Author: nepalone

काठमाडौं – निवर्तमान राष्ट्रपति विद्यादेवी भण्डारी लगातार दुई कार्यकाल पूरा गरी शीतल निवासबाट बिदा हुनुभएको छ ।सोमबार राष्ट्रपति रामचन्द्र पौडेलले निवर्तमान राष्ट्रपति भण्डारीलाई बिदाइ गर्नुभएको हो ।

प्रधानमन्त्री पुष्पकमल दाहाल ‘प्रचण्ड’ले निवर्तमान राष्ट्रपति भण्डारीलाई आँखीझ्याल उपहार दिएर बिदाइ गर्नुभएको छ ।

भण्डारी शीतल निवासबाट निजी निवासमा जाँदै गर्दा नेपाली सेनाको टोलीले टुँडिखेलबाट २१ टोपको सलामी दिएर बिदाई गरिएको छ।

२०७४ साल फागुन २९ गते भण्डारी राष्ट्रपतिमा निर्वाचित हुनुभएको थियो । २०७२ साल कात्तिक ११ गते पहिलो पटक राष्ट्रपतिमा बन्नुभएकी उहाँ २०७४ सालमा दोस्रो कार्यकालका लागि निर्वाचित हुनुभएको थियो ।

उहाँ आज बालुवाटारस्थित छोरीको घरमा सर्ने तयारी रहेको स्रोतले जनाएको छ।

कार्यक्रममा उपराष्ट्रपति नन्दबहादुर पुन, कामु प्रधानन्यायाधीश हरिकृष्ण कार्की लगायतको उपस्थिति रहेको थियो ।

काठमाडौँ – सञ्चार तथा सूचना प्रविधि मन्त्री रेखा शर्माले महिलाको नेतृत्व विकासलाई व्यक्तिको मात्र नभई समुदायकै विकासको रूपमा लिनुपर्ने बताउनुभएको छ ।

सोमबार काठमाडौँमा नारी अनलाइन पत्रिकाको शुभारम्भ गर्दै मन्त्री शर्माले विभिन्न आन्दोलन र युद्धको परिणामस्वरूप हरेक क्षेत्रमा महिलाको भूमिका बढ्दै भन्दै महिलाको नेतृत्व विकासलाई व्यक्तिको मात्र नभई समुदायकै विकासको रूपमा लिनुपर्ने बताउनुभएको हो ।

उहाँले पुरुष असफल हुँदा व्यक्ति असफल हुने र महिला असफल हुँदा महिला समुदाय नै असफल हुने भएकाले महिलालाई असफल हुने छुट नभएको बताउनुभयो । मन्त्री शर्माले जुनसुकै क्षेत्रमा रहेका महिलाहरूले आफूलाई सफल बनाउनुका लागि प्रयत्न गर्नुपर्ने उल्लेख गर्नुभयो । उहाँले सञ्चारमाध्यमले राम्रो कामका लागि उत्प्रेरित गर्ने प्रेरणादायी सामग्रीको खोजी बढाउनुपर्ने धारणा राख्नुभयो ।

त्यस्तै उहाँले विभिन्न आन्दोलन र युद्धदेखि सदनभित्र संविधान र कानुन बनाउने बेलासम्म महिलाले बढी जिम्मेवारी बहन गर्दै आएको उल्लेख गर्दै महिलाको योगदानको यथोचित कदरसहित क्षमताअनुसार अवसर प्रदान गर्ने वातावरण बनाउनुपर्नेमा पनि जोड दिनुभयो ।

काठमाडौं – जनता समाजवादीका नेताहरुले उपराष्ट्रपतिमा सत्ता गठबन्धनको तर्फबाट उम्मेदवारी दिएका जसपा संसदीय दलका नेता रामसहाय यादवलाई सहयोग गर्न प्रधानमन्त्री पुष्पकमल दाहाल प्रचण्डसँग आग्रह गरेका छन् । 

आगामी ३ चैतमा उपराष्ट्रपति पदको निर्वाचन हुँदै छ ।  प्रधानमन्त्री प्रचण्डलाई सोमबार भेटेर उपराष्ट्रपतिमा रामसहाय यादवलाई सहयोग गर्न आग्रह गरेको जसपा नेता प्रदीप यादवले जानकारी दिए । 

जवाफमा प्रधानमन्त्री प्रचण्डले संघीयता र गणतन्त्रको रक्षा निमित्त आफु र आफ्नो दलले यादवलाई सहयोग गर्ने बताएका उनले जानकारी दिए । प्रधानमन्त्री प्रचण्डले  यादवलाई विजयी गराउने प्रतिबद्धता पनि जनाए । 

काठमाडौँ – नवनिर्वाचित राष्ट्रपति रामचन्द्र पौडेलले सांसदबाट राजीनामा दिएका छन् । सोमबार उनले सभामुखसमक्ष राजीनामा पत्र बुझाएका हुन् ।

गत मंसिर ४ को निर्वाचनमा पौडेल तनहुँ निर्वाचन क्षेत्र नम्बर १ बाट प्रतिनिधिसभामा विजयी भएका थिए ।

फागुन २५ मा राष्ट्रपति निर्वाचित भएपछि उनले आज पद तथा गोपनीयताको शपथ लिँदै छन् ।

काठमाडौं –  जनता समाजवादी पार्टी (जसपा) बाट उपराष्ट्रपतिकी उम्मेदवार प्रमिला कुमारी यादवले उम्मेदवारी फिर्ता लिनुभएकाे छ। उम्मेदवारी फिर्ता लिएपछि उहाँले जसपाबाट उम्मेदवार बनेका रामसहाय यादवलाई समर्थन गर्ने घोषणा गर्नुभएकाे छ। 

उहाँले मुलुकको सार्वभौमिकता, राष्ट्रिय स्वाधिनता, समावेशीता, संघीय लोकतान्त्रिक गणतन्त्र, सामाजिक न्याय र समाजवाद प्रति निष्ठापूर्वक संधै समर्पित रहने सालीन स्वभावका, सादा जीवन, निष्कलंक एवं स्वच्छ छवी र उच्च विचार भएका एक बौद्धिक एवं परिपक्क नेता यादवलाई समर्थन गर्दै आफ्नो उम्मेदवारी फिर्ता लिएको घोषणा गर्नुभएकाे छ।

‘मुलुकको सार्वभौमिकता, राष्ट्रिय स्वाधिनता, समावेशीता, संघीय लोकतान्त्रिक गणतन्त्र, सामाजिक न्याय र समाजवाद प्रति निष्ठापूर्वक संधै समर्पित रहने सालीन स्वभावका, सादा जीवन, निष्कलंक एवम् स्वच्छ छवी र उच्च विचार भएका एक बौद्धिक एवम् परिपक्व नेता माननीय रामसहाय प्रसाद यादव, उप९राष्ट्रपति जस्तो गरिमामय पदका लागि सबै भन्दा उपयुक्त, योग्य र सक्षम उम्मेदवार हुनुहुन्छ’, उहाँले भन्नुभयाे, ‘प्राविधिक रुपमा मेरो नाम उम्मेदवारको सूचीमा रहन गएको भएता पनि प्रतिवद्धताका साथ म वहाँलाई समर्थन गर्दै आफ्नो उम्मेदवारी फिर्ता लिएको घोषणा गर्दछु,’ उहाँले भन्नुभएकाे छ।

यादवले विज्ञप्तिमा भन्नुभएकाे छ, ‘अब उपरान्त म उपराष्ट्रपति पदको लागि उम्मेदवार नरहेको हुँदा गठबन्धनका तर्फबाट साझा उम्मेदवार रहनुभएका माननीय रामसहाय प्रसाद यादवलाई आफ्नो अमूल्य मत दिई विजयी गराउनुहुन सम्पूर्ण माननीय सांसद एवम् माननीय प्रदेशसभा सदस्यज्यूहरुसँग हार्दिक अपिल गर्दछु।’

उपराष्ट्रपतिको निर्वाचन चैत ३ गते हुँदै छ।

काठमाडौँ – प्रधानमन्त्री पुष्प कमल दाहाल प्रचण्डले सङ्घीय शिक्षा ऐन यथाशीघ्र जारी गर्न सरकारले आवश्यक गृहकार्य गरिरहेको बताएका छन् ।

सोमबार काठमाडौँको पद्मोदय माध्यमिक विद्यालयको हीरक जयन्तीका अवसरमा आयोजित कार्यक्रममा सम्बोधन गर्दै प्रधानमन्त्री प्रचण्डले उक्त ऐन पारित गरी शिक्षा क्षेत्रमा विद्यमान समस्याहरूको प्याकेजमै सम्बोधन गर्न सरकार प्रतिबद्ध रहेको पनि बताएका हुन् ।

देशमा रहेको सरकारी र निजी क्षेत्रको शैक्षिक गुणस्तर र उत्पादनमा निकै भिन्नता रहेको तथ्यलाई आत्मसाथ गर्दै सरकारी शैक्षिक संस्थाको गुणस्तर गुणात्मक रूपमा विकास गर्न शैक्षिक गुरुयोजना निर्माण गरी कार्यान्वयनमा ल्याउनुपर्ने दायित्व रहेको उनले बताए । उनले शिक्षाको विकास मुलुक र जनताको सर्वाङ्गीण विकासको आधारस्तम्भ भएको तथ्यलाई सबैले आत्मसाथ गर्नुपर्ने धारणा राखे । प्रधानमन्त्री प्रचण्डले शैक्षिक पाठ्यक्रमको पुनरावलोकन गरी शिक्षालाई जीवनउपयोगी, आधुनिक, विज्ञान प्रविधि र व्यावसायिक बनाउन बदलिएको राजनीतिक एवं सामाजिक व्यवस्थाअनुरूप पाठ्यक्रममा गुणात्मक सुधार आवश्यक रहेको उल्लेख गरे ।

उनले विश्वबजारमा प्रतिस्पर्धा गर्न योग्य जनशक्ति तयार पार्न विज्ञान, गणित र इन्जिनियरिङलाई माध्यमिक तहदेखि नै अनिवार्य विषय बनाउँदै उच्च शिक्षालाई अनुसन्धानमुखी बनाउन आवश्यक रहेको पनि बताएका छन् ।

काठमाडौँ – नेकपा (एमाले)को प्रमुख सचेतकमा पूर्व स्वास्थ्यमन्त्री पदम गिरी चयन हुनु भएको छ । नेकपा एमाले संसदीय दलका नेता केपी शर्मा ओलीले गिरीलाई आइतबार प्रमुख सचेतकमा नियुक्त गर्नुभएको हो ।

अध्यक्ष ओलीले सचेतकमा प्रतिनिधिसभा सदस्य महेश बर्तौलालाई नियुक्त गर्नुभएको छ । गिरी पर्वतबाट र बर्तौला मकवानपुरबाट विजयी हुनु भएको थियो ।

गिरी र बर्तौला दुवै नेता विद्यार्थी राजनीतिबाट पार्टी राजनीतिमा उदाएका हुन् । गिरी पिएन क्याम्पसका पूर्व स्ववियु सभापति हुन् भने बर्तौला हेटौँडा क्याम्पसका पूर्व स्ववियु सभापति हुन् ।

काठमाडौँ – राप्रपाका अध्यक्ष राजेन्द्र लिङ्देनले वर्तमान सरकारमा सहभागी हुने सोच नरहेको बताएका छन् ।

आइतबार पार्टी कार्यालय धुम्वाराहीमा आयोजित पार्टी प्रवेश कार्यक्रममा लिङ्देनले राप्रपाले सरकारलाई प्राथमिकतामा नराखेको र अहिले नै सहभागी सोच पनि नरहेको बताएका हुन्। उनले वर्तमान सरकारलाई समर्थन गर्ने सम्भावना पनि कम रहेको जिकिर गरे । त्यस्तै उपराष्ट्रपति निर्वाचनमा कसलाई मत दिने भन्ने विषयमा छिटै पार्टीले निर्णय गर्ने जानकारी दिए ।

यसअघि राष्ट्रपतिको निर्वाचन राप्रपाले बहिष्कार गरेको नभई राजनीतिमा क्रियाशील व्यक्तिले राष्ट्रपतिमा उम्मेदवारी दिएकै कारण कसैलाई पनि मत नहालेको स्पष्ट परे । कार्यक्रममा सुरेश आचार्य लगायतका व्यक्तिहरूलाई राप्रपा प्रवेश गराइएको थियो ।

काठमाडौं – नेपाली कांग्रेसका महामन्त्री गगनकुमार थापाले मुलुकको आर्थिक अवस्थालाई लिएर नागरिकलाई निराशाको सिकार हुन बाट बचाउनुपर्ने बताएका छन् ।

देशको आर्थिक अवस्थामा प्रधानमन्त्रीले भने डर लिनुपर्ने बताएका छन् ।आज काठमाडौंमा आयोजित एक कार्यक्रममा महामन्त्री थापाले यस्तो बताएका हुन् । देशका नागरिकहरु दैनिक देशको आर्थिक अवस्था माथि उठ्ने आशामा रहेकाले सो विषलाई मनन गरेर प्रधानमन्त्रीले देशको अवस्थावारे बुझ्नुपर्ने आवश्यकता रहेको बताएका छन् । ‘दर्जनौं मन्त्रालय अहिले खाली अवस्थामा रहेका छन् ।

यसरी मन्त्रालय खाली राखेर परिवर्तनको समयलाई बाधक बनाएको महामन्त्री थापाको भनाइ छ । विगतमा जस्तो गठबन्धन नटुक्रिने र बेला –बेला गठबन्धन टुक्रिए जनताले दिएको दण्ड भोग्न तयार रहने प्रतिबद्धता दिनुपर्ने समेत प्रधानमन्त्रीलाई महामन्त्री थापाले निर्देशन दिएका छन् ।

सत्तारुढ गठबन्धनले सरकार ५ वर्ष टिक्छ र यो अवधिमा डेलिभरी गर्न सकेन भने जनताबाट दण्ड भोग्न तयार छौं भनेर जनतासामू प्रतिबद्धता जनाउनुपर्ने समेत उनले बताए ।

काठमाडौं – कमल थापा नेतृत्वको राप्रपा नेपालका केन्द्रीय प्रवक्ता  सुरेश आचार्य राप्रपामा प्रवेश गरेका छन् । 

धुम्बाराहीस्थित पार्टी कार्यालयमा आइतबार आयोजित पार्टी प्रवेश कार्यक्रममा राप्रपा अध्यक्ष राजेन्द्र लिङ्देनले आचार्यसहित विश्व ह्विलचेयर यात्री सन्देश रम्तेल लगायतका ४२ जनालाई राप्रपामा प्रवेश गराउँदै स्वागत गरेका छन् । 

आचार्य राप्रपा नेपालमा प्रवक्ता, कार्यसम्पादन समिति सदस्य र प्रचार प्रसार विभाग प्रमुखको जिम्मेवारीमा थिए । आचार्यले राजनीति, सामाजिक लगायतका विभिन्न विषयमा पुस्तक प्रकाशन गरेका छन् । 

काठमाडौं – कांग्रेस, माओवादीसहित नौ दलको बैठक बसिरहेको छ । 

सिंहदरवारमा जारी बैठकमा उपराष्ट्रपति पदको साझा उम्मेदवार तय गर्न नौ दलको बैठक बसिरहेको हो ।

बैठकमा कांग्रेस, माओवादी केन्द्र, एकीकृत समाजवादी, जसपा, लोसपा, जनमत, नागरिक उन्मुक्ति पार्टी, राष्ट्रिय जनमोर्चा र नेपाल समाजवादी पार्टीले उपराष्ट्रपतिको साझा उम्मेदवार बनाउने गरि छलफल भइरहेको छ । 

काठमाडौं – नेपाल निर्माण व्यवसायी महासंघको २४ औं साधारणसभा  सुरू भएको छ ।

कमलादीस्थित नेपाल प्रज्ञा प्रतिष्ठानमा महासंघको २४ औं साधारणसभाकाे  प्रधानमन्त्री पुष्पकमल दाहाल प्रचण्डले उदघाटन गरेका हुन् । 

साधारणसभामा ‘एफक्यान एक्सिलेन्स अवार्ड’ पनि वितरण हुनेछ भने  ३८ विधामा संस्था तथा व्यक्तिलाई पुरस्कृत गरिनेछ ।

साधारणसभामा देशभरबाट करिब  ११ सय प्रतिनिधि र ५०० पर्यवेक्षक सहभागी हुनेछन् । 

काठमाडौँ – नेकपा एमाले उपराष्ट्रपतिमा रामशाह यादवको उम्मेदवारी सदर गर्ने निर्वाचन आयोगविरुद्ध अदालत जाने तयारी गरेको छ ।

राष्ट्रपति र उपराष्ट्रपति दुवै फरक समुदायका पुरुष बन्न सक्ने संविधानको व्याख्या गर्दै रामसहायप्रसाद यादवको उमेदवारी कायम गर्ने निर्वाचन आयोगको निर्णयविरुद्ध अदालत जाने तयारीमा एमाले लागेको हो ।

एमाले नेताहरुका अनुसार उम्मेदवारी सदर गर्ने निर्णयको पूर्णपाठपछि पार्टीले थप निर्णय लिने छ ।

रामशाह यादवको उम्मेदवारी संविधान र कानुन विपरीत रहेको भन्दै नेकपा नेकपा एमालेले शनिवार निर्वाचन आयोगमा उजुरी दिएको थियो ।

राष्ट्रपतिमा पुरुष निर्वाचित भइसकेकाले उपराष्ट्रपति पनि पुरुष हुन नहुने भन्दै एमालेले जसपाका उम्मेदवार यादवविरुद्ध उजुरी दिएको हो । निर्वाचन आयोगका प्रमुख आयुत्त दिनेशकुमार थपलियाले पनि उपराष्ट्रपतिमा महिलाकै उम्मेदवारी हुनुपर्ने बताउँदै आउनुभएको थियो ।