काठमाडौं । नेकपा एमालेका संसदीय दलका नेता रामबहादुर थापा ‘बादल’ले २१ फागुनको प्रतिनिधिसभा निर्वाचनको परिणाम स्वीकार गरे पनि एमालेले राजनीतिक रूपमा आत्मसमर्पण नगरेको बताएका छन्।

संसद्मा बोल्दै थापाले निर्वाचनमा भएको पराजयलाई कानुनी रूपमा स्वीकार गर्नु र राजनीतिक अडान त्याग्नु फरक विषय भएको बताए।

‘पराजयको स्वीकारोक्ति आत्मसमर्पण होइन,’ उनले भने, ‘म यो संसदमा एमालेको राजनीतिक अडान पुनः स्पष्ट गर्न चाहन्छु।’

थापाले वर्तमान सरकारको कार्यशैलीप्रति समेत तीव्र असन्तुष्टि जनाए। प्रधानमन्त्री बालेन शाह नेतृत्वको सरकारलाई उनले ‘फासीवादी’को संज्ञा दिँदै सरकार गठन भएको करिब ६ महिना पुगेको दाबी गरे।

एमालेले निर्वाचनको परिणामबाट प्राप्त संसदीय अवस्थालाई स्वीकार गर्दै संसद्मा आफ्नो राजनीतिक अडान र प्रतिपक्षी भूमिका प्रभावकारी बनाउने संकेत गर्दै आएको छ। २१ फागुनको निर्वाचनपछि थापा एमालेको समानुपातिकतर्फबाट प्रतिनिधिसभामा आएका हुन् र चैत १८ गते उनी संसदीय दलको नेतामा निर्विरोध चयन भएका थिए।

सरकारमाथि आलोचना गर्दै थापाले वर्तमान राजनीतिक अवस्थाप्रति एमालेको असहमति संसद्मार्फत निरन्तर उठाइरहने संकेत गरेका छन्।