काठमाडौँ / संघीय संसद्अन्तर्गतको संसदीय सुनुवाइ समितिले प्रस्तावित राजदूतको सुनुवाइलाई अघि बढाउने भएको छ ।

सिंहदरबारमा मंगलबार बसेको समिति बैठकले प्रस्तावित राजदूतबिरुद्धको उजुरीमा थप छलफल गर्न आवश्यक नरहेकाले आगामी बैठकमा राजदूतको सुनुवाइ सम्पन्न गर्ने निर्णय गरेको हो । प्रस्तावित राजदूतमाथिका उजुरुबारेको छलफलमा सांसदहरुले बेनामे र ठेगाना नखुली आएका उजुरीमाथि छलफल आवश्यक नरहेको धारणा राखेपछि आगामी बैठकले राजदूतको सुनुवाइ गर्ने समितिका ज्येष्ट सदस्य ज्ञानेन्द्रबहादुर कार्कीले जानकारी दिनुभयो । त्यस्तै उहाले राजदूत सिफारिस गर्दा समावेशी नभएको भन्ने विषयमा प्रश्न उठेकाले यस बिषयमा आगामी बैठकमा परराष्ट्रमन्त्री एनपी साउदसंग छलफल गर्ने निर्णय भएको बताउनुभयो ।

त्यसअघि बैठकमा समिति सदस्यहरुले पूर्ण विवरण नखोली आएका उजुरीहरुमाथि छलफल गर्न आवश्यक नरहेको धारणा राखेका छन् । समिति सदस्य जनार्दन शर्माले उजुरीहरुमाथि छलफल गर्न आवश्यक नरहेको तर समावेशीताका बिषयमा भने ध्यान दिनुपर्ने बताउनुभयो । उहाले लोकतान्त्रीक मूल्यमान्यताअनुसार चल्न सक्नुपर्ने बताउनुभयो ।

त्यस्तै प्रमुख सचेतक पदम गिरीले पूर्ण विवरण उल्लेख भएका उजुरीहरुमाथि मात्रै छलफल गर्नुपर्ने र वेनामे उजुरीलाई ध्यान दिन आवश्यक नरहेको बताउनुभयो ।

सरकारले गत असार २६ गते लोकबहादुर थापालाई न्यूयोर्कस्थित संयुक्त राष्ट्रका लागि स्थानीय नियोग, रामप्रसाद सुवेदी (स्वीट्जरल्याण्ड), सुधीर भट्टराई (फ्रान्स), घनश्याम लम्साल (कुवेत), तेजबहादुर क्षेत्री (संयुक्त अरब इमिरेट्स) र धनबहादुर वली (थाइल्याण्ड)का लागि राजदूतमा नाम सिफारिस गरी संसदीय सुनुवाइका लागि पठाएको थियो ।