Tag: जेन–जी

काठमाडौं । जेन–जी शहीद परिवारले सरकार समक्ष तीन मन्त्रालयको माग गरेका छन् । आज (बिहीबार) राजधानीको संवाद डबलीमा शहीद परिवार संघर्ष समितिले पत्रकार सम्मेलन आयोजना गरी शहीदको रगतबाट बनेको सरकारले आफूहरूलाई नै बेवास्ता गरेकाले खबरदारीका लागि भए पनि आफूहरूको उपस्थिति क्याविनेटमा जरुरी भएको बताएका छन् ।

शहीद श्रीयाम चौलागाईका बुबा गणेश चौलागाईले प्रधानमन्त्री सुशीला कार्कीदेखि विभिन्न जेन–जी समूह कसैले पनि आफूहरुलाई वास्ता नगरेकोप्रति आक्रोश व्यक्त गरेका छन् । चौलागाईले विभिन्न मन्त्रालयहरूमा पटक–पटक ज्ञापनपत्र बुझाउँदा पनि सरकारबाट माग सम्बोधन नहुँदा आफूहरू पीडित र सहिद परिवारले गहिरो पीडा भोग्नुपरेको गुनासो गरेका हुन् ।

शहीद परिवार कमल सुवेदीले पटक–पटक शहीद परिवारलाई वर्तमान सरकारले पहिलो प्राथमिकतामा राख्नु पर्नेमा प्रधानमन्त्री तथा मन्त्रीहरुले भेट समेत नदिएको भन्दै आक्रोष पोखे । सुवेदीले आफ्ना परिवारका सदस्यहरुको रगतबाट बनेको सरकार र जेन–जीहरूले सहानुभूति समेत नदिएको गुनासो गर्दै भने, ‘हामीले हाम्रा परिवारका सदस्य गुमाएका छौं, त्यसैमा टेकेर वर्तमान सरकार बनेको छ, जेन–जीहरु विभिन्न समूह बनाउँदै हिँड्छन्, उहाँहरू आ–आफ्नै स्वार्थमा लिप्त हुनुहुन्छ ।’

जेन–जी शहीद परिवार संघर्ष समितिले सरकार समक्ष श्रम तथा रोजगार मन्त्रालयको लागि शहीद विजय चौधरीको दाजु दीपक चौधरी, खानेपानी मन्त्रालयमा शहीद इस्वत अधिकारीको आफन्त भोजविक्रम थापा र युवा तथा खेलकुद मन्त्रालयको लागि शहीद योगेन्द्र न्यौपानेको मामा कमल सुवेदीको नाम सिफारिस गरेको छ । समितिले सो माग ७ दिनभित्र सरकारले सम्बोधन नगरे सशक्त आन्दोलनमा उत्रिने चेतावनी दिएका छन् ।

काठमाडौं । जेन–जी समूहद्वारा दिइएको धम्कीपछि राजधानी काठमाडौंका प्रमुख संवेदनशील क्षेत्रहरूमा सोमबार रातिदेखि सुरक्षा सतर्कता उच्च बनाइएको छ । सुरक्षा चुनौतीको सम्भावनालाई ध्यानमा राख्दै आज (मंगलबार) बिहानदेखि प्रधानमन्त्री निवास बालुवाटार र अख्तियार दुरुपयोग अनुसन्धान आयोगको कार्यालय टंगालमा विशेष प्रहरी कमाण्डो टोली परिचालन गरिएको हो ।

बिहान ७ बजेदेखि नै ‘छनोट गरिएका’ प्रहरी अधिकृतहरूलाई रणनीतिक स्थानहरूमा खटाइएको प्रहरी स्रोतले जनाएको छ । भिडभाड बढेमा वा कुनै किसिमको सुरक्षा चुनौती उत्पन्न भएमा बल प्रयोग गर्ने तयारीसहित सुरक्षा टोली तैनाथ गरिएको छ ।

सुरक्षा रणनीतिमा कडाइ
प्रहरीका एक वरिष्ठ कमाण्डो अधिकारीका अनुसार सम्भावित भिड नियन्त्रणका लागि टोलीलाई प्रारम्भिक चेतावनी दिने, आवश्यक परे बल प्रयोग गर्ने अधिकार दिइएको छ । राजधानीमा शान्ति–सुरक्षाको अवस्था नियन्त्रण बाहिर जान नदिन सरकारले उच्चस्तरीय सुरक्षा रणनीति अपनाएको देखिन्छ ।

प्रधानमन्त्री, गृहमन्त्री र आईजीबीच राति बैठक
सोमबार राति प्रधानमन्त्री निवासमा प्रधानमन्त्री सुशीला कार्की, गृहमन्त्री ओमप्रकाश अर्याल र प्रहरी महानिरीक्षक (आईजी) चन्द्रकुवेर खापुङबीच सुरक्षा स्थितिबारे सोमबार राति उच्चस्तरीय छलफल भएको थियो । बैठकमा आईजी खापुङले जेन–जी समूहले प्रहरी मुख्यालयमै आएर धम्की दिएकोप्रति गम्भीर आपत्ति जनाएका थिए । प्रधानमन्त्री कार्कीले प्रहरीको मनोबल खस्किने कार्य स्वीकार्य नहुने स्पष्ट रूपमा बताएको जनाइएको छ ।

सुधन गुरुङको नेतृत्वमा सरकारविरुद्ध कडा दबाब
यसैबीच, ‘हामी नेपाल’ नामक समूहका संस्थापक सुधन गुरुङ नेतृत्वको टोलीले हिजो पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकविरुद्ध किटानी जाहेरी लिएर प्रहरीमा उपस्थित भएको थियो । तर प्रहरी पक्षले भदौ २३–२४ को घटनाको छानबिन जाँचबुझ आयोगमार्फत भइरहेको भन्दै जाहेरी लिन अस्वीकार गरेको थियो । यो अस्वीकृतिपछि गुरुङको समूह ‘सडकबाटै देखाइदिन्छौं’ भन्दै आन्दोलनको तयारीमा उत्रिएको छ ।

काठमाडौं । अन्तरिम सरकारका प्रधानमन्त्री सुशीला कार्कीले सरकारमा हुनेहरूको बुद्धि नपुगेका कारण जेन–जी पुस्ताहरूको ज्यान गएको बताएकी छन् । विजया दशमीको दिन जेन–जी युवा आन्दोलनका क्रममा ज्यान गुमाएका सहिद परिवारसँग भेट गर्दै उनले यस्तो बताएकी हुन्।

नहुनुपर्ने घटना भएको र आन्दोलनका क्रममा निधन भएकाहरूको परिवारलाई कसरी सहयोग गर्ने भन्नेबारे सोचेको पनि उनले बताइन् । राज्यले मृतकलाई फर्काएर ल्याउन नसके पनि मद्दत गर्ने प्रतिबद्धता प्रधानमन्त्री कार्कीले जनाइन् ।

‘दुःखद घटना भयो । सरकारमा हुनेको बुद्धि पुगेन जस कारण यो दुर्घटना भयो । बच्चाहरूले पढ्ने कसरी ? उहाँहरूको पढाइ, कामहरू दिने गरी सोचिरहेका छौं । उहाँहरूले मागेकै केही छैन । उहाँहरूको नोक्सान जे भयो, त्यसको क्षतिपूर्ति त हुनै सक्दैन । राज्यले फर्काएर त ल्याउन सक्दैन । राज्यबाट उठ्नलाई मद्दत गर्ने भन्ने हो ।’

प्रधानमन्त्री कार्कीसँगै सहिद परिवार भेट्न पुगेका सञ्चार तथा सूचना प्रविधिमन्त्री जगदीश खरेलले सहिदहरूको रगतमाथि अन्याय हुन नदिने र उनीहरूको रगतले न्याय पाउने बताए । गत भदौ २३ र २४ गते भएको जेन–जी पुस्ताको आन्दोलनका क्रममा ७६ जनाको ज्यान गयो । सयौं मानिस घाइते भएका छन् । यस वर्ष सदाझैं पूर्वराजा ज्ञानेन्द्र शाह, राष्ट्रपति रामचन्द्र पौडेल, प्रधानमन्त्री कार्कीले सर्वसाधारणलाई दसैंको टीका लगाइ दिएनन् ।

काठमाडौं । भदौं २३ र २४ भएको जेन–जी आन्दोलनमा मृत्यु भएका ललितपुरका बिनोद महर्जनका परिवारले १५ लाख रुपैंयाँ सहयोग प्राप्त गरेको छ ।

नेपाल सरकारले जेन–जी आन्दोलनमा मृत्यु भएका परिवारलाई राहतस्वरुप उपलब्ध गराएको १५ लाख रुपैयाँ ललितपुरका प्रमुख जिल्ला अधिकारी सुमन घिमिरेले ललितपुर–७ स्थित मृतककै घरमै पुगेर हस्तान्तरण गरेका थिए ।

१० लाख आर्थिक सहयोग र ५ लाख क्रिया तथा अन्य खर्चबापट सरकारले उपलब्ध गराएको रकमको चेक आइतबार प्रमुख जिल्ला अधिकारी घिमिरेले हस्तान्तरण गरेका हुन् । मृतकका आमा लतामाया महर्जनले चेक बुझेकी थिइन् । जेन–जी आन्दोलनमा ७४ जनाको मृत्यु भएको थियो भने एक हजार बढी घाइते भएका थिए ।

काठमाडौं । जेन–जी आन्दोलनका बेला भदौ २४ गते कारागारबाट भागेका पूर्वऊर्जा मन्त्री टोपबहादुर रायमाझी कारागार फर्किएका छन् । उनी सोमबार साँझ सुन्धरा कारागार फर्किएका हुन् । नक्कली भुटानी शरणार्थी प्रकरणमा पुर्पक्षका लागि थुनामा रहेका पूर्वउपप्रधान तथा पूर्वऊर्जा मन्त्री रायमाझी आफै कारागार फर्किएको सुन्धारा कारागारका प्रमुख कृष्णप्रसाद चापागाईंले जानकारी दिएका छन् ।

उनका अनुसार भुटानी शरणार्थी प्रकरणकै कारागारमा रहेका पूर्व गृहसचिव टेकनारायण पाण्डे भने सम्पर्कमा छैनन् । कतिपयलाई खोज्ने काम भइरहेको उनले बताए । कतिले आफै आउने जानकारी समेत गराएका छन् । सुन काण्ड र सनम हत्याका मुख्य अभियुक्त चुडामणि उप्रेती (गोरे) पनि बुधबार नै कारागार फर्किएको कारागार प्रमुख चापागाईंले बताए । नख्खु कारागारबाट बाहिर निस्किएका राष्ट्रिय स्वतन्त्र पार्टी (रास्वपा) सभापति रवि लामिछाने यसअघि नै कारागार फर्किसकेका छन् । देशभरका विभिन्न कारागारबाट भागेका धेरै कैदीबन्दी अझै फर्किएका छैनन् ।

काठमाडौं । राष्ट्रिय स्वतन्त्र पार्टी (रास्वपा) की पूर्व नेतृ सुमना श्रेष्ठले जेन–जी आन्दोलनले राजनीतिक दलहरूलाई सुधारको बाटोमा ल्याउन दबाब दिएको भन्दै तत्काल कार्यान्वयन गर्न सकिने सुधारका सुझाव प्रस्तुत गरेकी छन् । आज (आइतबार) सामाजिक सञ्जालमार्फत उनले दलहरूलाई स्पष्ट कार्ययोजना प्रस्तुत गर्न चुनौती दिँदै तत्काल लागू गर्न सकिने सुधारका उपायहरू सुझाएकी छन् । उनले लेखेकी छन्, ‘फेरि भन्छु, कसरी सच्चिने ? यो अमूर्त कुरा भयो ! कसरी सच्चिने भन्ने खाका सुन्न पाए हुन्थ्यो !’ उनले दलहरूले तत्काल गर्न सक्ने दुई वटा प्रमुख कदम सुझाएकी छन् ।

पहिलो, दलीयकरण रोक्न उनले शिक्षक र कर्मचारी संगठन खारेज गर्न, विद्यार्थी संगठनलाई नियुक्ति र ठेक्काको सौदाबाजीमा प्रयोग नगर्न, शिक्षालय तोडफोड गर्ने र बन्द गराउनेमाथि कारबाही गर्न, साथै शिक्षक र प्राध्यापकमाथि कुटपिट गर्नेलाई संरक्षण बन्द गर्न सुझाव दिएकी छन् ।

दोस्रो, उनले दलीय नियुक्तिहरूको राजीनामा गराउनु पर्ने बताएकी छन् । राजदूत, विश्वविद्यालयका उपकुलपति, विभिन्न बोर्ड, बैंक निर्देशक, करारमा नियुक्त कार्यकर्ता र संवैधानिक निकायमा भएका दलीय नियुक्तिहरू हटाउनुपर्ने उनको जोड छ । उनले जेन–जीलाई सम्बोधन गर्दै लेखेकी छन्, ‘माथिका कुराहरू दलहरूले तत्काल गर्न सक्छन् । यी सजिला र तत्काल सम्भव सुधार हुन्, जसका लागि संसद् वा सरकारको आवश्यकता पर्दैन । सुधारको वाचा केवल बोलीमा सीमित हुनु हुँदैन । यी माग पूरा नभएसम्म कुनै वाचामा विश्वास नगर्नुस् ।’

उनले भनेकी छन्, ‘यी कदमहरूले सार्वजनिक सेवामा निष्पक्षता कायम गर्नेछ, जुन जनताको सेवा गर्ने कर्मचारीतन्त्रको मूल आधार हो ।’ उनको यो बयान जेन–जी आन्दोलनपछि बनेको सरकारमा प्रत्यक्ष नभए पनि पर्दा पछाडि रहेर काम गर्ने चर्चाबीच आएको हो ।

हेर्नुस् सुमनाको स्टाटस

काठमाडौं । जेनजी आन्दोलनका क्रममा ज्यान गुमाएकाहरूको शवयात्रामा ऊर्जामन्त्री कुलमान घिसिङ र गृह तथा कानूनमन्त्री सहभागी भएका छन् । ऊर्जामन्त्री कुलमान घिसिङ गोपीकृष्ण हलबाट र गृह तथा कानूनमन्त्री ओमप्रकाश अर्याल चाबहिल चोकबाट जेनजीको शवयात्रामा सहभागी भएका हुन् । कुलमानले राष्ट्रिय झण्डा बोकेका छन् भने कानूनमन्त्रीले राष्ट्रिय झण्डा ओढेका छन्।

मृतक परिवारका सदस्य र आफन्तहरूले शवयात्रा सहित अन्त्येष्टि गर्न लागेका हुन् । अहिले मृतकका शवहरू अन्त्येष्टिका लागि शवयात्रा निकालिएको हो । त्रिवि शिक्षण अस्पतालबाट शवहरू चक्रपथ हुँदै पशुपति आर्यघाट लगिने तयारी छ। शवयात्राका लागि पुगेकाहरूले मृतकका फोटो र राष्ट्रिय झण्डा बोकेका छन् ।

कतिपयले ‘निःसन्तानलाई के थाहा जेनजीको सपना ?’ लेखिएको कपडाले शरीर छोपेका छन् । सरकारले जेनजी आन्दोलनमा मृत्यु भएकाहरुलाई शहीद घोषणा गर्ने, राष्ट्रिय सम्मानका साथ अन्त्येष्टि गर्ने र राष्ट्रिय शोक स्वरुप असोज १ गते सार्वजनिक बिदा दिने लगायत निर्णय गरेको थियो ।

त्यसपछि मृतकका परिवार अन्त्येष्टि गर्न तयार भएका हुन् । भ्रष्टाचार र सामाजिक सञ्जाल प्रतिबन्ध विरुद्ध युवाहरूले गरेको प्रदर्शन हिंसात्मक बन्दा ७२ जनाको मृत्यु भएको छ । मृत्यु हुनेमा धेरैजसो गोली लागेकाहरू छन् । कतिपयका शव आगोमा जलेको अवस्थामा भेटिएका छन् ।

पर्वत । जेन–जी प्रदर्शनकारीलाई उक्साउने गरी स्टाटस लेखेको भन्दै पर्वत फलेबास नगरपालिका–४ का वडाध्यक्ष अच्युत तिवारीलाई पक्राउ गरिएको छ । जिल्ला प्रहरी कार्यालय पर्वतले उनलाई आइतबार वडा कार्यालयबाटै पक्राउ गरेको हो ।

जेन–जी प्रदर्शनमा घृणा फैलाउने गरेर सामाजिक सञ्जालमा लेखेको आरोपमा उनलाई पक्राउ गरिएको जिल्ला प्रहरी कार्यालय पर्वतका डिएसपी रविन विष्टले जानकारी दिए । उनीविरुद्ध विद्युत्तीय कारोबार ऐनअन्तर्गत मुद्दा चलाइएको छ। वडाध्यक्ष तिवारीले स्टाटसमा डिएसपीको नामै तोकेर जेनजीले कारबाही गर्नुपर्ने उल्लेख गरेका थिए ।

‘फलेवासका बालुवा तस्करहरू, तस्करका संरक्षकहरु र कारबाही गरी पाउँ भनि पत्र बुझाउन जाँदा पत्र नबुज्ने डिएसपी रविन बिष्ट लगायत केही भ्रष्ट नेता तथा केही भ्रष्ट कर्मचारी यी भ्रष्टलाई समेत जेनजीले कारबाही गरिदिन्छ कि भन्ने आशा गरेको छु । प्रहरीले कारबाही नगर्ने भएपछि ?’, उनले लेखेका छन् । उनी फलेबास नगरपालिकाका र नेपाली कांग्रेस पर्वतका प्रवक्ता समेत हुन् ।

काठमाडौं । भ्रष्टाचार र सामाजिक सञ्जालमा लगाइएको प्रतिबन्धको विरोधमा ठूलो संख्यामा जेन–जी काठमाडौंमा प्रदर्शनमा उत्रिएका छन् । बिहान माइतीघरमा भेला भएका उनीहरु बानेश्वरको निषेधित क्षेत्र नजिक पुगेका छन् ।
जिल्ला प्रहरी परिसर, काठमाडौंमा प्रमुख एसएसपी विश्व अधिकारीले कम्तीमा चार हजारको संख्यामा युवाहरु भेला भएको बताएका छन् ।

तर, गृह मन्त्रालयका एक अधिकारीका अनुसार कम्तीमा १२ हजार जेनजी भेला भएको जानकारी प्रहरीले पठाएको छ । त्यहीअनुसार सुरक्षा व्यवस्था मिलाउन सर्कुलर जारी भएको एक अधिकारीले बताए । प्रदर्शनका कारण ट्राफिक व्यवस्थापन अस्तव्यस्त बनेको छ । ‘कुनै अप्रिय घटना नहोस् भनेर सुरक्षा संयन्त्र मजबुत बनाइएको छ,’ अधिकारीले भने, ‘उहाँहरुलाई आफ्ना माग राख्न कुनै अवरोध गर्ने छैनौं ।’

काठमाडौं । भ्रष्टाचार र सामाजिक सञ्जालमा लगाइएको प्रतिबन्धको विरोधमा माइतीघरमा भेला भएका जेन–जीको प्रदर्शन बानेश्वरतर्फ अघि बढेको छ । आज (सोमबार) बिहान ९ बजेदेखि उनीहरु माइतीघरमा भेला भएका थिए । विभिन्न प्लेकार्ड बोकेका उनीहरु नाराबाजी गर्दै बबरमहल पुगेका छन् । उनीहरुले ‘आवर फ्युचर इज नट फर सेल’, से नो टु करप्सन, जेन–जी हेयर–फ्युचर क्लियर’ जस्ता प्लेकार्ड बोकेका छन् ।

प्रदर्शनका कारण ट्राफिक व्यवस्थापन अस्तव्यस्त बनेको छ । जिल्ला प्रहरी परिसर, काठमाडौंमा प्रमुख एसएसपी विश्व अधिकारीले करिब ४ हजारको संख्यामा युवाहरु भेला भएको बताएका छन् । ‘कुनै अप्रिय घटना नहोस् भनेर सुरक्षा संयन्त्र मजबुत बनाइएको छ,’ उनले भने, ‘उहाँहरुलाई आफ्ना माग राख्न कुनै अवरोध गर्ने छैनौं । बानेश्वरको निषेधित क्षेत्रसम्म उहाँहरु जान पाउनु हुन्छ ।’ उनीहरुलाई विभिन्न राजनीतिक दल, समूह र व्यक्तिहरुले समर्थन गरेका छन् ।