काठमाडौं । नेकपा (एमाले) का नेता तथा पूर्व मन्त्री महेश बस्नेतले संसद पुनर्स्थापनाको माग राखेर सर्वोच्च जाने बताएका छन् । समसामयिक राजनीतिक विषयबारे जानकारी दिन आज (बुधबार) आयोजित पत्रकार सम्मेलनमा नेता बस्नेतले संसद पुनर्स्थापनाको लागि कानुनी प्रक्रियामा जाने बताएका हुन् ।

उनले भने, ‘संसद पुनर्स्थापनाको माग लिएर हामी सर्वाेच्च अदालतको ढोका ढकढक्याउँछौँ,’ उनले भने, ‘पार्टीले आधिकाररिक हिसावले जाने अथवा कानुन व्यवसायीमार्फत जाने, त्यो कुरामा हामी अन्तिम छलफल गर्दैछौँ ।’ उनले भोलि बस्नै पार्टीको सचिवालय बैठकले पार्टीको आगामी रणनीति तया गर्न र सोहीअनुसार चुनावमा जाने समेत जानकारी दिएका छन् ।

‘बालेनले सुदन गुरुङलाई ‘एम्बुस’ बनाएर पड्काउन खोजिरहेका छन्’
नेकपा (एमाले) का नेता महेश बस्नेतले जेन–जी आन्दोलनका अगुवा सुदन गुरुङलाई काठमाडौं महानगरका मेयर बालेन शाहले ‘एम्बुस’ बनाएर पड्काउन खोजिरहेको आरोप लगाएका छन् । नेता बस्नेतले आज एमाले पार्टी कार्यालयमा पत्रकार सम्मेलन गरेर यस्तो आरोप लगाएका हुन् ।

‘सुदन गुरुङ जस्ता मानिसहरूलाई एम्बुस बनाएर यहाँ पड्काउन खोजिँदैछ,’ बस्नेतले भने, ‘सुदन गुरुङ जस्ता मान्छेहरू बालेनजीहरूको योजनामा केपी ओली, महेश बस्नेत र महेश बस्नेतलाई गिरफ्तार गर्नुपर्छ भनेर सोसियल मिडियामा ट्रेन्ड चलाउँछन् । अनि डेलिकेसन जान्छन् प्रधानमन्त्री र गृहमन्त्रीको सल्लाहमा ।’ उनले मेयर बालेनले गुरुङलाई अगाडि सारेर अदृश्य रुपमा गतिविधि गरेको आरोप समेत लगाएका छन् ।