काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेले आज (सोमबार) हुने जेनजीको प्रदर्शनलाई समर्थन जनाएका छन् ।
सहकारी ठगीको अभियोगमा पुर्पक्षका लागि ललितपुरको नख्खु कारागारमा रहेका लामिछानेले सन्देश पठाउँदै ऐक्यबद्धता जनाएका हुन् ।

उनले लेखेका छन्, आजबाट तपाईहरू सडकमा ओर्लदै हुनुहुन्छ । तपाईहरुमध्ये धेरैको जीवनमा यो पहिलो सडक प्रदर्शन हुनुपर्छ ।शासकहरुले तपाईहरुलाई विधि र विवेकको शासन त दिएनन् नै, आफ्ना खुसी र दुःख, सफलता र असफलता बाँड्ने सामाजिक सञ्जालको सानो कुना पनि खोसे । सत्ता र शक्तिको नशामा चूर अनि घमण्ड र प्रतिशोधको आनन्दमा मग्न यिनीहरूलाई थाहा छैन, तपाईहरूको विवेक र आवेगसँग यो देशको इतिहास बदल्ने शक्ति छ ।’

उनले भनेका छन्, ‘आजको दिन इतिहासको नयाँ सुरुवातको दिन हो । घुसपैठ हुन सक्छ सचेत हुनुहोस्, उत्तेजित बनाउन सक्छन् विवेक प्रयोग गर्नुहोस् । तपाईको आफ्नो इतिहास र यो देशको इतिहास पनि तपाईकै हातबाट लेखिँदैछ । नख्खु जेलको कालकोठरीबाट म तपाईहरूप्रति शुभेक्षा, सदभाव र ऐक्यबद्दता प्रकट गर्दछु ।’