काठमाडौं । पाँचथरका गायक राजु तामाङ ‘द भ्वाइस अफ नेपाल’ सिजन–८ को ब्लाइन्ड अडिसनबाट छनोट भएका छन्। उनले गायक प्रमोद खरेलको गीत ‘लाग्छ तिमी सागर सरी’ गाएका थिए। उनको प्रस्तुतिबाट प्रभावित भएका खरेलले नै उनलाई आफ्नो टिममा छनोट गरे।

खरेलले गीतमा सास फेर्ने ठाउँमा समेत राम्रो प्रस्तुति दिएको र एक ठाउँमा नोट पनि राम्रो गरेको भन्दै राजुलाई छनोट गरेको बताए।

आफूले विगतमा सांगीतिक क्षेत्रमा अघि बढ्न गरेको संघर्षको कथा सुनाउँदै खरेलले आफ्नो एउटा ‘बज’ले राजुलाई हौसला दिन सक्ने बताए।

उनले भने, ‘हिजो मैले सांगितिक क्षेत्रमा अगाडि बढाइरहेको पाइलालाई कठिन हुँदै अगाडि बढेँ, तपाईंलाई पनि मेरो एउटा बजले लाइफमा धेरै हौसला दिन्छ र अगाडि बढ्न प्रेरित गर्न सक्छ भन्ने कनेक्सनले यो गीतले गराई दियो ।’

राजु पाँचथरको फिदिम नगरपालिका–४, जोरसालका बासिन्दा हुन्। सानैदेखि नाच्न रुचाउने उनी उमेर बढ्दै जाँदा लाज लाग्न थालेपछि गायनतर्फ मोडिएका थिए।

‘पाँचथरमा गीत संगीतप्रेमी धेरै छन्। माहोल पनि राम्रो छ। सानोमा डान्स गर्थेँ। विस्तारै उमेर बढ्दै जाँदा लाज लागेर डान्स गर्न छाडेँ,’ उनले भने।

राजुका अनुसार गीतसंगीतले दुःख र सुख दुवै अवस्थामा साथ दिन्छ। यसले मनोरञ्जन दिनुका साथै आफूलाई आनन्दसमेत दिने उनी बताउँछन्।