मुग्लिन, (चितवन) – लुम्बिनी प्रदेशका प्रमुख अमिक शेरचनले एक अर्काको धर्म संस्कृतिलाई मर्यादित रुपले हेर्ने एवं महसुस गर्नुपर्ने बताउनुभएको छ । चितवनको नारायणी नदी किनारमा शुक्रबारदेखि सुरु भएको आदिवासी जनजाति सांस्कृतिक एवं व्यापारिक महोत्सवको उद्घाटन समारोहलाई सम्बोधन गर्दै शेरचनले हामी आदिवासी जनजाति मात्रै हौँ भनेर एकाङ्की दृष्टिकोणमा जान थाल्यौँ भने हिजो संविधानभन्दा माथि रहेका व्यक्तिले सञ्चालन गरेको पवृति दोहोरिने भन्दै मर्यादित रुपले एक अर्काको धर्म संस्कृतिलाई हेर्ने र महसुस गर्नुपर्ने बताउनुभएको हो ।

उहाँले भन्नुभयो, “नेपालमा बसोबास गर्ने जो सुकै हौँ जुनसुकै धर्म संस्कार संस्कृति मान्ने समुदाय छौँ । एकअर्काको धर्म संस्कृतिलाई मर्यादित रुपले हेर्ने र महसुस गर्ने कुराको विकास गर्न आवश्यक छ, देश सबै जातजातिको साझा हो ।”

देश निर्माणको लागि सबैको एकता र सहकार्य आवश्यक रहेको प्रमुख शेरचनको भनाइ छ । साथै प्रमुख शेरचनले आदिवासी जनजाति समुदायले आफ्नो अधिकारको लागि लडाइँ जारी राख्नुपर्ने बताउनुभयो । उहाँले भन्नुभयोे, “म २०१५ सालमा चितवन झरेको मान्छे हुँ । मैले अधिकार प्राप्तिका लागि आजसम्म पनि लडिरहेको छु, किनकि अधिकारको लडाइँ कहिल्यै नसकिने रहेछ, अधिकारकै लागि आवाज उठाउँदा पटकपटक अङ्गभङ्ग बन्नुपरेको छु ।” उहाँले यो महोत्सवले पहिचानको आवाज बोकेर गाउँगाउँ पुग्न मद्दत गर्ने विश्वास गर्नुभयो ।

भरतपुर महानगरपालिकाकी प्रमुख रेनु दाहालले भरतपुर भ्रमण वर्षलाई सहयोग पु¥याउन यो महोत्सवले ठूलो भूमिका खेल्ने विश्वास लिनुभयो । महोत्सव परिसरमा बनाइएको आदिवासी जनजातिको गाउँले महोत्सवको रौनक नै फरक तुल्याएको महानगर प्रमुख दाहालको भनाइ छ । उहाँले भन्नुभयो, “यहाँको गाउँ देख्दै गर्दा महानगरको पर्यटन विकासको लागि कुनै एक ठाउँमा आदिवासी जनजातिका गाउँ निर्माण गर्नुपर्ने सोच आएको छ, “भावी पुस्ताका लागि पनि अध्ययन गर्ने र सिक्ने थलो बनोस् आदिवासी जनजातिको गाउँले महोत्सवको रौनक नै फरक तुल्याएको छ ।”

महोत्सवले आदिवासी जनजाति समुदायको भाषा, कला र संस्कृति संरक्षण र सम्वर्द्धनमा टेवा पुग्ने आयोजक मूल समारोह समितिका संयोजक महेन्द्र दुराले बताउनुभयो । महोत्सवस्थलमा चितवनका ११ वटा आदिवासी जनजाति समुदायको जातीय पहिचान देखिएकाले घर निर्माण गरिएको संयोजक दुराले बताउनुभयो । नेपाल आदिवासी जनजाति महासङ्घ चितवनले आयोजना गरेको महोत्सव चैत १८ गतेसम्म चल्ने छ ।