काठमाडौं । राष्ट्रिय स्वतन्त्र पार्टी (रास्वपा) कार्यवाहक सभापति डीपी अर्यालले मुलुकलाई सही निकास दिन निर्वाचनको विकल्प नै नभएको बताएका छन् । आज (सोमबार) भैरहवामा पत्रकारहरूसँग कुरा गर्दै अर्यालले फागुन २१ मा चुनाव गराउनुको विकल्प नभएको बताएका हुन् । ‘रास्वपा चुनावमा केन्द्रित भइसक्यो, पार्टी उपसभापति स्वर्णिम वाग्लेले नेतृत्वमा बाचा पत्र तयार गर्ने काम भइरहेको छ,’ उनले भने, ‘कार्तिक १५ गते निर्वाचन केन्द्रित कार्यक्रम घोषणा गर्दैछौं । अरू दलले पनि चुनाव सम्पन्न गर्न सहयोग गर्नुपर्छ ।’

अहिलेको सरकारले चुनाव गराउन नसके मुलुक नै अप्ठ्यारोमा पर्ने उनको भनाइ छ । त्यस्तै उनले अहिलेको अन्तरिम सरकारको मुख्य काम नै निर्वाचन गराउनु भएको पनि बताए । रास्वपाले जेनजी अगुवा, ऊर्जामन्त्री कुलमान घिसिङ, काठमाडौँका मेयर बालेन्द्र शाहलगायतसँग संवाद गरिरहेको विषयमा पत्रकारहरूले सोधेको जिज्ञासामा उनले भने, ‘सबै शक्तिलाई एकै ठाउँमा ल्याउन निरन्तर संवाद भइरहेको छ । छलफलहरू सकारात्मक भइरहेका छन् ।’