Author: Reporter

काठमाडौँ । प्रधानमन्त्री पुष्पकमल दाहाल ‘प्रचण्ड’ले प्रतिनिधिसभाको आजको बैठकमा प्रस्तुत गरेको विश्वासको मतको प्रस्ताव बहुमतले अस्वीकृत भएको छ ।

प्रधानमन्त्री दाहालद्वारा नेपालको संविधान २०७२ को धारा १०० को उपधारा (२) बमोजिम प्रस्तुत प्रस्तावमाथि शुक्रबार बैठकमा भएको मतदानको परिणाम घोषणा गर्दै सभामुख देवराज घिमिरेले सभामा तत्काल कायम रहेको सङ्ख्याको बहुमतले सो प्रस्ताव अस्वीकृत भएको जानकारी गराएका थिए ।

मतदानमा कुल दुई सय ५८ सदस्यले भाग लिएकामा प्रधानमन्त्रीले राखेको विश्वासको मतको प्रस्तावका पक्षमा नेपाल कम्युनिष्ट पार्टी (माओवादी केन्द्र), राष्ट्रिय स्वतन्त्र पार्टी र नेपाल कम्युनिष्ट पार्टी (एकीकृत समाजवादी)का सांसदको गरी जम्मा ६३ मत परेको थियो भने विपक्षमा नेपाली कांग्रेस, नेपाल कम्युनिष्ट पार्टी (एमाले), राष्ट्रिय प्रजातन्त्र पार्टी, जनता समाजवादी पार्टी (जसपा) नेपाल र जनता समाजवादी पार्टीलगायत दलका गरी एक सय ९४ मत खसेको थियो ।

मतदानमा एक सदस्य तटस्थ रहेका थिए । प्रधानमन्त्रीको विश्वासको मत अस्वीकृत भएसँगै संविधानबमोजिम नयाँ सरकार गठनको प्रक्रिया अगाडि बढ्नेछ । योसँगै प्रचण्ड सरकार १९ महिनामा ढलेको छ ।

उनी २०७९ पुस १० मा प्रधानमन्त्री बनेका थिए । प्रधानमन्त्री नियुक्त भएको १५ दिनपछि प्रचण्डले पहिलोपटक २०७९ पुस २६ गते प्रतिनिधिसभाको बैठकमा विश्वासको मत लिएका थिए।

प्रतिनिधिसभाका २७० जना सांसदमध्ये २६८ जनाले विश्वासको मत दिएका थिए। दुईजना सांसदले विपक्षमा मतदान गरेका थिए । अब कांग्रेस र एमालेको गठबन्धनबाट नेकपा एमालेका अध्यक्ष केपी शर्मा प्रधानमन्त्री बन्नेछन् ।

काठमाडौं । उपप्रधान तथा गृहमन्त्री रवि लामिछानेले अनुसन्धानको घेरामा परेपछि नेकपा एमाले र कांग्रेसले रातारात सहमति गरेको आरोप लगाएका छन् ।

शुक्रबारको प्रतिनिधिसभाको बैठकमा गृहमन्त्री लामिछानेले अनुसन्धानको सुई कसैको घरको ढोकामा ढकढक्याउन पुगेपछिसंविधानको  याद आएको भन्दै कटाक्ष गरेका हुन् । उनले केही नियुक्ति, बेचन झा र प्रतिक थापाको पक्राउ बाहेक सरकार ढल्नुको अर्को कारण नभएको जिकिर गरे ।

उनले विपद्को बेला जनता बचाउनका लागि सत्तामै बसेको स्पष्ट पारे । उनले प्रश्न गरे, ‘हामीलाई आशंका छ एकाएक सहमतिमा पुग्नुपर्ने अवस्था कसरी पुग्यो ? रातारात संविधानको चिन्ता कसरी भयो ? जब अनुसन्धानको सुई कसैको घरको ढोकामा ढकढक्याउन पुग्यो संविधानको याद आयो ?’

गृहमन्त्री लामिछानेले दुई चारजना नेतालाई बाहेक सहमतिको जानकारी अरु कसैलाई नभएको भन्दै मध्यरातमा व्यापारीको घरमा बसेर गरिएको सहमति राष्ट्रिय सहमति कदापी नहुने बताए ।

उनले भने, ‘सदनमा जोडतोडका साथ सहमतिको कुरा चल्यो । तर दुःखका साथ भन्नुपर्छ । एक दुई जना नेता बाहेक सहमति भएको अरु कुनै नेतालाई थाहा छैन । बिना जानकारीको सहमति न राष्ट्रलाई थाहा छ न देश, जनता र आफ्ना दलका नेतालाई थाहा छ ।’

उनले आफूलाई सहकारी प्रकरणमा दोषी ठहर गरी जेल हाल्न चुनौती दिए । उनले सहकारी छानबिन समितिमा अब त बहुमत पुग्यो होला भन्दै आफूलाई दोषी ठहर गर्न चुनौती दिए । उनले दोषी भए आफू जेल जान तयार रहेको समेत बताए । उनले आफ्नो कार्यकालमा एक मात्र उद्घाटन बाँकेमा जेलको गरेको भन्दै जेलमा बस्न तयार रहेको बताए ।

काठमाडौँ । नेकपा एमालेका सचिव योगेश भट्टराईले प्रधानमन्त्री प्रचण्डलाई अब विद्रोह र प्रतिरोधको कुरा नगर्न आग्रह गरेका छन् ।

प्रतिनिधिसभाको शुक्रबारको बैठकमा प्रधानमन्त्री पुष्पकमल दाहाल प्रचण्डले राखेको विश्वासको मतको प्रस्तावमाथिको छलफलमा भाग लिँदै सचिव भट्टराईले अब विद्रोहको सम्भावना नरहेको बताएका हुन् । उनले सदनबाटै सबै समस्याको समाधान खोज्नुपर्ने बताए ।

प्रधानमन्त्रीले संविधान संशोधन गर्दा जाति, भाषा, धर्म, संस्कृति, मधेस, दलित, महिलाहरुको अधिकार कटौती नगर्न चेतावनी दिएका थिए ।

भट्टराईले भने, ‘तपाईँ कहाँ जानुहुन्छ ? प्रतिरोध गर्नुहुन्छ ? विद्रोह हुन्छ ? अब सम्भव छैन त्यो बाटो छैन, तपाईं पनि यही हलभित्रै हो । जाति, भाषा, धर्म, संस्कृति, मधेस, दलित, महिला आज झल्झली प्रधानमन्त्रीलाई याद भयो । तपाईंका लागि हतियार बोक्ने रोल्पाका मगर कहाँ छन् ? तपाईंको लागि हतियार बोकेका तमाम दलित युवा कहाँ छन्, खोज्नभो ?’

उनले संविधान संशोधनमार्फत अग्रगमनको बाटोमा जाने बताए । उनले भने, ‘सम्पूर्ण नेपालीलाई हामी विश्वस्त गर्न चाहन्छौं संविधानको पुनरावलोकन, संविधान संशोधन २०७२ सालको संविधानको अग्रगमनको लागि हो । पश्चगमनको लागि होइन, पछाडि फर्किनका लागि होइन ।’

उनले प्रचण्डलाई आफूलाई अनुकुल हुँदा एउटा र प्रतिकूल हुँदा अर्को व्याख्या नगर्न चेतावनी दिए । सचिव भट्टराईले एमाले अध्यक्ष केपी शर्मा ओली १२ बुँदे सम्झौताका मस्यौदाकार रहेको नबिर्सन आग्रह गरे।

उनले भने,’एमाले अध्यक्ष केपी शर्मा ओली १२ बुँदे सम्झौताका मस्यौदाकार हुनुहुन्थ्यो। एक जना मस्यौदाकार एमालेको तर्फबाट उहाँ हो । शेरबहादुर देउवा पनि थुनामा हुनुहुन्थ्यो १२ बुँदे सम्झौतामा हस्ताक्षर गर्नु भएको होइन र ?’

संविधान निर्माण र राजनीतिमा माओवादीको योगदान भएकाले नै संसदमा माओवादी भएको बताउँदै उनले ठूला ठूला हिंसात्मक आन्दोलन विलय भएको स्मरण गर्न आग्रह गरे ।

काठमाडौँ । नेपाली कांग्रेसले राजनीतिक स्थिरताका लागि कांग्रेस र एमाले एक ठाउँमा आएको बताएको बताएको छ ।

शुक्रबार प्रतिनिधिसभामा प्रधानमन्त्री पुष्पकमल दाहाल प्रचण्डले राखेको विश्वासको मतमाथिको प्रस्तावमाथिको छलफलमा भाग लिँदै कांग्रेस प्रमुख सचेतक रमेश लेखकले प्रधानमन्त्रीले तीन तीन महिनामा विश्वासको मत लिने अवस्था रोक्न नयाँ सहमति गरिएको स्पष्ट पारे ।

उनले सरकारमा बसेर फाइल खोल्छु भनेर स्टन्ट मात्र गरिएको भन्दै सुशासन कायम गर्न नसकेकाले सुशासन दिने काम गर्न नयाँ सहमति गरिएको बताए ।

उनले भने,’रोष्टममा उभिँदा साथीहरुले भ्रष्टाचार नियन्त्रण र सुशासन कायम गर्ने बडेबडे भाषण गरेको मैले सुनेको छु तर, व्यवहारमा भाषणबाहेक केही देखिएको छैन। स्टण्डको राजनीतिबाहेक केहि भएन। अर्कालाई धम्क्याउन, तर्साउनका लागि यी विषयहरु उठे तर यथार्थमा केही भएन। मुलुकमा कानुन बमोजिम भ्रष्टाचार नियन्त्रण गर्ने हो, कानुन बमोजिम सुशासन कायम गर्ने हो, त्यसमा सहमति भएको हो।’

उनले अग्रमनका लागि संविधान संशोधन गर्ने स्पष्ट पारे । प्रमुख सचेतक लेखकले नेपालको राजनीतिमा कांग्रेस रहेसम्म समावेशिता कमजोर नहुने दाबी गरे ।

उनले प्रधानमन्त्री प्रचण्ड पीडामा भएकाले थप टिप्पणी गरेर पीडा नदिने बताए । उनले प्रधानमन्त्री प्रचण्ड रोष्टममा उभिँदा प्रमुख प्रतिपक्षी दलको ठीक नेताका रुपमा आफूले देखेको बताए ।

उनले भने, ‘आज सम्माननीय प्रधानमन्त्रीजी प्रधानमन्त्रीकै रुपमा रोष्टममा उभिँदा प्रमुख प्रतिपक्षी दलको ठीक नेताका रुपमा देखिसकेको हुँदा अब संसदमा प्रतिपक्ष कमजोर हुन्न कि भन्ने लाग्छ ।’

काठमाडौं । प्रधानमन्त्री पुष्पकमल दाहाल प्रचण्डले सरकारको सफलता नै सरकार ढाल्ने आधार बनेको बताएका छन् । शुक्रबार प्रतिनिधिसभा बैठकमा विश्वासको मत माग्दै प्रधानमन्त्रीले आफूले भ्रष्टाचार गर्नेहरूसँग कुनै सम्झौता नगरी सुशासन स्थापित गर्ने काम गरेको दाबी गरे ।

प्रधानमन्त्री प्रचण्डले त्रिभुवन विश्वविद्यालयको जग्गा खोज्दा, ललिता निवास, भुटानी शरणार्थी प्रकरणको निष्पक्ष छानबिन गर्दा भ्रष्टाचार गर्नेहरू डराएको बताए ।

प्रधानमन्त्री प्रचण्डले बाँसबारीदेखि बाल मन्दिरसम्मका जमिन खोजी हुन थालेपछि देशको शक्ति सन्तुलन नै खल्बलिएको बताए । त्यही वर्गले पहिलो र दोस्रो ठूलो दल मिलाएको जिकिर गरे ।

उनले भने, ‘त्रिभुवन विश्वविद्यालयको जग्गा खोज्न थालियो, एउटा समूह डरायो । ललिता निवासको विस्तृत अनुसन्धान र जग्गा फिर्तीको प्रक्रिया सुरु भयो, अर्को समूह डरायो । भुटानी शरणार्थी प्रकरणको निष्पक्ष अनुसन्धान सुरु भयो, अर्को समूह डरायो । बाँसबारीदेखि बाल मन्दिरसम्मका जमिन खोजी हुन थालेपछि यो देशको शक्ति सन्तुलन नै खल्बलिएजस्तो भयो । त्यही वर्गले देशको पहिलो र दोस्रो ठूलो दल मिलायो ।’

उनले आफूले सुशासनको सङ्कल्प गरेको उल्लेख गर्दै जनताले आफ्नो शक्ति देखाउने समय आएको बताए । उनले कुनै यति, ओम्नी र गिरिबन्धुहरूको कलंक नबोकी पनि सरकार चलउन सकिन्छ भन्ने उदाहरण पेस गरेको बताए ।

उनले भने, ‘देशको एउटा विशेष वर्ग कानूनभन्दा माथि छ भन्ने भाष्य र त्यसले जनतामा जागेको असन्तोषलाई सम्बोधन गर्ने प्रयास गर्यो । कुनै यति, कुनै ओम्नी र कुनै गिरिबन्धुहरूको बोझ र कलङ्क नबोकी पनि सरकार चलाउन सकिन्छ भन्ने उदाहरण पेश गर्यो ।’

काठमाडौं । प्रधानमन्त्री पुष्पकमल दाहाल प्रचण्डले कांग्रेस र एमालेलाई डर र भयले जोडेको बताएका छन् । शुक्रबार सदनमा विश्वासको मत लिने प्रस्ताव प्रस्तुत गर्दै प्रधानमन्त्रीले कांग्रेस र एमालेलाई विश्वासले नभई डर र भयले जोडेको बताएका हुन् ।

प्रधानमन्त्रले कांग्रेस र एमालेलाई सुशासन कायम हुँदै जान थाल्यो भन्ने डरले जोडेको बताए । उनले आफूले सुशासनका लागि काम गर्नु नै सरकार ढाल्ने आधार बनेको भन्दै देश माफियाको हातमा जान लागेको बताए ।

उनले देश माफियाको हातमा जान लागेको भन्दै त्यसविरुद्ध उत्रिन जनतालाई आग्रह गरेका छन् । उनले भने, ‘फेरि देश माफियाकै हातमा जान लाग्यो । जनता जाग्नुस्, अब जनता जाग्ने बेला भयो ।’

उनले दुई दल मिलेर सरकारमात्र बनाउने मात्र नभइ रहस्यमय तरिकाले वर्तमान संविधानमाथि छेडछाडको घोषणा गरेको बताए ।

उनले भने, ‘उहाँहरु अत्यन्त रहस्यमय तरिकाले वर्तमान संविधानमाथि छेडछाडको घोषणा गर्दै हुनुहुन्छ। लामो संघर्ष र ठूलो बलिदानबाट जनताले प्राप्त गरेका अधिकार खोस्ने जमर्को गर्दै हुनुहुन्छ। तपाईंहरूको यात्रा प्रतिगमनतिर हो भन्ने कुरा तपाईहरूको सहमतिको तरिका, सहमति गरेको ठाउँ र सहमतिको समयबाट आम जनताले बोध गरिसकेका छन् । नियत सफा भए पहिलो र दोश्रो दल मिल्न अँध्यारो बन्द कोठा चाहिन्छ ? झूटमुट र कुतर्कको सहारा र मध्यरात चाहिन्छ?’

उनले आफू सरकारमा नभए पनि नक्कली भूटानी शरणार्थी प्रकरणसहितका काण्डको कसरी पटाक्षेप हुन्छ भनेर निगरानी गरिरहने बताए ।

काठमाडौँ । प्रधानमन्त्री पुष्पकमल दाहाल ‘प्रचण्ड’ले संविधानसभाबाट निर्मित संविधानमा नेपाल कम्युनिष्ट पार्टी (माओवादी केन्द्र) को सबैभन्दा ठूलो लगानी भएको उल्लेख गर्दै यसलाई माओवादीले कमजोर नबनाउने र बनाउन नदिने स्पष्ट पारेका छन् । 

प्रतिनिधिसभाको शुक्रबारको बैठकमा  विश्वासको मत लिने क्रममा प्रधानमन्त्रीले विश्वासको मतका लागि संविधानले प्रधानमन्त्रीलाई एक महिनाको समय दिएको भन्दै आउने दिनमा पनि संविधानको रक्षाका लागि आफू नेतृत्वको पार्टी निरन्तर लागिपर्ने बताए ।

‘यो संविधानमा माओवादी केन्द्रको सबैभन्दा ठूलो लगानी छ । त्यसैले यसलाई माओवादीले कमजोर बनाउँदैन र बनाउन पनि दिँदैन’, प्रधानमन्त्री दाहालले भने, ‘उत्पीडित वर्ग, क्षेत्र, लिङ्ग, समुदायको दशक लामो विद्रोह र त्यसपछिका आन्दोलनको जगमा बनेको यो संविधानलाई सडकमा पलेटी कसेर जनताको साथ लिएर बचाइएको हो र आउने दिनमा पनि त्यसरी नै बचाइने छ ।’

काठमाडौं । प्रधानमन्त्री पुष्पकमल दाहाल प्रचण्डले अल्पमतमा परेपछि संसद विघटन गर्ने बानी परेकाहरूले नै आफूलाई नैतिकताको पाठ सिकाएको बताएका छन् ।

शुक्रबार प्रतिनिधिसभा बैठकमा विश्वासको मतको प्रस्ताव पेस गर्दै प्रधानमन्त्री प्रचण्डले एमाले अध्यक्ष केपी ओलीप्रति लक्षित गर्दै अल्पमतमा पर्दा संसद विघटन गर्न बानी परेकाहरूले आफूलाई नैतिकताको पाठ सिकाउन आवश्यक नरहेको बताएका हुन् ।

उनले संविधान निर्माणमा नेकपा (माओवादी केन्द्र) को सबैभन्दा ठूलो लगानी भएको उल्लेख गर्दै यसलाई माओवादीले कमजोर नबनाउने र बनाउन पनि नदिने बताए । उनले विश्वासको मतका लागि संविधानले प्रधानमन्त्रीलाई एक महिनाको समय दिएको उल्लेख गर्दै आउने दिनमा पनि संविधानको रक्षाका लागि आफू नेतृत्वको पार्टी निरन्तर लागिपर्ने बताए ।

उनले भने, ‘यो संविधानमा माओवादी केन्द्रको सबैभन्दा ठूलो लगानी छ । त्यसैले यसलाई माओवादीले कमजोर बनाउँदैन र बनाउन पनि दिँदैन । यो संविधानलाई मध्यरातमा झम्टीझम्टी च्यात्न खोज्दा पनि सडकमा पलेटी कसेर जनताको साथ लिएर बचाइएको हो र आउने दिनमा पनि त्यसरी नै बचाइनेछ ।’

काठमाडौं । सरकारले सामाजिक सुरक्षा भत्ता लिन राष्ट्रिय परिचयपत्र लागु गर्ने निर्णय तत्कालका लागि स्थगन गरेको छ ।

बिहीबार बसेको मन्त्रिपरिषद् बैठकलेसामाजिक सुरक्षासम्बन्धी सेवा प्रदान गर्न राष्ट्रिय परिचयपत्र तत्काल अनिवार्य नगर्ने गरी गृह मन्त्रालयलाई निर्देशन दिने निर्णय गरेको सञ्चारमन्त्री रेखा शर्माले जानकारी दिइन् । उनले भनिन्, ‘सामाजिक सुरक्षासम्बन्धी सेवा प्रदान गर्न राष्ट्रिय परिचय पत्र लागू गर्ने निर्णय भएकोमा मुलुक विभिन्न स्थानहरूमा भएको वर्षा, बाढी र पहिरोका कारण सामाजिक सुरक्षा भत्ता प्राप्त गर्ने नागरिकलाई राष्ट्रिय परिचय पत्र बनाउन असहज परिस्थिति सिर्जना भएकाले तत्कालका लागि पत्र आवश्यक नपर्ने गरी पहल गर्न गृह मन्त्रालयलाई निर्देशन दिने निर्णय भएको छ ।’

सामाजिक सुरक्षा भत्ताका लागि राष्ट्रिय परिचय पत्र अनिवार्य भनेपछि विभिन्न जिल्लाका जिल्ला प्रशासन कार्यालयमा बृद्धबृद्धा सेवा लिन पुगेका थिए । सरकारको यो निर्णयको विरोध भएको थियो ।

त्यस्तै विभिन्न राजनीतिक दलले पनि सरकारलाई यो निर्णय बाध्यकारी नगर्न र समय थप गर्न आग्रह गरेका थिए । सरकारले पहिलो चरणमा देशका २८ जिल्लामा सामाजिक सुरक्षा भत्ता लिन राष्ट्रिय परिचय पत्र अनिवार्य रूपमा बनाउनुपर्ने बताएको थियो ।

त्यस्तै बैठकले बेपत्ता पारिएको छानबिन आयोग र सत्तनिरुपण तथा मेलमिलाप आयोगको कार्य अवधि थप गर्न बाधा अड्काउ पूरक आदेश जारी गर्ने निर्णय गरेको छ । आयोगको म्याद २०८२ साल असार मसान्तसम्म थप गर्न पूरक आदेश जारी गरी सूचना राजपत्रमा प्रकाशित गर्ने निर्णय गरेको प्रवक्ता शर्माले जानकारी दिइन् ।