Author: nepalone

मोगादिशु । सोमालियाको अर्धस्वायत्त पुन्टल्याण्ड क्षेत्रको सरकारले अमेरिकी सेनाको कारबाहीमा इस्लामिक स्टेट (आइएस) समूहका ’प्रमुख व्यक्तिहरू’ मारिएका आइतबार बताएको छ ।

अमेरिकी राष्ट्रपति डोनल्ड ट्रम्पले शनिबार राति हवाई आक्रमणको घोषणा गर्दै ट्रुथ सोसल प्लेटफर्ममा आफूले सोमालियामा आइएसका वरिष्ठ आक्रमण योजनाकार र अन्य आतङ्ककारीमाथि सटीक सैन्य हवाई आक्रमणको आदेश दिएको बताएका थिए ।

सोमालियामा अलकायदासँग सम्बन्धित अल–शबाबको तुलनामा आइएसको उपस्थिति तुलनात्मक रूपमा कम छ, तर बढ्दो गतिविधिबारे विज्ञहरूले चेतावनी दिएका छन् ।

सोमालियाको उत्तरी क्षेत्रमा पन्टल्याण्ड डिफेन्स फोर्सेजले गत डिसेम्बरदेखि आइएसविरुद्ध अभियान सञ्चालन गरिरहेको छ । उक्त कट्टरपन्थी समूहले गोलिस पर्वतमा आफ्नो उपस्थिति स्थापित गरेको बताइएको छ ।

“हालैका हवाई आक्रमणले आइएसआइएसभित्रका प्रमुख व्यक्तिहरूलाई निष्प्रभावी बनाएको छ, जुन हाम्रो अभियानको दोस्रो चरणमा प्रवेश गर्दै गर्दा भएको महत्वपूर्ण प्रगति हो,” क्षेत्रीय सरकारले आइतबार आईएस समूहको वैकल्पिक नाम प्रयोग गर्दै भनेको छ।

उसले हवाई हमलामा अमेरिकी संलग्नतालाई ‘अमूल्य’ भनेको छ र ‘हार्दिक कृतज्ञता’ व्यक्त गरेको छ तर वक्तव्यमा आक्रमणको बारेमा थप विवरण दिइएको छैन।

मोगादिशुमा सोमालीसरकारले जारी गरेको वक्तव्यमा बारी क्षेत्रमा सोमाली र अमेरिकी सरकारहरूले संयुक्त रूपमा आइएसविरूद्धको कारबाहीको समन्वय गरेको र यसले ‘आईएसका वरिष्ठ नेताहरू’ लाई लक्षित गरेको उल्लेख गरिएको छ।

राष्ट्रपति हसन शेख मोहमुदलाई शनिबार राति भएको आक्रमणका बारेमा जानकारी गराइएको राष्ट्रपतिको कार्यालयले जनाएको छ।

उनले एक्समा आइतवार एक पोस्टमा आक्रमणपछि वासिङ्टनप्रति गहिरो कृतज्ञता व्यक्त गरेका छन् ।

उनले भने, “आतङ्कवादले पुन्टल्याण्ड राज्य र सम्पूर्ण सोमालियामा न त साथी भेट्टाउनेछ, न त आश्रयका लागि कुनै ठाउँ नै पाउनेछ ।”

अमेरिकी रक्षामन्त्री पीट हेगसेथले हवाई आक्रमणमा धेरै लडाकू मारिएको प्रारम्भिक अनुमान गरिएको बताए । उनले आक्रमणमा कुनै पनि सर्वसाधारणलाई क्षति नपुगेको बताए ।

जेरुसेलम । इजरायली प्रधानमन्त्री बेन्जामिन नेतन्याहूले गाजा युद्धविरामको दोस्रो चरणको वार्ताका सम्बन्धमा सोमबार अमेरिकी अधिकारीहरूसँग छलफल गर्ने भएको छ ।

प्रधानमन्त्री नेतन्याहूले आइतबार अमेरिकी राष्ट्रपतिका मध्यपूर्वदूत स्टिभ विटकोफसँग कुराकानी गरेको र अमेरिकी अधिकारीहरूसँग ‘वासिङ्टनमा हुने भेटवार्तामा थप छलफल गर्ने’ सहमति जनाएका छन्।

हमास र इजरायलका मध्यस्थकर्ता र प्रतिनिधिमण्डलबीच भएको ४२ दिने पहिलो चरण अर्को महिना समाप्त हुनेछ भने दोस्रो चरणको औपचारिक वार्ताको मिति तय गरिएको छैन ।

विटकोफले इजरायलका प्रधानमन्त्री नेतन्याहूसँग दोस्रो चरणको वार्ता अघि बढाउनका लागि छलफल गर्नुअघि प्रमुख मध्यस्थकर्ता कतार र इजिप्टसँग कुरा गर्ने बताइएको छ ।

दोस्रो चरणमा बाँकी रहेका बन्दीको रिहाई र युद्धको स्थायी अन्त्यका बारेमा थप छलफल हुने अपेक्षा गरिएको छ । यसको नेतन्याहू सरकारका धेरै सदस्यहरूले विरोध गरेका छन् ।

इजरायलबाट १५ महिनाभन्दा बढी समयदेखि बन्धक बनाइएका ३३ व्यक्तिको रिहाइका बदलामा इजरायलमा बन्दी रहेका करिब एक हजार ९०० प्यालेष्टिनीको रिहाइको लागि जनवरी १९ मा इजरायलसँगको युद्धविराम सम्झौताअन्तर्गत हमास र उसको सहयोगी इस्लामिक जिहादले अहिलेसम्म १८ जना बन्धकलाई रेडक्रसको अन्तर्राष्ट्रिय समितिलाई सुम्पेका छन्

हमास स्रोतका अनुसार आगामी शनिबार बन्धकको पाँचौं समूह र प्यालेष्टिनी कैदीबीच आदानप्रदान हुनेछ ।

युद्धविरामको छ हप्ताको पहिलो चरण ३३ बन्धक र एक हजार ९०० प्यालेष्टिनीको आदानप्रदान कसरी हुन्छ भन्ने कुराले दोस्रो चरणको सम्झौताको वातावरण बन्नेछ । 

बेइजिङ । चीनले आइतबार अमेरिकी राष्ट्रपति डोनाल्ड ट्रम्पद्वारा बेइजिङमा लगाइएको नयाँ करको ‘दृढतापूर्वक विरोध’ गरेको र ‘आफ्नो अधिकार र चासोको दृढतापूर्वक रक्षा गर्न सम्बन्धित जवाबी कदम’ चाल्ने वाचा गरेको बताएको छ ।

शनिबार प्रमुख व्यापार साझेदारहरू विरुद्ध व्यापक कदमहरू सार्वजनिक गर्दै ट्रम्पले चिनियाँ आयातमा विद्यमान शुल्कमा थप १० प्रतिशत कर लगाउने घोषणा गरेका थिए ।

आइतबार एक विज्ञप्तिमा चीनको वाणिज्य मन्त्रालयले वासिङ्टनको ‘गलत अभ्यासहरू’ को आलोचना गर्दै बेइजिङ ‘यसप्रति अत्यन्त असन्तुष्ट र दृढतापूर्वक विरोध गर्दछ’ भनेको छ ।

मन्त्रालयले बेइजिङले विश्व व्यापार सङ्गठन (डब्लुटिओ) मा मुद्दा दायर गर्ने र ‘संयुक्त राज्य अमेरिकाले एकपक्षीय रूपमा लगाएको करले विश्व व्यापार सङ्गठनका नियमहरूको गम्भीर उल्लङ्घन गर्छ’ भनी तर्क गरेको बताएको छ ।

“यी शुल्कहरू अमेरिकाको आफ्नै समस्याहरू समाधान गर्न मात्र असहयोगी नभई सामान्य आर्थिक र व्यापारिक सहयोगलाई पनि कमजोर बनाउँछन्”, मन्त्रालयले भनेको छ, “संयुक्त राज्य अमेरिकाले अन्य देशहरूलाई हरेक पालोमा कर लगाउने धम्की दिनुको सट्टा फेन्टानिल जस्ता आफ्नै मुद्दाहरूलाई वस्तुनिष्ठ र तर्कसङ्गत रूपमा हेर्ने र व्यवहार गर्नेछ भन्ने चीनलाई आशा छ । ”

“बेइजिङले अमेरिकालाई आफ्नो गलत अभ्यासहरू सुधार गर्न, चीनलाई आधा बाटो भेट्न, आफ्ना समस्याहरूको सामना गर्न, स्पष्ट संवाद गर्न, सहयोगलाई बलियो बनाउन र समानता, आपसी लाभ र आपसी सम्मानको आधारमा मतभेदहरू व्यवस्थापन गर्न आग्रह गर्दछ”, विज्ञप्तिमा उल्लेख छ ।

“व्यापार युद्ध वा भन्सार युद्धमा कुनै विजेता हुँदैन”, विज्ञप्तिमा चीनको विदेश मन्त्रालयले भनेको छ, “थप भन्सार महसुल लगाउने अभ्यास रचनात्मक छैन र यसले लागू औषध नियन्त्रणमा भविष्यको द्विपक्षीय सहयोगलाई अनिवार्य रूपमा प्रभावित र क्षति पुर्याउनेछ ।”

बीबीसी । अमेरिकी राष्ट्रपति डोनल्ड ट्रम्पले आफ्ना देशमा उत्पादित सामग्रीहरूमा कर लगाएपछि मेक्सिकोकी राष्ट्रपति कलाउडीया सेनाबाउमले कडा भाषामा अमेरिकी निर्णयको प्रतिवाद गरेकी छन् ।

सामाजिक संजाल एक्समा लेख्दै उनले ह्वाइटहाउसको विज्ञप्तिले मेक्सिको सरकारको ‘अपमान’ गरेको बताएकी छन् । ट्रम्प प्रशासनले मेक्सिको सरकार र मेक्सिकोका लागुपदार्थ कारोबारी संस्थाहरूबीच ‘अमान्य किसिमको गठजोड’ रहेको आरोप लगाएका थिए ।

‘यदि त्यस्तो गठबन्धन अस्तित्वमा छ भने यस्ता आपराधिक समूहहरूलाई शक्तिशाली अस्त्रहरू विक्री गर्ने काम अमेरिकी बन्दुक उत्पादकहरूले गर्छन्,’ उनले लेखेकी छन् ।

मेक्सिकोले हालैका वर्षहरूमा त्यस्ता सङ्गठित गिरोहहरूलाई रोक्न गैरकानुनी ढङ्गले हुने हतियारको तस्करी रोक्न माग गर्दै आएको थियो ।

उनले मेक्सिको मूठभेडको पक्षमा रहेको भन्दै आफूले दुवै देशका अधिकारी सम्मिलित संयुक्त कार्यदल बनाएर जनस्वास्थ्य र सुरक्षाका क्षेत्रमा काम गर्न प्रस्ताव गरेको पनि उल्लेख गरिन् ।

तर मेक्सिकोकी राष्ट्रपतिको सबैभन्दा महत्त्वपूर्ण घोषणा अन्त्यमा रहेको थियो। उनले देशका अर्थ सचिवलाई ‘प्लान बी’ अर्थात् वैकल्पिक योजना कार्यान्वयनमा ल्याउन आदेश दिइन् । त्यसमा ‘मेक्सिकोको स्वार्थ रक्षाका लागि आयातमा लाग्ने शुल्क र भन्सारबाहेकका व्यवस्था’सहितका बारेमा निर्णय गर्न आदेश दिइन् ।

यस्ता कदममा अमेरिकी उत्पादनमा २५ प्रतिशत आयात शुल्क हुने अपेक्षा गरिएको छ। मेक्सिकोकी राष्ट्रपतिले त्यो आफ्नो सरकारको जवाफी प्रतिक्रियाको मुख्य पक्ष हुने बताउँदै आएकी छन् ।

बीबीसी । अमेरिकी राष्ट्रपति डोनल्ड ट्रम्पले आफ्ना देशमा उत्पादित सामग्रीहरूमा थप २५ प्रतिशत आयात कर लगाउने घोषणा गरेपछि क्यानडा र मेक्सिकोले पनि त्यस्तै कर अमेरिकी उत्पादनहरूमा समेत लगाउने घोषणा गरेका छन् । क्यानडाका प्रधानमन्त्री जस्टिन ट्रुडोले अमेरिकामा उत्पादित १५५ अर्ब डलर बराबरका सामाग्री आयात गर्दा २५ प्रतिशत भन्सार लगाइने घोषणा गरेका हुन् ।

यसअघि अमेरिकी राष्ट्रपति ट्रम्पले क्यानडा र मेक्सिकोबाट हुने आयातमा २५ प्रतिशत र चीनबाट हुने आयातमा १० प्रतिशत आयात कर लगाउने घोषणा गरेका थिए । त्यसपछि मेक्सिकोकी राष्ट्रपति क्लाउडिया सेनाबाउमले अमेरिकामाथि पनि त्यस्तै प्रकारको शुल्क आफ्नो मुलुकले लगाउने बताएकी थिइन् ।

चीनले व्यापार युद्धमा कसैले नजित्ने भन्दै राष्ट्रिय स्वार्थ रक्षामा आफू प्रतिबद्ध रहेको जनाएको छ । ह्वाइटहाउसका अनुसार राष्ट्रपति ट्रम्पले हस्ताक्षर गरेको आदेशले क्यानडा र मेक्सिकोबाट आयात गरिने वस्तुमा २५ प्रतिशत र चीनबाट आयात गरिने वस्तुमा १० प्रतिशत शुल्क लगाएको छ ।

तर क्यानडाबाट हुने ऊर्जा आयातमा भने १० प्रतिशत शुल्क घोषणा गरिएको छ । सामाजिक सञ्जाल एक्समा प्रकाशित विज्ञप्तिमा ट्रम्पले गैरकानुनी आप्रवासन र घातक लागुऔषधको खतराका कारण आफूले आपत्कालीन आर्थिक शक्तिको प्रयोग गरेको उल्लेख गरेका छन् ।

उनले चीनले फेन्टनिल (औषधि)लाई प्रयोग हुन दिएको र मेक्सिको र क्यानडाले सीमा वारपार हुने आप्रवासन रोक्न पर्याप्त कदम नचालेको आरोप लगाए ।

अर्थविद्हरूले राष्ट्रपति ट्रम्पको कदमले अमेरिकामा खाद्यान्न र इन्धनको मूल्य वृद्धि गराउनसक्ने र क्यानडा र मेक्सिकोलाई मन्दीतर्फ धकेल्नसक्ने चेतावनी दिएका छन् ।

लेबनान । सिरियामा बन्दुकधारीहरूले अलावाइट गाउँका १० जनालाई गोली हानी हत्या गरेको छ ।

सिरियन अब्जर्भेटरी फर ह्युमन राइट्सले अलावाइट सम्प्रदायका नागरिकहरू बसोबास गर्ने उत्तरी हाम्रा ग्रामीण इलाकाको अर्जाह गाउँका १० नागरिक शुक्रवारको आक्रमणमा मारिएको बताएको छ ।

“बन्दुकधारीहरूले भाग्नु अघि गाउँका मानिसहरूलाई गोली हाने ।”अब्जर्भेटरीका प्रमुख रामी अब्देल रहमानले बन्दुकधारीहरू सुन्नी मुस्लिमहरू रहेको थिए ।

सिरियाली अखबार अल–वतानले सुरक्षा बलहरूले हत्याको पछाडि अपराधीहरूलाई खोज्न अर्जाह क्षेत्रलाई घेरेको बताएको छ । उक्त आक्रमणमा मारिनेहरूमा पूर्व अफिसर र सिपाहीहरू थिए । 

बीबीसी । प्यालेस्टिनी समूह हमासले दक्षिणी गाजाको खान युनिसबाट दुईजना गाजासिटीबाट एक जना गरि तीन जना इजरायली बन्धक मुक्त गरेको छ ।

रेडक्रसलाई बुझाइएका ३४ वर्षीय यार्देन बिवास र फ्रान्सको समेत नागरिकता भएका ५३ वर्षीय ओफर काल्दरोन इजरायल आइपुगेको इजरायली डिफेन्स फोर्सेस आईडीएफले जनाएको छ । शनिबार नै अर्का बन्धक ६५ वर्षीय किथ सिगल पनि गाजासिटीबाट मुक्त भएका छन्।

उनी इजरायल र अमेरिकाको दोहोरो नागरिकता भएका व्यक्ति हुन् । उनीहरू ज्यानुअरी १९ मा इजरायली र हमासबीच युद्धविराम सम्झौता भएयता चौथो चरणमा छाडिने बन्धक हुन् ।

युद्धविराम सम्झौता अनुसार इजरायलले त्यसको बदलामा १८० जना भन्दा धेरै प्यालेस्टिनी बन्दीहरूलाई छाड्दैछ । इजरायलले शनिबार छाड्नेमा १०० भन्दा धेरै प्यालेस्टिनी बन्दीहरू गाजाका छन् र करिब ७० जना भन्दा धेरै लामो अवधिको वा आजीवन कारावास सजाय तोकिएका व्यक्तिहरू हुन् ।

बिवासकी श्रीमती र दुई छोराहरूको बन्धक रहेकै अवस्थामा गाजामा मृत्यु भएको ठानिएको छ। बन्धक बनाइँदा उनका एक छोरा चार वर्षका र अर्का १० महिनाका थिए ।

हमासले इजरायली हवाइ हमलामा परेर सन् २०२३ को नोभेम्बरमा उनीहरूको मृत्यु भएको दाबी गरे तापनि इजरेलले अझै त्यसको पुष्टि गरेको छैन । सिगलकी बन्धक श्रीमतीलाई समेत सन् २०२३ कै अस्थायी युद्धविरामका क्रममा गाजाबाट मुक्त गरिएको थियो।