Author: nepalone

काठमाडौँ – नेपाली काँग्रेसका नेता शेखर कोइरालाले राष्ट्रपति निर्वाचनमा काँग्रेसले उम्मेदवारी दिने र उक्त उम्मेदवारलाई जिताउने बताएका छन्। अन्य दलहरूसँग सहमति गरेर काँग्रेसले आफ्नो उम्मेदवारलाई राष्ट्रपति बनाउने दाबी उनको छ।

नेपाल प्रेस युनियन बागमती प्रदेश प्रथम अधिवेशनको आज सौराहामा उद्घाटन गर्दै कोइरालाले भने, ‘२५ फागुनमा के हुन्छ भन्ने प्रश्न होला। राष्ट्रपति निर्वाचनमा काँग्रेसले उम्मेदवारी दिन्छ र त्यो निर्वाचन जिताउने हाम्रो जिम्मेवारी छ। काँग्रेसकै उम्मेदवारले जित्छ।’

काँग्रेस एक्लैको मतले मात्र राष्ट्रपति निर्वाचित नहुने भएकोले अन्य दलहरूसँग सहकार्य गरिने कोइरालाले बताए। ‘अन्य दलहरूसँग सहकार्य गरेर अघि बढ्नुपर्ने आवश्यकता छ। काँग्रेसको भोटले मात्रै राष्ट्रपति जित्न सक्दैन,’ उनले भने।

उनले काँग्रेस प्रतिपक्षमै बस्ने र सरकारमा सहभागी नहुने पनि बताए। ‘हामी सरकारमा जान्दैनौँ, प्रतिपक्षमै बस्छौँ,’ उनले भने।

काठमाडौँ – नेकपा महासचिव नेत्रविक्रम चन्द‘विप्लव’ले बुधबार विशेष पत्रकार सम्मेलन गर्ने भएका छन् । उनले बुधबार दिउँसो १ बजे काठमाडौँको जमलस्थित नाचघरबाट पत्रकार सम्मेलन गर्ने भएका हुन् ।

विप्लवले पत्रकार सम्मेलनमार्फत पछिल्लो बन्दी रिहा, मुद्दा फिर्ताको विषय र पछिल्लो राजनीतिक घटनाक्रमका विषयमा जानकारी दिने बताइएको छ ।

सोही पत्रकार सम्मेलनमा विप्लवले पार्टीले अख्तियार गर्ने नीतिका विषयमा समेत जानकारी दिने छन् । पत्रकार सम्मेलनमा विप्लवसहित प्रवक्ता खड्गबहादुर विश्वकर्मा ‘प्रकाण्ड’सहित सचिवालय, पोलिटब्युरो र केन्द्रीय सदस्य समेत सहभागी हुने भएका छन् ।

काठमाडौं – नेकपा एमालेको कृषि तथा पशुपन्छी विभागले कृषि क्षेत्रमा देखिएका समस्या समाधानका लागि १२ बुँदे सुझाव दिएको छ । च्यासलस्थित पार्टी कार्यालयमा बसेको विभागको बैठकले तत्काल र दीर्घकालीन रुपमा गर्नुपर्ने १२ बुँदे सुझाव सरकारलाई दिएको हो । 

एमाले पोलिट्ब्युरो सदस्यसमेत रहेकी  कृषि तथा पशुपन्छी विकासमन्त्री ज्वालाकुमारी साहको उपस्थित सो बैठकले सरकाले मलको सहज आपूर्तिको सुनिश्चितता गर्ने, वनस्पति र कुहिने फोहरबाट उत्पादन गर्न सकिने आधुनिक कम्पोस्ट प्लान्ट उत्पादन केन्द्रहरु स्थापना गरी रासायनिक मलको वैकल्पिक व्यवस्था गर्ने, किसानको पहिचान, वर्गीकरण र सूचीकरण गरी परिचयपत्रको व्यवस्था गर्ने, उत्पादित कृषि उपजहरुको समर्थन मूल्य निर्धारण र बजारीकरणको सहज व्यवस्था गर्ने, खुला पशु तथा वन्यजन्तुको आक्रमणको समस्या दीर्घकालका लागी समाधानको व्यवस्था गर्ने, तीनै तहका सरकारको प्रभावकारी समन्वयमा संघीय सरकारले नीति निर्माण गर्ने, संचालनमा रहेका कृषिउपज बजारहरुको प्रभावकारी नियमन गर्ने, स्थानीय उत्पादनहरुलाई बिक्री वितरणका लागी प्राथमिकता दिन सुझाव दिएको हो । 

साथै बैठकले अक्सन सेन्टरको विकास गरी किसान र व्यापारी बीचको सप्लाई चेनको दूरी कम गर्ने, बैंकहरुबाट प्रदान सहुलियत कृषि कर्जामा अध्ययन गर्ने र किसानहरुले सहज रुपमा पाउनु पर्ने संय्नत्र निर्माण गर्न सुझाव दिएको विभाग प्रमुख गिरधारीलाल न्यौपानेले जानकारी दिए । 

साेमबार बसेकाे विभागको सो बैठकमा एमाले अध्यक्ष केपी शर्मा ओलीको पनि सहभागिता थियो । 

काठमाडौं – उपेन्द्र यादव नेतृत्वको जनता समाजवादी पार्टी (जसपा नेपाल)ले पार्टीले एकताका लागि संघीय लोकतान्त्रिक मञ्चलाई पत्राचार गरेको छ ।

एकता वार्ताका समितिका संयोजक राजेन्द्र श्रेष्ठले एक पत्र लेख्दै पार्टी एकताका लागि कुमार लिङदेन नेतृत्वको संघीय मञ्चलाई पत्राचार गरेका हुन । 

‘हाम्रो पार्टी राजनीतिक समितिको बैठकले निति, सिद्धान्त र बिचार मिल्ने राजनीतिक दलसँग ठोस रुपमा पार्टी एकताको पहल गर्न पार्टी बार्ता समिति गठन गर्नुको साथै त्यसको बैचारिक आधारको रुपमा पहिचानसहितको संघीयता र समाजवाद हुनुपर्ने निष्कर्ष निकालेको छ,’ श्रेष्ठले पठाएको पत्रमा भनिएको छ, ‘अत: पार्टी एकताका लागि बिचाराधारात्मक तथा संगठनात्मक बिषयमा वार्ता एवम छलफल गर्नका लागि हामी तपाईको पार्टीसँग हार्दिकताका साथ प्रस्ताव अघि बढाउन चाहान्छौं ।’

जसपाको राजनीतिक समितिको गत १८ र १९ पुसमा बसेको बैठकले बिचारधारा मिल्ने पार्टी एकता गर्नका लागि श्रेष्ठको नेतृत्वमा वार्ता समिति गठन गरेको थियो ।

काठमाडौं – नेकपा एमाले संसदीय दलको उपनेता, प्रमुख सचेतक र सचेतक हुनका लागि संसद्मा रहेका नेताहरूले लबिङ गरिरहेका छन् । 

पार्टी उपाध्यक्ष सुवासचन्द्र नेम्वाङको राष्ट्रपतिमा चर्चा भएपछि उहाँको ठाउँमा कसले उपनेताको जिम्मेवारी पाउने हुन् भन्ने चर्चा भइरहेको छ । 

नेम्वाङ लामो समयसम्म सभामुख, संविधानसभाको अध्यक्ष र उपनेता पनि भइसक्नु भएकोले यसपालि नयाँ अनुहारले मौका पाउनु पर्ने माग एमालेमा छ । संसदीय दलको नेताको अनुपस्थितिमा दलका सांसदहरूलाई निर्देशन दिने, संसद्मा उठाउनु पर्ने विषय जानकारी गराउने, सभामुख र सरकारसँग समन्वय गराउने भूमिका दलका उपनेताले निर्वाह गर्नुपर्दछ ।

एमालेका एक पदाधिकारीका अनुसार उपाध्यक्ष विष्णु पौडेललाई  दलको उपनेताको जिम्मेवारी दिने सम्भावना प्रबल छ । पौडेल  उपप्रधान तथा अर्थ मन्त्रीको जिम्मेवारीमा रहनु भएकोले समय व्यवस्थापनमा समस्या हुने भएकोले दोस्रो व्यक्तिको खोजी हुन सक्ने एमाले वृत्तमा चर्चा छ । 

तथापि नेम्वाङको शीतल निवासको यात्रा तय नभएमा उहाँले नै यही पदमा दोहोर्‍याउने सम्भावना पनि उत्तिकै छ । दलको उपनेतामा पार्टी सचिव टोपबहादुर रायमाझीको नाम पनि चर्चामा छ । 

यस्तै संसद्मा आफ्नो दलका तर्फबाट बोल्ने सांसदहरूको पालो लगाउने, दलको नेताको निर्देशन संासदहरुलाई प्रवाह गर्ने,सभामुखसँग आफ्ना पार्टीका एजेण्डा र मागबारेमा नियमित छलफल गर्ने जिम्मा भएको प्रमुख सचेतकमा एमाले धेरै नेताहरूले चासो देखाएका छन् ।  छविलाल विश्वकर्मा, लीलानाथ श्रेष्ठ, कृष्णगोपाल श्रेष्ठ र विद्या भट्टराई, नेता गोकुल बास्कोटालगायतका सांसदहरू आफूले संसद्मा प्रमुख सचेतकको भूमिका निर्वाह समन्वयकारी ढंगले गर्ने दाबी गर्दै आउनुभएको छ । 

सचेतकको लागि अच्युत मैनाली, दिपा शर्मा, ठाकुर गैरे, उर्मिला थेबेको नाम चर्चामा छ । 

एमाले स्रोतका अनुसार अध्यक्ष केपी शर्मा ओलीले राष्ट्रपतिको निर्वाचनपछि मात्र संासदहरुलाई यी जिम्मेवारी तोक्ने मनस्थिति बनाउनु भएको छ । ७९ सांसदसहित एमाले संसद्मा दोस्रो ठुलो दलको हैसियतमा छ  ।

काठमाडौँ – नेपाली कांग्रेसका नेता डा शेखर कोइरालाले कांग्रेस सरकारमा सहभागी नहुने बताएका छन् ।
आज चितवनमा पत्रकारसँग कुराकानी गर्दै उनले राष्ट्रपति पदमा कांग्रेसको उम्मेदार हुने भए पनि कांग्रेस अहिले नै सरकारमा सहभागी नहुने स्पष्ट पारेका हुन् ।

राष्ट्रपतिको निर्वाचनमा राष्ट्रिय सहमतिको प्रयास गरिने पनि उनको भनाइ छ ।  राष्ट्रपति पद संविधानको रक्षाका लागि भएको भन्दै संविधानको रक्षा गर्नु सबैको जिम्मेवारी भएको उनको भनाइ छ ।  

फरक प्रसङ्गमा उनले प्रेस स्वतन्त्रताबिना लोकतन्त्र पूर्ण नहुने बताए । लोकतन्त्रबिना विकास सम्भव नहुने भन्दै उनले प्रेस स्वतन्त्रता कांग्रेसका लागि महत्वपूर्ण भएको बताए । “आलोचना सहन नसक्ने व्यक्तिले राजनीति गर्नु हुँदैन, राजनीतिमा सहनशीलता चाहिन्छ, सञ्चारमध्यामको काम खबरदारी गर्ने हो, अन्यथा मान्नु हुँदैन ।” उनले भने । 

काठमाडौँ / नेकपा माओवादी केन्द्रका अध्यक्ष तथा प्रधानमन्त्री पुष्पकमल दाहाल प्रचण्डको जिम्मा थप २ मन्त्रालय तोकिएको छ ।राष्ट्रिय स्वतन्त्र पार्टी (रास्वपा) का मन्त्रीहरुले सरकार छोडेपछि राष्ट्रपति विद्यादेवी भण्डारीले रिक्त रहेको मन्त्रीको जिम्मेवारी प्रधानमन्त्री प्रचण्डलाई तोकेकी छन् ।

यस अघि रास्वपाका सभापति रवि लामिछाने पदमुक्त भएपछि गृह मन्त्रालयको जिम्मेवारी पनि प्रचण्डले नै सम्हाल्दै आएका थिए । आज सोमबार राष्ट्रपति कार्यलयले एक विज्ञप्ति जारी गर्दै उक्त मन्त्रालयहरुको जिम्मेवारी प्रधानमन्त्री प्रचण्डलाई दिएको जनाएको छ।

‘सम्माननीय राष्ट्रपति श्रीमती विद्यादेवी भण्डारीज्यूले संवत् २०७९/९/११ गते गठित मौजुदा मन्त्रिपरिषद्का माननीय शिक्षा, विज्ञान तथा प्रविधि मन्त्री श्री शिशिर खनाल र माननीय श्रम, रोजगार तथा सामाजिक सुरक्षा मन्त्री श्री डोलप्रसाद अर्यालले नेपालको संविधानको धारा ७७ को उपधारा २ को खण्ड क बमोजिम मन्त्री पदबाट राजीनामा दिनुभएकोले सम्माननीय प्रधानमन्त्रीज्यूको सिफारिसमा शिक्षा, विज्ञान तथा प्रविधि मन्त्रालय र श्रम, रोजगार तथा सामाजिक सुरक्षा मन्त्रालयको कार्यभार सम्माननीय प्रधानमन्त्री श्री पुष्पकमल दाहाल “प्रचण्ड” ज्यूले सम्हाल्ने गरी तोक्नु भएको छ,’ राष्ट्रपति कार्यलयले जारी गरेको विज्ञप्तिमा उल्लेख छ।

रास्वपाबाट मन्त्री बनेका शिक्षामन्त्री शिशिर खनाल र श्रममन्त्री डोल प्रसाद अर्याल र स्वास्थ्य राज्यमन्त्री डा तोसिमा कार्कीले राजीनामा दिएका थिए।

काठमाडौं – राप्रपा नेपालका अध्यक्ष कमल थापाले मुलुकको अस्थिर राजनीतिक घटनाक्रमले गर्दा बिदेशी चलखेल र प्रभाव बढेको टिप्पणी गरेका छन् ।

स्थिरता, समृद्धि र परिबर्तनको निमित्त जनताले आफ्नो मतदानबाट छनौट गरेका राजनितीक दलहरुले सत्ताको छिनाझम्टिमा आफुलाई केन्द्रित गर्नुबाट मुलुक थप सड्ढटग्रस्त बनेको भन्दै थापाले सत्ताको फोहरी खेलमा लिप्प भई दलहरुबाट बिदेशी प्रभाव र चलखेललाई आमन्त्रण गरिनु दुर्भाग्यपूर्ण भएको समेत बताए । आफू सत्तामा पुग्न र टिक्न बिदेशी शक्तिको आशिर्वाद खोज्ने प्रवृत्तिको अन्त्य अहिलेको आबश्यकता भएको उनको जिकिर थियो । काम गरेर बाच्न सकिने अवस्था नभएको , दिनप्रतिदिन अर्थतन्त्र कमजोर बन्दै गएकोमा चिन्ता ब्यक्त गर्दै थापाले समस्याको समाधान गर्न भन्दा थप ब्रम्हलुट गर्न राज्यसत्ता अग्रसर भएबाट मुलुक संकटको दलदलमा भासिएको बताए ।

स्पष्ट बिचार र अलग पहिचान सहित राष्ट्रिय राजनीतिमा स्थापित हुन तथा राष्ट्रियता, लोकतन्त्र र जनजिबिकाको बिषयलाई जोडदार ढङ्गबाट उठाउन राप्रपा नेपाल चाडै नै सडकमा आउने समेत उनले जानकारी दिए । पार्टीको उपत्यका केन्द्रित संगठन सुदृढीकरण अभियानलाई प्रभाबकारी रुपमा अघि बढाउन उनले नेता कार्यकर्ताहरुलाई निर्देशन समेत दिए।

काठमाडौँ – नेपाल मजदुर किसान पार्टीका अध्यक्ष नारायणमान बिजुक्छेँले काँग्रेसले प्रतिपक्ष दलको भूमिका निर्वाह गर्न नसकेको आरोप लगाउनुभएको छ ।

रफत सञ्चार क्लबको १३ औ वार्षिकोत्सवका अवसरमा सोमबार भक्तपुरमा आयोजना गरेको कार्यक्रममा बिजुक्छेँले प्रमुख प्रतिपक्ष दलले सरकारलाई समर्थन गर्ने कहि नभएको चलन काँग्रेसले ल्याएको र प्रतिपक्ष दलको भूमिका पनि निर्वाह गन नसकेको आरोप लगाउनुभएको हो ।

सरकारको गलत कामलाई रोकेर देशलाई जोगाउने मुख्य जिम्मेवारी प्रमुख प्रतिपक्ष दलको भए पनि सत्ताको मोहले काँग्रेसले त्यो जिम्मेवारी छाडेको उहाँले बताउनुभयो । उहाँले बिचार नमिल्नेहरूको सरकार बनाएर दलहरूले गैर जिम्मेवारीपन देखाएको धारणा पनि राख्नुभयो । बिजुक्छेँले संसदमा जनसरोकारका विषय र आफ्ना बिचारहरूका बारे बोल्न पाउनुपर्ने भन्दै राप्रपाले हिन्दु राज्य र राजाको पक्षमा बोल्यो भन्दै संसदमा सभामुखले रोक्नु गलत भएको पनि बताउनुभयो ।

त्यस्तै एमालेका उपमहासचिव प्रदीप ज्ञवालीले राष्ट्रपतिको निर्वाचनलाई पुस १० को सहमति अनुसार कार्यान्वयन गर्ने र राजनीतिक स्थिरतालाई कायम गर्ने जिम्मेवारी प्रधानमन्त्रीको भएको धारणा राख्नुभयो । कार्यक्रममा पत्रकार रमेश गिरी, नारायणसुन्दर किलम्बु लगायतलाई सम्मान गरिएको थियो ।

भैरहवा – संस्कृति, पर्यटन तथा नागरिक उड्डयन मन्त्री सुदन किरातीले गौतमबुुद्ध अन्तर्राष्ट्रिय विमानस्थल सञ्चालनका लागि कुनै कसर बाँकी नराख्ने बताएका छन् ।  मन्त्री भएपश्चात पहिलो पटक विमानस्थल आएका मन्त्री किरातीले अन्तर्राष्ट्रिय उडानहरु लुम्बिनीमा ल्याउनका निम्ति सरकारको तर्फबाट कुटनितिक पहल माथिल्लो तहबाट पनि भइरहेको बताए । 

‘उच्चस्तरीय वायुसेवा निगमका टोलीहरु पनि कोलम्बोतर्फ यसैका लागि जादै छन्, पराराष्ट्र मन्त्रीहरुको तर्फबाट पनि कयौ देशमा उडानको कुरा सुरु गरेका छौँ, राष्ट्रिय ध्वाजाबाहक विमान यहाँ ल्याउने सन्दर्भमा किन आउन खोजेको छैन भनेर बुझने छौँ,’ मन्त्री किरातीले भने, ‘के कारणले नेपाल एयरलाइन्सले यहाँबाट उडान गरेन, त्यो बुझ्छु र आवश्यक काम अगाडि बढाउनेछु ।’ 

उनले प्रधानमन्त्रीको तहबाट अब हुने भारत भ्रमणमा एजेण्डाको रुपमा आइएलएस सञ्चालन र एयर रुटको विषय पर्ने जानकारी दिए । 

‘विमानस्थल सञ्चालन र सम्बन्धित् निकाय र शाखाहरु यहाँ आउनु एक अर्काको अन्तरसम्बन्सँग जोडिएकोले दुबैलाई एकैसाथ अगाडि बढाउन मन्त्रालयले पहल गर्नेछ,’ उनले भने, ‘श्रीलंकाबाट भैरहवा उडानका लागि परराष्ट्र मन्त्रीको भ्रमणमा पनि कुरा भएको छ । मन्त्रालयका तर्फबाट हल हुने प्राविधिक समस्या तत्काल सम्बोधन हुनेछ ।’ 

मन्त्री किरातीले लुम्बिनी गुरुयोजनाभन्दा बाहिर कसैले जाने साहस नगर्न अनुरोध गरे । ‘सबैभन्दा पहिला यो गुरुयोजना सम्पन्न गर्नुपरेको छ । तोकिएको समयभन्दा २८ वर्ष किन लम्बियो भन्ने मेरो नै प्रश्न हो,’ उनले भने । लुम्बिनी गुरुयोजना पहिलो प्राथमकिता भएको उनको भनाइ छ । 

विमानस्थलका महाप्रबन्धक गोविन्दप्रसाद दाहालले रुटका कारणले भारतीय आकाश प्रयोग गर्न नपाउँदा समस्या देखिएको, भारतीय नागरिकलाई नोअब्जेक्सन लेटर दिने व्यवस्था नभएको, मौसमको खराबीमा प्रयोगहुने रेडियो नेभिगेसन प्रणाली (ईन्स्ट्रमेन्ट ल्यान्डिङ सिस्टम– आईएलएस) उपकरण उपयोग नहुँदा अन्तर्राष्ट्रिय उडान रोकिएकोमा ध्यानाकर्षण गराउँदै सञ्चालनका लागि पहल गर्न अनुरोध गरे । 

गौतमबुद्ध विमानस्थलबाट जजिरा र हिमालय एयरलाइन्सले अन्तर्राष्ट्रिय उडान सुरु गरे पनि पछिल्लो केही समय रोकिएको छ । 

काठमाडौँ – राष्ट्रिय स्वतन्त्र पार्टीका सभापति तथा पूर्व उपप्रधान तथा गृह मन्त्री रवि लामिछानेका समर्थकहरु विरोधमा उत्रिएका छन् । लामिछानेविरुद्ध समाचार लेखेको भन्दै उनका समर्थकहरु सांकेतिक विरोधमा उत्रिएका हुन् ।

सांकेतिक विरोधस्वरुप उनीहरुले आज बिहानै कैलालीको सुखड चोकमा पत्रिका जलाएका छन् । आइतबार पत्रकार सम्मेलन गरेर लामिछानेले आफूहरू विरुद्ध १२ भाइ लागिरहेको अभिव्यक्ति दिएका थिए ।

लामिछानेले कान्तिपुर पत्रिका शृङ्खलाबद्ध रुपमा आफ्नो छवि बिगार्न लागेको आरोप लगाएको भोलिपल्टै युवाहरुले पत्रिका जलाएका हुन् ।

काठमाडौं – राष्ट्रिय स्वतन्त्र पार्टी (रास्वपा) का सभापति रवि लामिछानेले आफु डराएर राजनीति गर्न नआएको बताएका छन् ।

आज पार्टी बैठकपछि पत्रकार सम्मेलन गर्दै लामिछानेले आफु डराएर राजनीति गर्न नआएको बताएका छन् ।

मिडियाप्रति आक्रोशित भएका लामिछानेले आफूविरुद्ध बिना प्रमाणका समाचार प्रकाशित गरेमा आफ्नै किसिमले कारवाही गर्ने चेतावनी दिएका छन् ।

लामिछानेले मिडियाका मालिक र सम्पादकहरुलाई आफूसँग चुनाव लड्न चितवन-२ मा आउन चुनौती दिएका छन् । मिडियाले अदालतलाई प्रभावमा पार्न लगातार गलत कुरा मिडियामा ल्याएको आरोप लगाएका छन् ।

लामिछानेले ठुला मिडियासँग सरकार र नेताहरु डराएको भन्दै आफु मिडियासँग नडराउने बताए ।

लामिछानेले आफूले विश्व रेकर्ड राख्दा पनि नेपाली मिडियाले उचित स्थान नदिएको गुनासो गर्दै पत्रिकाको कुनामा सो बारेको समाचार देख्दा दुख लागेको बताए ।

काठमाडौँ – नेपाली कांग्रेसका सांसद प्रदीप पौडेलले सरकारले सम्पत्ती शुद्धीकरण सम्बन्धी ऐनमा संशोधन गर्न बनेको विधेयक संसद्मा प्रस्तुत गर्न ढिलाइ गर्नु गम्भीर त्रुटि भएको बताएका छन् ।

आइतबार प्रतिनिधिसभाकोे बैठकमा बोल्दै उनले यस्तो बताएका हुन् । उनले नेपाललाई अन्तर्राष्ट्रिय आर्थिक सञ्जालहरूमा कालोसूचीमा पर्नबाट बचाउन माग गरे । उनले सरकारले बेलैमा अन्तर्राष्ट्रिय जगत्लाई विश्वस्त बनाउने गरी विधेयक ल्याएर संकटबाट मुक्त गर्नुपर्ने बताए ।

उनले भने, ‘सम्पित्ति शुद्धीकरण सम्बन्धी ऐनलाई संशोधन बनेको विधेयकलाई हालसम्म पनि संसद्मा ल्याइएको छैन, यो गम्भीर विषय हो, गत पौषमा एफएटीएफको टोली नेपालको स्थलगत मूल्यांकन गरेर फर्कियो । उसले नेपाललाई तत्काल यससम्बन्धी कानुन बनाऊ, नत्र तिम्रो देश ग्रे जोनमा पर्छ भनेर सुझाव दिएको छ । उसले तोकेको मापदण्ड पूरा नगर्दा कतिपय ठूला देशहरू आर्थिक विकासको ठूला सञ्जालबाट बाहिरिएका छन् । जसको कारण ती देशहरूले आर्थिक संकटको सामना गर्नुपरेको छ । यस्तोमा हाम्रोजस्तो देशले दण्डित हुने अवस्था बन्यो भने संकटपूर्ण अवस्था आउन सक्छ ।’

काठमाडौँ – सांसद धनराज गुरुङले सरकारले जनतालाई सेवा दिन कन्जुस्याइँ गरेको बताएका छन्। नेपाली काँग्रेसका नेतासमेत रहेका सांसद गुरुङले नेताको आचरणकै कारण मुलुक बन्न नसकेको भन्दै नेता नै सच्चिनुपर्ने बताए।

नेताको व्यवहार नसच्चिएसम्म नेपालमा भ्रष्टाचार नरोकिने बताए। उनले सरकारले जनतालाई सेवा दिन सरकारी निकाय गम्भीर नभएको भन्दै उनले सरकारी सुविधा पनि नेताका लागि मात्रै भएको बताए।

उनले भने, ‘गरिब जनताको स्वास्थ्य उपचार तथा अरू कुनै कामका लागि आर्थिक सहयोग दिनुपर्‍यो भने सरकारले पालिकाको सिफारिस ल्याऊ भन्छ। सिफारिस ल्याए पनि निकासा हुँदैन। तर नेताका लागि कुनै सिफारिस चाहिँदैन सजिलै पाउँछ। यो अवस्था किन रु यसलाई सुधार गर्नुपर्छ।’

काठमाडौँ– राष्ट्रियसभाको उपाध्यक्ष पदमा सत्ता गठबन्धनको तर्फबाट नेकपा माओवादी केन्द्रकी उर्मिला अर्यालले उम्मेदवारी दर्ता गराएकी छन् ।

आइतबार नयाँ बानेश्वरस्थित संघीय संसद सचिवालयको अन्तर्राष्ट्रिय सम्मेलन केन्द्रको ल्होत्से हलमा पुगेर उनले उम्मेदवारी दर्ता गरेकी हुन् ।

मनोनयनका लागि साँझसम्मको समय छ । रिक्त पदको यही माघ २५ गते उपनिर्वाचन हुँदैछ ।

काठमाडौँ – नेपाली काँग्रेसका सांसद तेजुलाल चौधरीले जातिय आधारमा सरकारले थारुहरूको भावनामाथि दमन गरिरहेको भन्दै प्रश्न उठाएका छन् । आइतबार प्रतिनिधिसभाकोे बैठकमा शून्य समयमा बोल्दै उनले यस्तो प्रश्न उठाएका हुन् ।

उनले भने, ‘थारुहरूको भावनामाथि सरकारले किन दमन गरिरहेको छ ? टिकापुर घटना नेपालमा राजनीतिक आन्दोलनका घटनाहरूमध्ये त्यस्तो ठूलो घटना होइन, हामीले थुप्रै घटनाहरु देखेका छौँ, बसमा गुडिरहेका ५० औं यात्रीलाई बमले उडाइएको छ । त्यस्तो घटनामा दोषीले उन्मुक्ति पाउने, अनि थारुहरूले आफ्नो पहिचानको लागि संघर्ष गर्दा उनीहरूलाई दमन गर्ने र जेलमा थुन्ने गरिएको छ, यो न्यायसंगत भएन ।’

नागरिक उन्मुक्ति पार्टीका सांसदहरूले संसद्मै यस्तो माग गर्दै आएका छन् भने अन्य दलका सांसदहरूले पनि यो विषयमा आवाज उठाउन थालेका छन् ।

काठमाडौँ – नेकपा एमालेका अध्यक्ष केपी शर्मा ओलीले आज संसदमा समसामयिक राजनीतिको विषयमा सम्बोधन गर्दैहुनुहुन्छ ।

बालकोट स्रोतका अनुसार अध्यक्ष ओलीले विगतमा नेकपा र एमालेको सरकारले अघि बढाएका राम्रा कामहरुको विवरण र वर्तमान सरकारले अघि बढाउन चाहेका विकास र समृद्धिका कार्यक्रमहरुको चर्चा गर्नुहुनेछ ।

सम्बोधनमा अध्यक्ष ओली काँग्रेसप्रति आक्रामक ढंगले प्रष्तुत हुनुहुने स्रोतको भनाइ छ । उहाँले काँग्रेसका सरकारले गरेका अनियमितता,भ्रष्टाचार र गैह्र संवैधानिक कामहरुको भण्डाफोर गर्ने तयारी छ । वर्तमान राजनीतिलाई गिजोल्न काँग्रेसले गरिरहेको प्रयास र यसका सुत्राधारहरुका बारेमा समेत अध्यक्ष ओलीले आजको सम्बोधनमा समेट्ने जनाइएको छ ।

काठमाडौं – नेपाली कांग्रेसका नेताहरुले दिवंगत पूर्वगभर्नर हिमालय शमशेर जबराप्रति पार्टीको झण्डा ओढाएर श्रद्धाञ्जली अर्पण गरेका छन् ।

पार्टी सभापति शेरबहादुर देउवा, महामन्त्री गगन थापा, सुनिलबहादुर थापा, प्रकाशमान सिंह लगायतका नेताहरुले जबराको बबरमहलस्थित निवास पुगेर श्रद्धाञ्जली अर्पण गरेका हुन् ।

नेपाल राष्ट्र बैंकका पहिलो गभर्नर जबराको ९५ वर्षको उमेरमा आज बिहान निधन भएको हो । स्वासप्रश्वास सम्बन्धी समस्याबाट पीडित जबरा काठमाडौंको थापाथलीस्थित नर्भिक अस्पतालमा उपचाररत थिए ।