काठमाडौं । राष्ट्रिय स्वतन्त्र पार्टी (रास्वपा) की नेतृ सुमना श्रेष्ठले अहिलेको परिवर्तन एक सुरुवात मात्र भएको र देश निर्माणको लामो बाटो हिँड्न अझै बाँकी रहेको बताएकी छन् ।

नव नियुक्त प्रधानमन्त्री सुशीला कार्कीको शपथ ग्रहण समारोहमा भौतिक रूपमै उपस्थित भएर फर्केपछि नेतृ श्रेष्ठले सामाजिक सञ्जालमार्फत यस्तो धारणा राखेकी हुन् । उनले देशको पहिलो महिला प्रधानमन्त्रीलाई बधाई दिँदै ऐतिहासिक परिवर्तनको श्रेय जेन–जीलाई दिएकी छन् ।

जेन–जीको साहसको प्रशंसा गर्दै उनले लेखेकी छन्, ‘तपाईंहरुको अथाह साहस र संघर्षलाई सलाम । तर याद राख्नुहोस्, यो त तपाईहरुको सुरुवात मात्र हो । अझ लामो बाटो हिड्न बाँकी नै छ ।’ प्रमुख राजनीतिक दलका शीर्ष नेताहरूले शपथ ग्रहण समारोह बहिष्कार गरिरहेको बेला, सुमना भने शपथ समारोहमा सहभागी थिइन् ।