अवस्था बुझेको उल्लेख गर्दै थेबेले स्थानीयले सामान्य घर मर्मत गर्नेदेखि जग्गामा साना संरचना निर्माण गर्नेसम्ममा अवरोध भोग्नुपरेको बताए।

उनका अनुसार वन्यजन्तुको जोखिमका कारण साँझ परेपछि आवतजावत गर्नसमेत स्थानीय डराउनुपर्ने अवस्था छ। जंगली जनावरले घरपालुवा पशु चौपाया मार्ने तथा सडकमा वन्यजन्तुका कारण हुने दुर्घटनाबाट स्थानीयले ज्यान गुमाउने गरेको उनले बताए।

विकास निर्माण र प्राकृतिक स्रोतको उपयोगमा समेत मध्यवर्ती क्षेत्रका बासिन्दाले सहज अधिकार नपाएको उनको भनाइ थियो।

थेबेले यो विषय पटकपटक संसद्मा उठ्दै आए पनि अहिलेसम्म ठोस समाधान ननिस्किएको भन्दै असन्तुष्टि जनाए।

उनले स्थानीयका समस्या सम्बोधन गर्न मध्यवर्ती क्षेत्रसम्बन्धी नीति पुनरावलोकन गर्न र तत्काल निकास दिन सरकारसँग माग गरेका छन्।