काठमाडौं – प्रधानमन्त्री केपी शर्मा ओलीले आज भएको विमान दुर्घटनामा घाइते भएका क्याप्टेन मनीषरत्न शाक्यलाई भेट गरेपछि भावुक स्टाटस लेखेका छन् ।

उनले सामाजिक सञ्जालमार्फत अब यस्तो कहिल्यै नहोस् भन्दै दुर्घटनामा परेर ज्यान गुमाएकाको शोकमा भोलि झण्डा आधा झुकाउने निर्णय गरिएको जानकारी दिएका छन् ।

उनले लेखेका छन् – ‘अब यस्तो कहिल्यै नहोस् ! बिहानको हवाई दुर्घटनामा परी घाइते हुनु भएका क्याप्टेन मनीषरत्न शाक्यको स्थिति बुझ्न केहीबेर अगाडि केएमसी अस्पतालमा पुगेर फर्किएँ । उहाँलाई आइसीयुमा उपचार गरिएको छ। चिकित्सक र परिवारजनसँग उहाँको अवस्थाबारे जानकारी लिएँ । उहाँ खतरामुक्त हुनुहुन्छ। सरकारले दुर्घटनामा परेर ज्यान गुमाएकाको शोकमा भोलि झण्डा आधा झुकाउने निर्णय गरेको छ र दुर्घटनाको छानबिन गर्न समिति गठन गरेको छ।’