काठमाडौं । प्रतिनिधिसभा निर्वाचनमा धक्का बेहोरेपछि नेकपा एमाले आगामी स्थानीय तह निर्वाचनबाट राजनीतिक शक्ति फर्काउने तयारीमा जुटेको छ।

नेतृत्व परिवर्तनको बहसलाई थाती राख्दै अध्यक्ष केपी शर्मा ओलीकै नेतृत्वमा चुनावी अभियान अघि बढाउने र संगठनभित्रका कमजोरी सच्याएर जनमत फर्काउने एमालेको योजना छ ।

२०८२ फागुन २१ मा सम्पन्न प्रतिनिधिसभा निर्वाचनमा तेस्रो स्थानमा खुम्चिएपछि एमालेमाथि नेतृत्व र कार्यशैली सुधार्नुपर्ने दबाब परेको थियो । पार्टीभित्रै ओलीको राजीनामा र नेतृत्व पुनर्गठनको आवाज उठे पनि संस्थापन पक्षले अहिले नेतृत्व परिवर्तनभन्दा संगठन सुदृढीकरण र आन्तरिक एकतालाई प्राथमिकतामा राखेको छ ।

२०७९ को स्थानीय तह निर्वाचनमा एमालेले ७५३ पालिकामध्ये २०७ वटामा प्रमुख पद जितेको थियो । आगामी निर्वाचनमा उक्त परिणाम सुधार्ने लक्ष्यसहित पार्टीले दसैँ–तिहारलगायतका चाडपर्वपछि संगठनात्मक गतिविधि तीव्र बनाउने तयारी गरेको छ ।

एमाले प्रचार तथा प्रकाशन विभाग प्रमुख निरज आचार्यका अनुसार पार्टीले जनतासँग बिग्रिएको सम्बन्ध सुधार्ने, आन्तरिक एकता कायम गर्ने र वडा तथा पालिका अधिवेशनमार्फत युवालाई नेतृत्वमा ल्याउने रणनीति बनाएको छ । नयाँ पुस्तालाई पार्टीका कमिटीमा जोडेर उनीहरूलाई स्थानीय निर्वाचनमा उम्मेदवार बन्ने अवसर दिन खोजिएको उनको भनाइ छ ।

एमालेको केन्द्रीय कमिटीले संविधान र लोकतान्त्रिक प्रणालीको रक्षा तथा आगामी निर्वाचनको तयारीलाई प्रमुख कार्यभारका रूपमा अघि सारेको छ । पार्टीले प्रतिपक्षमा रहेर सरकारको विरोध मात्रै नगर्ने, आफ्ना कमजोरी सच्याउने, संगठन पुनर्निर्माण गर्ने र जनतामाझ नयाँ विश्वास स्थापित गर्ने नीति लिएको जनाएको छ ।

अध्यक्ष ओलीले आगामी निर्वाचनमा सफलता हासिल गर्न सिंगो पार्टी योजनाबद्ध रूपमा परिचालित हुनुपर्नेमा जोड दिएका छन् । निर्वाचनमा पार्टीलाई पराजित गर्ने षड्यन्त्र भइरहेको उनको दाबी छ । यद्यपि, चुनावी परिणाम सुधार्न नेतृत्वको निरन्तरता मात्रै पर्याप्त नहुने भएकाले जनतासँगको सम्बन्ध र संगठनात्मक कमजोरी सुधार्नुपर्ने चुनौती एमालेसामु छ ।

पार्टीभित्र एकताको सन्देश दिने प्रयासस्वरूप एमालेले स्थायी कमिटी गठन तथा केन्द्रीय कमिटीमा मनोनयनको काम अघि बढाएको छ । विद्या भण्डारीलाई वरिष्ठ नेताको जिम्मेवारी दिइएको छ भने अध्यक्ष ओलीसँग महाधिवेशनमा प्रतिस्पर्धा गरेका ईश्वर पोखरेललाई पनि स्थायी कमिटीमा समेटिएको छ । सबै धारका नेताहरूलाई पार्टी निर्माण र चुनावी अभियानमा जोडेर संगठनलाई एकढिक्का बनाउने संस्थापन पक्षको प्रयास छ ।

एमाले सचिव महेश बस्नेतका अनुसार बदलिँदो जनमत र युवाको राजनीतिक मनोविज्ञानलाई सम्बोधन नगरी निर्वाचनमा सफलता हासिल गर्न कठिन हुन्छ । त्यसैले संगठनलाई चलायमान र युवामैत्री बनाउने नीति अघि सारिएको उनले बताएका छन् ।

अर्का सचिव भानुभक्त ढकालले पनि स्थानीय तहमा नयाँ नेतृत्व विकास र जनसम्बन्ध विस्तारलाई पार्टीको प्राथमिकता रहेको बताएका छन् । उनका अनुसार मंसिर र पुसमा वडा तथा पालिका अधिवेशन गरेर तल्लो तहको नेतृत्व चयन गरिनेछ । त्यसपछि पालिका तथा वडाका नेतृत्व सहभागी हुने प्रदेशस्तरीय भेला आयोजना गरी चुनावी अभियानलाई थप सक्रिय बनाउने योजना छ ।

वडा र पालिका अधिवेशनबाट आउने नयाँ नेतृत्वको सुझाव र सिफारिसका आधारमा उम्मेदवार छनोट गर्ने एमालेको तयारी छ । चुनावी प्रचारमा अध्यक्ष ओलीसहित पार्टीका शीर्ष नेताहरूलाई परिचालन गरिने पनि ढकालले बताएका छन् ।

स्थानीय निर्वाचनमा एमालेले विगतका कमजोरी स्वीकार्ने, जनतासँगको सम्बन्ध पुनःस्थापित गर्ने र बदलिएको राजनीतिक परिस्थितिबारे मतदातालाई बुझाउने दाबी गरेको छ ।