काठमाडौं । नेपाली कांग्रेसको १५औँ महाधिवेशनको उद्घाटन समारोहमा नेकपा (एमाले)का अध्यक्ष केपी शर्मा ओली सहभागी नहुने भएका छन् ।

ओलीको सट्टा एमालेका महासचिव शंकर पोखरेल महाधिवेशनमा सहभागी भएर शुभकामना दिने तय भएको एमाले प्रचार विभाग प्रमुख नीरज आचार्यले जानकारी दिए ।

कांग्रेसको १५औँ महाधिवेशन आज आइतबार दिउँसो २ बजे काठमाडौंको खुलामञ्चमा उद्घाटन हुँदैछ ।

यसैबीच, नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ भने उद्घाटन समारोहमा सहभागी हुने भएका छन् । प्रचण्डको सचिवालयका अनुसार अहिलेसम्म उनी सहभागी हुने कार्यक्रम तय भएको छ । सचिवालयले आकस्मिक परिस्थिति नआए प्रचण्ड महाधिवेशनमा जाने जनाएको छ ।

कांग्रेसले महाधिवेशनको उद्घाटन समारोहमा शुभकामना दिन अधिकांश राजनीतिक दलका शीर्ष नेताहरूलाई निमन्त्रणा गरेको जनाएको छ ।