भक्तपुर, २२ साउनः गृहमन्त्री रमेश लेखकले सन् २०३० सम्ममा नेपालका प्रत्येक नागरिकले जोखिमको पूर्वसूचना प्राप्त गर्ने स्थितिको सुनिश्चितता गरिने बताउनुभएको छ ।

आज नगरकोटमा आयोजना गरिएको सबैका लागि पूर्वसूचना राष्ट्रिय कार्याशालामा उहाँले अबको पाँच वर्षभित्रमा नेपालको प्रत्येक नागरिकले पूर्वसूचना पाउने सुनिश्चितता गरिने बताउनुभएको हो ।

गृहमन्त्री लेखकले भन्नुभयो, “जुन ठाउँमा हामीले पूर्वसूचना दिनसक्यौँ त्यस ठाउँमा भारी वर्षा भएर पनि मानवीय क्षति भएको छैन । जुन ठाउँमा पूर्वसूचना दिन सकेनाँै तुलनात्मक रुपमा कम वर्षा हुँदा पनि त्यस क्षेत्रमा मानवीय क्षति भएको छ ।”

हालै रसुवामा आएको बाढीबारे पूर्वजानकारी नहुँदा जनधनको क्षति भएको बताउँदै गृहमन्त्री लेखकले गत वर्ष कञ्चनपुरमा ७७ वर्षयताकै सबैभन्दा ठूलो वर्षा हुँदा पनि पूर्वसूचनाका कारण मानवीय क्षति नभएको उल्लेख गर्नुभयो ।

नेपालमा पनि एकतिहाइ जनसङ्ख्या प्रकृतिजन्य र जलवायुजन्य जोखिमको पूर्वसूचना बाहिर रहेको चर्चा गर्दै उहाँले पूर्वसूचना प्रणालीले मानवीय क्षति न्यूनीकरणमा सहयोग पुगेको बताउनुभयो । उहाँले विश्वमा मनसुनजन्य जोखिममा रहेका एक तिहाइ जनसङ्ख्या अझै पनि पूर्वसूचनाको पहुँचमा नरहेको तथ्याङ्क रहेको बताउँदै त्यसमा नेपाल पनि रहेको उल्लेख गर्नुभयो ।

संयुक्त राष्ट्रसङ्घले सन् २०२२ मा घोषणा गरेर २०२७ भित्र एक तिहाइ मानिसले पनि सूचना प्राप्त गर्नुपर्छ भनेको चर्चा गर्दै गृहमन्त्री लेखकले पूर्वसूचनाले सुरक्षा निकायलाई काम गर्न सहज भएको बताउनुभयोे ।

कार्यक्रममा सहभागीहरुले मनसुनजन्य विपद् रोक्न पूर्वसूचनाका साथै तीनतहका सरकारले चनाखो भएर लाग्नुपर्ने आवश्यकता औँल्याएका थिए । जोखिममा रहेका क्षेत्रको पहिचान गर्ने र सम्भावित जोखिम न्यूनीकरणका उपायलाई तीव्र बनाउनुपर्ने सहभागीहरुको भनाइ थियो ।