काठमाडौं । बंगालको खाडीमा विकसित भइरहेको चक्रवाती प्रणालीका कारण आगामी साता नेपालमा भारी वर्षा हुने सम्भावना देखिएको छ। आगामी बुधबारदेखि आइतबारसम्म देशका केही स्थानमा २०० मिलिमिटरभन्दा बढी वर्षा हुन सक्ने अनुमान गरिएको छ। सम्भावित प्रतिकूल मौसमले कृषि, पर्यटन र जनजीवनमा असर पार्न सक्ने भएकाले सतर्कता अपनाउन आवश्यक देखिएको छ।

मौसम पूर्वानुमानअनुसार उक्त अवधिमा हुने वर्षाको मात्रा, समय र प्रभावित क्षेत्र फरक हुन सक्छ। २०० मिलिमिटर वर्षा हुने सम्भावनाको अर्थ एकै दिनमा त्यति पानी पर्छ भन्ने होइन। वर्षाको प्रभाव स्थानीय मौसम र भौगोलिक अवस्थाअनुसार फरक पर्नेछ।

अहिले धान काट्ने समय भएकाले लगातारको वर्षाले कृषि क्षेत्रमा असर पार्न सक्छ। त्यस्तै, हिमाली क्षेत्रमा पर्यटक तथा पदयात्रीको आवागमन भइरहने भएकाले भारी हिमपात, अत्यधिक चिसो र हिमपहिरोको जोखिमसमेत बढ्न सक्छ। त्यसैले मौसमको अवस्था र आधिकारिक सूचनालाई ध्यानमा राखेर मात्रै यात्रा योजना बनाउन आवश्यक छ।

अहिलेको मौसमी अवस्थाले सन् २०१४ अक्टोबर १४ मा नेपालमा आएको विनाशकारी हिमआँधीको घटनालाई समेत स्मरण गराएको छ। उक्त घटनामा अन्नपूर्ण आसपासका पदयात्रा क्षेत्रसहित ४३ जनाले ज्यान गुमाएका थिए। वर्तमान पूर्वानुमानमा त्यसबेलाका केही मौसमी सूचकसँग समानता देखिए पनि यसपटक त्यस्तै घटना दोहोरिने निश्चित भने छैन।

त्यस्तै, जल तथा मौसम विज्ञान विभागका अनुसार शुक्रबार बिहान ५ः४५ बजे बंगालको खाडीको पूर्वमध्य भाग तथा आसपासको दक्षिणपूर्वी क्षेत्रमा न्यून चापीय क्षेत्र विकसित भएको थियो। उक्त प्रणाली शक्तिशाली बन्दै सोमबारसम्म चक्रवाती आँधीमा परिणत हुन सक्ने सम्भावना छ।

चक्रवाती आँधी बनेपछि प्रणाली पश्चिम-उत्तरपश्चिम दिशातर्फ अघि बढ्दै भारतको उत्तरी आन्ध्र प्रदेश र दक्षिणी ओडिशाको आसपासको तटीय क्षेत्रमा प्रवेश गर्न सक्ने अनुमान गरिएको छ। त्यसपछि यसको प्रभावले नेपालमा आगामी बुधबार अक्टोबर २८ देखि आइतबार नोभेम्बर १ सम्म मौसम प्रभावित हुन सक्ने विभागले जनाएको छ।

बंगालको खाडीबाट आउने न्यून चापीय प्रणाली नेपालतर्फ नजिकिँदै माथिल्लो वायुमण्डलको न्यून चापीय प्रणालीसँग अन्तरक्रिया गरेमा वर्षा थप तीव्र हुन सक्छ। यद्यपि, नेपालमा कति वर्षा हुन्छ, कुन क्षेत्रमा बढी प्रभाव पर्छ र जोखिमको स्तर कस्तो रहन्छ भन्ने विषय अहिले नै निश्चित भइसकेको छैन।

सम्भावित प्रतिकूल मौसमलाई ध्यानमा राख्दै सम्बन्धित निकाय तथा सर्वसाधारणले आवश्यक सतर्कता अपनाउनुपर्ने देखिएको छ। साथै, आगामी एक सातामा देशका विभिन्न भागमा अधिकतम र न्यूनतम तापक्रमसमेत सामान्य रूपमा घट्न सक्ने पूर्वानुमान गरिएको छ।