काठमाडौं । चलचित्र ‘१२ गाउँ २’ को नयाँ गीत ‘लालीगुराँस’ सार्वजनिक गरिएको छ । गीतमा शिव परियार र सारोही कुमारको स्वर रहेको छ भने शब्द तथा संगीत युग भुसालको रहेको छ ।

प्रेम भावमा आधारित गीतमा प्रकृतिलाई बिम्बका रूपमा प्रयोग गर्दै प्रेमी-प्रेमिकाबीचको समर्पणलाई प्रस्तुत गरिएको छ । एकअर्काप्रति आकर्षित युवक र युवतीको प्रेम तथा समर्पणलाई गीतको भावमा समेटिएको छ ।

त्यस्तै, गीतको भिडियोमा चलचित्रका मुख्य कलाकार समीर भट्ट र कृशु शाहीको नृत्य देख्न सकिन्छ । भिडियोको कोरियोग्राफी रामजी लामिछानेले गरेका हुन् ।

बिराज भट्टको निर्देशनमा बनेको ‘१२ गाउँ २’ असोज ३० गते फूलपातीका दिनदेखि प्रदर्शनमा आउने तयारीमा छ ।

चलचित्रमा समीर भट्ट र कृशु शाहीसँगै निर्देशक बिराज भट्ट, अनुपविक्रम शाही, प्रकाश शाह, सुनील पोखरेल, कालु राना, खुसी कार्की, पुष्कर भट्ट, राज हमाल, प्रजल दुलाल, कमल देवकोटा, साहित सिंह ठकुरी, अर्जुन आचार्य, शिवा सिंह, नेहा आर शाह, पूर्णबहादुर गन्धर्व र सुदीर श्रेष्ठलगायत कलाकारको अभिनय रहेको छ ।

यसै चलचित्रमार्फत कृशु शाही र वर्षा इटनीले नेपाली चलचित्रमा डेब्यु गर्दैछन् । बिराज भट्ट फिल्म प्रोडक्सन प्रालिको प्रस्तुति रहेको चलचित्रको कथा सन्तोष सरकारले लेखेका हुन् भने छायांकन महेश पौडेलको रहेको छ ।

चलचित्रमा युग भुसाल र डीपी खनालको संगीत, बन्दे प्रसादको सम्पादन तथा रामजी लामिछाने र सियोन श्रेष्ठको नृत्य निर्देशन रहेको छ । द्वन्द्व निर्देशन सिल्भा र शंकर महर्जनले गरेका छन् ।

साथै, चलचित्रको वितरण काफिया फिल्मस् र कुबेर सिनेमाले गर्नेछन् ।