काठमाडौं । राष्ट्रिय स्वतन्त्र पार्टी (रास्वपा) ले तत्काल कसैसँग सहकार्यका लागि छलफल अघि नबढाएको स्पष्ट पारेको छ । रास्वपा प्रवक्ता मनिष झाले युवाहरुलाई पार्टीमा भित्र्याउने, अवसर दिने र नयाँलाई स्वागत गर्ने कुरा पार्टीको नीति नै भए पनि कुनै पार्टी वा समूहसँगै सहकार्यबारे कुनै छलफलहरु पार्टी तहबाट नभएको स्पष्ट पारेका छन् ।

रास्वपाले काठमाडौं महानगरपालिकाका मेयर बालेन शाहको ‘समर्थन’ मा पार्टीलाई अगाडि बढाउने योजना बनाइरहेको समाचारहरु बाहिर आइरहेका बेला पार्टी प्रवक्ता झाले यसमा कुनै सत्यता नभएको बताएका हुन् । पार्टीका शुभेच्छुकहरुले कुनै पार्टी वा समूहसँग मिलेर गए हुने भन्ने गरी गरिएका बाहिरका छलफलहरु पार्टीको आधिकारिक विचार नहुने प्रवक्ता झाले बताएका छन् ।

पछिल्लो समय रास्वपाको कार्यकारी नेतृत्वमा कुलमान घिसिङलाई राखेर अघि बढ्ने तयारी भइरहेको चर्चा बाहिरिएपछि प्रवक्ता झाले यस्तो स्पष्ट पारेका हुन् । रास्वपा सभापति रवि लामिछानेको ठाउँमा सर्वमान्य व्यक्ति राखि नेतृत्व परिवर्तन गरे आफ्नो समर्थन रहने काठमाडौं महानगर प्रमुख बालेन्द्र शाह (बालेन) को सहमति रहेको चर्चा बजारमा सुनिएन आएको छ । यसै हल्लालाई खण्डन गर्दै प्रवक्ता झाले पार्टीमा यस विषयमा कुनै जानकारी र छलफल नभएको स्पष्ट पारेका छन् । तर, रास्वपाले युवाहरुको विचार र प्रतिनिधित्वलाई जहिल्यै स्वागत गर्ने प्रवक्ता झाले बताएका छन् ।