काठमाडौं । कारागारमा रहेका राष्ट्रिय स्वतन्त्र पार्टी (रास्वपा) सभापति रवि लामिछानेले अघिल्लो सरकारले आफूविरुद्ध लगाएको मुद्दामा वर्तमान सरकारको धारणा मागेका छन् ।

राजनीतिक प्रतिशोधका आधारमा मुद्दा दायर गरिएको दाबी गर्दै उनले सरकारको मत स्पष्ट हुनुपर्ने बताएका छन् । नख्खु कारागारबाट चार बुँदे सन्देश जारी गर्दै लामिछानेले ‘एक पटक चिठ्ठा परेकालाई पटक–पटक नपर्ने’ चेतावनी पनि दिएका छन् । लामिछानेले वर्तमान सरकारप्रति रोष समेत प्रकट गरेका छन् । आफूलाई अघिल्लो सरकारले राजनीतिक प्रतिशोधमा फसाएको दोहोर्‍याउँदै उनले वर्तमान सरकार समेत आफ्ना लागि केही नबोलेकोमा आक्रोशित देखिएका हुन् ।

उनले वैकल्पिक र परिवर्तनकारी दल, समूह र व्यक्तिलाई एकीकृत गर्ने जिम्मेवारी अहिले रास्वपाको काँधमा आएको उल्लेख गर्दै आवश्यक परे नेतृत्व र त्याग दुवै गर्न तयार रहेको बताएका छन् । नख्खु कारागारमा भेटेर फर्किएका उनका प्रेस सल्लाहकार प्रमोद न्यौपानेका अनुसार लामिछाने स्वस्थ, दृढ र आत्मविश्वासी छन् । उनले राजनीतिक चासो राख्नेहरूलाई सन्देश अवगत गराइदिन आग्रह गरेका छन् ।

लामिछानेका चार सन्देश :
१) अघिल्लो सरकारले राजनीतिक प्रतिशोधका आधारमा आफूविरुद्ध लगाएको मुद्दामा वर्तमान सरकारको धारणा खोजिरहेको छु, ‘फेभर’ होइन । हिजो ‘अन्याय भयो’ भन्नेहरूले आज केही त बोल्नै पर्छ ।
२) पछिल्लो जनमतका आधारमा चौथो शक्ति भएकाले वैकल्पिक र परिवर्तनकारी दल, समूह र व्यक्तिलाई एकीकृत गर्ने जिम्मेवारी रास्वपामा छ । आवश्यक परे नेतृत्व र त्याग दुवै गर्न तयार छौं ।
३) एक पटक चिठ्ठा परेकाहरू पटक–पटक पनि पर्ला भन्ने सोच्छन् । तर संयोग दोहोरिँदैन । भर्खरै चिठ्ठा परेकाहरू फेरि त्यसकै लोभमा छन् । लोभीहरूले चिठ्ठा किन्न सक्छन्, तर हरेक जालमा माछा पर्दैन ।
४) रास्वपालाई मुलुकको नेतृत्व गर्ने दल बनाउनु पर्छ । यो क्षणिक लाभ–हानिको सोचले सम्भव हुँदैन । परिस्थिति जस्तोसुकै आए पनि रास्वपालाई पहिलो शक्ति बनाउने दृढतामा म कमजोर हुने छैन, मेहनत र समय लागे पनि लक्ष्य त्यही हो ।