Author: nepal one

काठमाडौँ, ६ पुसः संयुक्त राष्ट्रसङ्घले घोषणा गरेको विश्व ध्यान दिवस आज नेपालमा पनि विभिन्न धार्मिक, आध्यात्मिक, सांस्कृतिक एवं सामाजिक संस्थाले मनाउँदै छन् ।

डिसेम्बर ६, २०२४ मा संयुक्त राष्ट्रसङ्घको महासभाले २१ डिसेम्बरलाई विश्व ध्यान दिवसको रूपमा घोषणा गरेको थियो । विश्व ध्यान दिवसका अवसरमा विश्वव्यापी रुपमा ३२ घण्टासम्म लगातार ध्यान कार्यक्रम आयोजना गरिने भएको छ ।  

राष्ट्रसङ्घले ऐतिहासिक मान्यता दिई हरेक वर्ष डिसेम्बर २१ मा विश्व ध्यान दिवस मनाउने निर्णयको यस क्षेत्रमा काम गर्ने विभिन्न संस्थाले स्वागत गरेका छन् ।  

नेपाल सरकारले पनि आज ध्यान दिवस मनाउने जनाएको छ । यस अवसरमा देशभरका योग, ध्यानलगायत आध्यात्मिक क्षेत्रमा काम गर्ने सङ्घ संस्थाले विभिन्न कार्यक्रम आयोजना गरिएको छ । नेपाल महर्षि वैदिक फाउन्डेसन अन्तर्गतका ध्यान केन्द्र, ग्लोवल मदर डिभाइन तथा देशभर सञ्चालित ९० वटा गुरुकुलमा आज बिहानको रुद्राभिषेक पछि ८ः४५ बजे सामूहिक ध्यानको आयोजना हुने फाउन्डेसनका अध्यक्ष दीपकप्रकाश बास्कोटाले जानकारी दिनुभयो ।

यसैगरी जीवन विज्ञान, पतञ्जली संस्था, ब्रह्मकुमारी राजयोग सेवा केन्द्रलगायत संस्थाले विभिन्न कार्यक्रम आयोजना गरी विश्व ध्यान दिवस मनाउने जनाएको छ ।

बाजुरा,६ पुस : जिल्लाको पूर्वी उत्तरी भेगको जगन्नाथ गाउँपालिकाको गोत्री केन्द्रविन्दु बनाएर पाँच दशमलव २ रेक्टर म्याग्नेच्युडको भूकम्प गएको छ ।

भूकम्प मापन केन्द्र सुर्खेतका अनुसार शनिबार बिहान ४ बजेर १४ मिनेटमा भूकम्प गएको हो । भूकम्प गएपछि जिल्ला सदरमुकाम मार्तडीमा स्थानीय घरबाहिर निस्केका थिए । भूकम्प गएपछि स्थानीयले घर बाहिर निस्किदै होहल्ला गरेका हुन् ।

पुनः भूकम्प आउने डरले स्थानीय त्रासमा रहेका छन् । भूकम्प गएपछि क्षतिको के कति भयो, भन्नेबारेमा यकिन हुन सकेको छैन ।

काठमाडौँ, ५ पुसः संयुक्त राष्ट्रसङ्घले घोषणा गरेको विश्व ध्यान दिवसका अवसरमा शनिबार विश्वव्यापी रूपमा ३२ घण्टासम्म लगातार ध्यान कार्यक्रम आयोजना गरिने भएको छ ।

विश्व ध्यान दिवसका अवसरमा संयुक्त राष्ट्रसङ्घको विशेष कार्यक्रम आज (२० डिसेम्बर २०२४) मा न्युयोर्क सिटीमा आयोजना हुँदैछ । कार्यक्रमको प्रमुख वक्ता डा टोनी नादर हुनुहुन्छ । उहाँ हार्वर्ड–प्रशिक्षित स्नायुविज्ञानी र भावातीत ध्यानको संस्थाका विश्वव्यापी प्रमुख हुनुहुन्छ । 

डा नादरले २१ डिसेम्बरमा एक अद्वितीय, निरन्तर चल्ने वैश्विक सामूहिक ध्यानको कार्यक्रम पनि सञ्चालन गर्नुहुने नेपाल महर्षि वैदिक फाउन्डेसनले आज यहाँ आयोजना गरेको पत्रकार सम्मेलनमा जानकारी गराएको छ । कार्यक्रममा विश्वभरिका ध्यानीहरू बिहान ८ बजे र साँझ ५ बजे (म्यानमारदेखि नेपाललगायत अफगानिस्तानसम्मका देशमा बिहान ८ः४५ बजे र साँझ ५ः४५ बजे) स्थानीय समयमा ध्यान गर्नेछन् । यसबाट शान्तिको निरन्तर लहर पृथ्वीभर फैलने विश्वास गरिएको फाउन्डेसनका अध्यक्ष एवं पूर्वगृह राज्यमन्त्री दीपकप्रकाश बास्कोटाले बताउनुभयो । 

विश्वव्यापी सामूहिक ध्यान न्युजिल्यान्डबाट सुरु भएर पश्चिमतर्फ बढ्दै ३२ घण्टासम्म चल्नेछ र हवाईमा पुगेर समाप्त हुनेछ । डा नादरले विश्वभरका जुनसुकै विधिका सबै ध्यानीलाई सामूहिक प्रयासमा भाग लिन आग्रह गर्नुभएको छ । ध्यानका माध्यमबाट विश्व शान्ति स्थापनामा सहयोग पुग्ने उहाँको विश्वास छ ।

ध्यानको गहन प्रभावलाई मनुष्य एवं समाजको भलाइमा उपयोग गर्न सकिन्छ ।  विश्वव्यापी शान्ति स्थापनाका लागि ध्यानको प्रभाव उपयोगी हुने तथ्य विश्वका दुई सयभन्दा बढी विश्वविद्यालयमा गरिएको करिब सात सय ५० भन्दा धेरै वैज्ञानिक अनुसन्धानले प्रमाणित गरेको अध्यक्ष बास्कोटाले बताउनुभयो । यो वैश्विक कार्यक्रमले ध्यानमार्फत शान्ति स्थापना गर्ने उद्देश्य राख्दछ ।

डिसेम्बर  ६, २०२४ मा संयुक्त राष्ट्रसङ्घको महासभाले २१ डिसेम्बरलाई विश्व ध्यान दिवसका रूपमा घोषणा गरेको थियो । नेपाल, भारत, श्रीलङ्का, लिचटेनस्टाइन, एन्डोरा र मेक्सिको गरी छ देशको समूहले विश्व ध्यान दिवसको प्रस्ताव गरेका थिए । प्रस्तावलाई एक सय ९३ सदस्य राष्ट्रले सर्वसम्मत समर्थन गरेका हुन् । 

विश्व ध्यान दिवसको महत्वलाई भावातीत ध्यानमा गरिएको वैज्ञानिक अनुसन्धानले बल प्रदान गरेको छ । यसले हिंसा र सङ्घर्षजस्ता नकारात्मक समाजिक प्रवृत्तिलाई घटाउन, शान्ति र भलाइको प्रवर्द्धन गर्न मद्दत गर्ने तथ्य  प्रमाणित गरेको छ । दुई सयभन्दा बढी विश्वविद्यालयमा गरिएको सात सय ५० बढी अध्ययनले भावातीत ध्यानको प्रभावकारिता प्रमाणित गरेको फाउन्डेसनले जनाएको छ ।

विशेष गरी सामूहिक रूपमा ध्यानको अभ्यास गर्दा यसको प्रभाव गुणात्मक हुने गर्दछ । डा नादरका अनुसार सामूहिक भावातीत ध्यानले समाज र विश्वमा दीर्घकालीन शान्ति ल्याउँछ । संयुक्त राष्ट्रसङ्घको यो पहलले मनको शक्तिमा विश्वास राख्दै शान्ति स्थापनाका लागि काम गर्न चाहेको उहाँले बताउनुभयो । युनेस्कोले यसलाई भनेको छ, “युद्ध मानिसको मनमा सुरु हुन्छ र शान्तिको रक्षा पनि त्यही मनमा स्थापना गर्नुपर्छ ।”

भविष्यमा संसारभर ठूला, स्थायी ध्यानी समूह स्थापना गरी सामूहिक चेतनामा पर्याप्त सहसम्बद्धता स्थापित गरेर विश्वमा दीर्घकालीन शान्ति ल्याउनु डा नादरको लक्ष्य रहेको फाउन्डेसनका अध्यक्ष बास्कोटाले बताउनुभयो । विद्यालय, कार्यालय र सैन्य समूहजस्ता विभिन्न स्थानमा हरेक दिन ध्यान अभ्यास गराएर शान्तिपूर्ण संसारको निर्माण गर्ने उहाँको लक्ष्य रहेको पत्रकार सम्मेलनमा उहाँले जानकारी दिनुभयो । 

वैदिक सनातनी परम्परामा रहेको दैनिक जीवनको अभिन्न अङ्ग ध्यानलाई विश्वले आत्मसात् गरेकामा गौरवको विषय बनेको छ । फाउन्डेसनले डिसेम्बर २१ अर्थात् पुस ६ गते शनिबार बिहान ८ः४५ बजेदेखि महर्षि वैदिक इन्स्टिच्युट, ब्रह्मानन्द सरस्वती ग्राम चम्पादेवीमा सामूहिक भावातीत ध्यानसहितको कार्यक्रम आयोजना गरिएको अध्यक्ष बास्कोटाले जानकारी दिनुभयो । 

महर्षि अभियानको विश्वव्यापी संस्था विश्व शान्ति राष्ट्रम्ले पनि प्रत्येक देशको समयका आधारमा लगातार ३२ घण्टासम्म सामूहिक भावातीत ध्यान तथा सिद्धिको अभ्यासको कार्यक्रम तय गरेका छन् । सबै ध्यानी तथा सिद्धलाई भावातीत ध्यान केन्द्रले आयोजना गरेको सामूहिक ध्यानमा सहभागी हुन फाउन्डेसनले सार्वजनिक आह्वान गरेको छ । 

सामूहिक ध्यानमा सहभागी हुन अनुकूल नभएमा ‘जुम’ प्रविधिमार्फत् अनलाइनबाट अन्तर्राष्ट्रिय सामूहिक ध्यानमा सहभागी हुन सकिने जनाइएको छ । नेपाल महर्षि वैदिक फाउण्डेसनले सबै ध्यानीलाई यस ऐतिहासिक कार्यक्रममा पायक पर्ने स्थानमा सामेल भई सहभागी हुन आह्वान गरेको छ  ।

प्राचीनतम् सदा स्वतन्त्र गोरक्षक भूमि नेपालबाटै योग तथा ध्यानको आविर्भाव भएको गौरवमय सनातनी परम्परा छ । राष्ट्रसङ्घले ऐतिहासिक मान्यता दिई हरेक वर्ष डिसेम्बर २१ मा विश्व ध्यान दिवस मनाउने निर्णयको फाउन्डेसनले स्वागत गरेको छ । नेपालमा नेपाल महर्षि वैदिक फाउण्डेशनको अगुवाइमा सन् २००० देखि अविच्छिन्न भावातीत ध्यान अभ्यास भइरहेको छ । यो विधि महर्षि महेश योगीको विश्व शान्ति अभियानको प्रमुख विधा हो ।

सङ्घीय सरकारले पनि डिसेम्वर २१ मा ध्यान दिवस मनाउने जनाएको छ ।  यस अवसरमा देशभरका भावातीत ध्यान केन्द्र, ग्लोवल मदर डिभाइन तथा देशभर सञ्चालित ९० वटा गुरुकुलमा शनिबार बिहानको रुद्राभिषेक पछि ८ः४५ बजे सामूहिक ध्यानको आयोजना हुने जानकारी पत्रकार सम्मेलनमा गराइएको थियो ।

तिलाठी (सप्तरी), ५ पुसः सप्तरीमा चार सयभन्दा बढी बोरा रासायनिक मल जफत गरिएको छ ।
बजार अनुगमन टोलीले मङ्सिर १९ देखि पुस ३ गतेसम्ममा चार सय पन्ध्र बोरा मल जफत गरेको हो । यही पुस ३ गते बुधबार टोलीले बोदेबरसाइन नगरपालिका–५ मा माँ डाक्नेश्वरी टे«डर्समा छापमारी ५६ बोरा रासायनिक मल जफत गरेको सहायक प्रमुख जिल्ला अधिकारी जितेन्द्रकुमार यादवले बताउनुभयो ।

उहाँका अनुसार डाक्नेश्वरी नगरपालिका–५ मा दर्ता रहेको उक्त टेड्रर्सले कालोबजारी गरी मल बिक्री गर्दै आएको थियो । मङ्सिर १९ गते डाक्नेश्वरी नगरपालिका–९ को आदर्श ट्रेडर्स एन्ड सप्लायर्सबाट दुई सय बीस बोरा र हनुमाननगर कङ्कालिनी नगरपालिका–७ का सत्यनारायण यादवको घरबाट मङ्सिर २६ गते एक सय ३९ बोरा मल जफत गरिएको थियो । जफत गरिएको मल साल्ट ट्रेडिङको अनुदान प्राप्तमध्यकै रहेको सहायक प्रमुख जिल्ला अधिकारी यादवले बताउनुभयो । सो मल जफत गर्ने बेला सम्बन्धित व्यक्ति नभेटिएकाले कोही पनि पक्राउ नपरेको उहाँले जानकारी दिनुभयो । 

अनुगमनका क्रममा बिल बीजकबिना कारोबार गर्दैआएका चारवटा संस्थालाई जरिवानासमेत गरिएको छ । हनुमाननगर कङ्कालिनी नगरपालिका–९ को नर्सिङ कृषि संस्था लिमिटेड, जयबाबा गणिनाथ उपभोक्ता संस्था लिमिटेड, हंस उपभोक्ता संस्था लिमिटेडलाई रु पाँच हजार र कृति टेड्रर्स राजविराजलाई रु बीस हजार जरिवाना गरिएको सहायक प्रमुख जिल्ला अधिकारी यादवले बताउनुभयो । “जरिवाना गरिएकाहरूले जरिवाना बुझाइसकेका छन् । मल जफत गरिएका संस्थाका व्यक्तिहरू तत्काल नभेटिएकाले त्यसमा कानुनबमोजिम कारबाही अगाडि बढाइएको छ ।”

दाङ, ५ पुस : लुम्बिनी प्रदेश राजधानी राप्ती उपत्यका देउखुरीमा आवश्यक भौतिक संरचना निर्माणको काम अन्तिम चरणमा पुगेको छ । यहाँ मुख्यमन्त्री कार्यालयसहित अन्य नौ वटा मन्त्रालयका कार्यालय भवन निर्माण भइरहेका छन् ।

प्रदेश राजधानी निर्माण आयोजना कार्यान्वयन एकाइ कार्यालय दाङका सूचना अधिकारी इञ्जिनियर प्रदीप भट्टराईले भौतिक संरचना निर्माण गरी रङ्गरोगनसहित पहिलो चरणका काम सम्पन्न भएका बताउनुभयो । “पहिलो चरणमा भौतिक संरचना निर्माण तथा रङ्गरोगनका काम सकिएका छन् । अब अन्तिम चरणका काम बाँकी छन्”, उहाँले भन्नुभयो, “त्यसबाहेक भवन आसपासमा सडक विस्तार, ढल निकास, नाली, फुटपाथ, सडकबत्ती जडानका काम भइरहेका छन् ।”

यहाँ विसं २०७९ फागुन ३ गते भवन निर्माणका लागि सिलान्यास गरिएको थियो । आगामी वर्षको पुसमा निर्माण सक्ने सम्झौता भए पनि त्यसअघि नै सक्ने गरी काम भइरहेको भट्टराईले बताउनुभयो । उहाँका अनुसार भ्याटबाहेक रु तीन अर्ब नौ करोड एक लाख २९ हजारमा शर्मा सगुन जेभी काठमाडौँले यहाँ निर्माणको काम गरिरहेको छ ।

विसं २०७७ असोज २० गते बुटवलमा बसेको प्रदेशसभा बैठकले यहाँ स्थायी राजधानी तोकेको थियो । दाङको राप्ती गाउँपालिका, गढवा गाउँपालिका वडा नं १, २ र ३ तथा अर्घाखाँचीको सितगङ्गा नगरपालिका वडा नं ८ र ९ लाई केन्द्र मानेर स्थायी राजधानी तोकिएको थियो ।

तत्कालीन मुख्यमन्त्री शङ्कर पोखरेलको पालामा स्थायी राजधानी यहाँ तोकिए पनि लामो समयसम्म बुटवलबाटै कामकाज भयो । मुख्यमन्त्रीमा कुलप्रसाद केसी आएपछि भने विसं २०७९ मङ्सिर १९ मा राप्ती गाउँपालिका–३ लालमटियामा रहेको राप्ती प्राविधिक शिक्षालयको भवनमा मुख्यमन्त्री कार्यालय सारेर कार्यसञ्चालन गरिएको थियो ।

त्यसपछि यहाँ प्रदेशसभा भवन निर्माण कार्यले तीव्रता पायो भने मन्त्रालयका संरचनाका काम अघि बढे । “सुरुआतमा हामीले केही मन्त्रालय भाडाका भवनमा र केही वडा कार्यालयबाट सञ्चालन ग¥यौँ । त्यसपछि लगतै मन्त्रालय निर्माणको काम अघि बढायौँ”, पूर्वमुख्यमन्त्री कुलप्रसाद केसीले भन्नुभयोे ।

राप्ती गाउँपालिका–३ लालमटियास्थित राप्ती प्राविधिक शिक्षालयलाई सरस्वती माविमा स्थान्तरण गरिएपछि मात्रै यहाँ नयाँ संरचना निर्माणको काम अघि बढेको हो ।

हाल शिक्षालयका भवनलाई व्यवस्थापन गरी मुख्यमन्त्री कार्यालयसहित मन्त्रालयको व्यवस्थापन गरिएको छ । ११ मध्ये केही मन्त्रालय कार्यालय परिसरभन्दा बाहिर छन् । उद्योग, पर्यटन तथा यातायात मन्त्रालय राप्ती गाउँपालिकाको कार्यालय भवनमा छ भने कृषि, भूमि तथा सहकारी मन्त्रालय राप्ती गाउँपालिका–१ को कार्यालय भालुवाङमा छ । यस्तै स्वास्थ्य मन्त्रालय सिसहनियास्थित वडा कार्यालय भवनबाट सञ्चालन भइरहेको छ ।