काठमाडौं। सुदूरपश्चिम प्रदेश सरकारले ल्याएको बजेटप्रति असन्तुष्टि चुलिँदै जाँदा सुदूरपश्चिम प्रदेशसभामा एमालेभित्रको विवाद सतहमा आएको छ। बजेटप्रति असन्तुष्ट नेकपा एमालेका प्रदेशसभा सदस्य तथा पूर्वमन्त्री वीरबहादुर थापाले पदबाट राजीनामा दिएका छन्।

थापाले सभामुखसमक्ष राजीनामा बुझाए पनि अहिलेसम्म स्वीकृत भएको छैन। उनको राजीनामासँगै प्रदेश सरकारको बजेटप्रति एमालेभित्र रहेको असन्तुष्टि थप चर्चामा आएको छ। राजीनामा स्वीकृत नगर्न केन्द्रका नेताहरूले दबाब दिइरहेको बताइएको छ।

मंगलबार प्रदेशसभामा बजेटमाथि छलफल भइरहेका बेला थापा आफ्नो धारणा राख्न चाहन्थे। त्यसका लागि उनले एमाले संसदीय दलका नेता राजेन्द्र रावलसँग बोल्ने समय मागेको बताइएको छ। तर, रावलले उनलाई बोल्न समय उपलब्ध नगराएको जनाइएको छ।

बजेटप्रति असन्तुष्टि राखिरहेका प्रदेशसभा सदस्यले आफ्नै दलको संसदीय नेतृत्वबाट बोल्ने अवसर नपाएको भनिएपछि एमालेभित्रको असहजता थप उजागर भएको छ। थापाको राजीनामा प्रकरणले प्रदेशसभामा बजेटलाई लिएर देखिएको असन्तुष्टि व्यक्तिगत असहमति मात्र नभई दलभित्रकै विवादसँग जोडिएको संकेत गरेको छ।

यसैबीच, सुदूरपश्चिम प्रदेशसभाले मंगलबार चालु आर्थिक वर्षको बजेट पारित गरेको छ। बजेट पारित भइसके पनि त्यसलाई लिएर उठेको असन्तुष्टि र थापाको राजीनामाले प्रदेशको राजनीतिक वृत्तमा नयाँ प्रश्न खडा गरेको छ।