काठमाडौं । राष्ट्रिय स्वतन्त्र पार्टी (रास्वपा) की केन्द्रीय सदस्य डा. तोसिमा कार्कीले पार्टी पुनर्गठनको मुद्दा उठाउँदा सभापति रवि लामिछानेविरूद्ध षड्यन्त्र गरेको भाष्य बनाउन खोजिएको गुनासो गरेकी छन् । शनिबार सामाजिक सञ्जाल फेसबुकमा लामो स्ट्याटस लेख्दै डा. कार्कीले रास्वपाले गर्नुपर्ने तीन कामको सूची पनि राखेकी छन् ।

‘कृपया मिथ्या आरोपहरू लगाएर निरन्तर ममाथि प्रहार नगरिदिनु होला । यो पार्टीलाई हुर्काउन, बढाउन र सबल बनाउन दुःख गरेको छु । गर्नेछु । तर पार्टीलाई थप लोकतान्त्रिक र समय सापेक्षिक रूपान्तरित बनाउने मेरो प्रयास तपाईंहरूको विचारभन्दा फरक भयो भन्दैमा सामाजिक सञ्जाल र विभिन्न माध्यमबाट निरन्तर प्रहार गरेर यो मेरो धैर्यलाई च्यालेन्ज नगरिदिनु होला,’ उनले भनेकी छन् ।

राष्ट्रिय स्वतन्त्र पार्टीलाई समय सापेक्ष रूपमा मध्यममार्गी मुलधारको मुख्य शक्तिको रूपमा विकास गर्नु आफ्नो लक्ष्य रहेको उनले बताएकी छन् । रास्वपालाई वैकल्पिक शक्ति, नागरीक समाज र जेनजी सबैलाई समेट्नका लागी पार्टीमा सांगठनिक र वैचारिक पुनःगठन पुनरवलोकन आवश्यक छ भन्ने आफ्नो मान्यता रहेको उनको भनाइ छ ।

‘पार्टीलाई थप सबल सुदृढ बनाउन खोजिएको प्रयासलाई सभापति रवि लामिछाने विरुद्धको षड्यन्त्र जस्तो बनाएर भाष्य बनाउनुहुने तपाईंहरूको निरन्तर प्रहारले पूरा पार्टीलाई नै कमजोर बनाउने काम नगर्नुहोला,’ उनले भनेकी छन् ।

सँगै उनले तीनवटा अनुरोध पनि गरेकी छन् । पहिलो विस्तारित बैठकमा महत्त्वपूर्ण र सक्रिय सहभागिताको लागि पार्टीका नेताकार्यकर्ताहरूलाई उनले अनुरोध गरेकी छन् । रास्वपाको विस्तातिर बैठक आगामी कात्तिक २१ र २१ गते हुँदैछ ।

दोस्रो, उक्त बैठकमा प्रस्तुत हुने राजनैतिक र सांगठनिक प्रतिवेदनमाथि सहभागीहरूले राय राख्ने मात्र होइन, प्रतिवेदनहरूलाई स्वीकार्ने-अस्वीकार गर्ने-तोकिएका संशोधनसहित स्वीकार्न पाउने गरी मताधिकार दिइनुपर्ने उनको भनाइ छ ।

तेस्रो, जेनजी आन्दोलनपछिको रास्वपालाई यथास्थितिमा रहेर वैकल्पिक शक्तिहरुलाई नसमेटी आसन्न चुनावमा एक्लै जाने छुट नभएको पनि उनले बताएकी छन् । ‘हामी उदार हुनुपर्छ । साझा प्लेटफर्म बन्नुपर्छ । अब यही कुरामा पटक–पटक स्पष्टीकरण दिन बाध्य नपार्नु होला । बरू आउनुस् एक कदम अघि बढेर रिफर्मेसनको मोडालिटीमा बसह गरौं,’ उनले भनेकी छन् ।